ترنيمات عشق
(1)
متخيلانى إزاى و أنا .. باقفل ببان
الغرفة
علشان أسمعك
و بكل صبر و شوق و لهفة باستميت و
أفضل مَعِك
و أعيد و أردد ف الكلام علشان يطول
بيننا الحوار
و الجملة تبقى جملتين و الفكرة توضح
مرتين
واخد قرار
أحتال بكل وسيلة علشان أسمعك
(2)
بتقوللى أخجلتني و رويت حياتى خضار
أنا قلت نفسى أشوفك و الكسوف كاسى
و ألبس عواطفك توب على مقاسى
أنا شوقى كان راسِى .. صَبَحْ فوَّار
نفسى ف مرة أرقبك بالعين
و ألمس خدودك لو كاسيها النار
يمكن ساعتها م الهوى أنهار
بس المحبة م الفؤادى تجرى،
و تفيض مشاعر منى كا الأنهار
(3)
مجنون أنا بعيونك النايمين
دبِّل جفونك هوى و السحر صار فدادين
مديى إيديكى و أقطفى وردى عمرك
مِعَدِّى
باقى ليالى و اللي فاتوا سنين
(4)
صدفة و جابتنى ف طريقك لما عدِّيتى
و سرقتي روحى لبعيد عن صحبتى و بيتى
مربوط أنا بخطوتك و السكة و المشاوير
عاشق يغير ..
من إبتسامتك للنسيم لو مرة حنيتى
(5)
وهبت روحى فدا و العشق أيه غير روح
و إتلَمْت من دا وِدا و العمر كله
جروح
و إنت الطبيب المداوى و اللي غاوى
يشيل
بدأت بميل لما إكتمل صبح الهوى مفضوح
(6)
متخيلة صوتك بيعمل فيا أيه؟
بيهزنى بيشدنى ...
بيفُكِنى و يعيد براحة راحته
تركيبى بإيديه
(7)
باشبع بصوتك من ترانيم الطيور
و أسمع غنى كل النسايم و الزهور
و ف عز سمَعَانُىه باكون .. مشتاق
إليه
مجدولة روحى بضفاير حبك الأخضر
و مسبسبة القصة على الجبين أنور
مفتون يا قلبى و الفِتَن ألوان
و لا حد شُفته على الغرام يقدر
(8)
ما كفاية غُربة
يا أجمل وردة ف الصحبة
يا شمس ف دنيتى الرحبة
يا كون مسكون بمعنى الحب
يا شبابيك على الجنة و متواربة
صباح الفل يا معنى الجمال كله
و يا نور إحتضن ضله
يا ملكة بين بنات الحور ... و متعاجبة
(9)
ماليش حيلة .. و باسمع صوتها بالتيلة
و باحسب ف الليالى البعد
و اطلبها و أقول هاترد ما تردش ....
يادى النيلة
دى شبكة أيه دى يا ربى ادارى محبتى ف
قلبى
و انام بيه شكوته معبى، صنوف الفكر
تشكيلة
و هاعمل أيه ماليش حيلة
(10)
بترمى الطعم
تصطاد قلب بمهارة
و بتشد الخيوط تشبكنى سنارة
و يا خسارة
خلاص قلبي إنشبك و إنصاد
و غَرَّقنى بلُغة الضاد ما بين فكين
رحى حجارة
و ﻻ يهمك و عيش عادى
فداك قلبى .... و كَفَّارة
(11)
هاصرخ بالصوت العالى و أقول إنى باحبك
و أكتب على كل جدار أشعار و بدون ما
أختار
أنا بايع راحتى عشان قُربك و إنتى
براحتك
تعترفى أو تنكرى سيَّان الحب شعور ف
النور بيبان
بس أنا مستنى إن أسمع و بكل صراحتك
إن أنا صار ليا حداكى مكان .. و إنى
لمستك
(12)
تفوتنى الروح ... ولا أفوتك
و أعدمها الودان لو يوم هاتقدر تفتقد
صوتك
و عينى أيه ضرورتها و ايه هاتفيد
برؤيتها
إذا النِنْ إكتوى بفوتك
(13)
حتى موش بتحِنِّى على مليون سؤال
سايبة روحى معلقة بألف إحتمال
هو موقف؟ و لا ده آخر قرار
و لا دى صدفة و واخدِك لانشغال
ياللي بتحاول بقسوة تختبرنى
بس زودت العيار فوق الدلال
طب جاوبنى ... رق مرة و بص لى
يجرى أيه لو مرة واحدة سَمَحْتِلِى ..
بيك أختلى ....
و
أحظى بإجابة سؤال .. أنا شوقى طال
(14)
الليالى اللي فى بعدك بتخاصمنى الراحة
فيها
و العيون اللي إبتدا نومى يجافيها
و المشاعر اللي قلبي إختار عشان حبك
صافيها
موش باقولك موش هاعيدها
لأ هازيدها ... بس من فضلك راعيها
الهوى اللي ما شوفت زيه قبل منك
و الفؤاد اللي ما بطَّل يحكى عنك
كل ده بالرغم إنك لما باعرضلك مشاعرى
ما صدر منك إشارة تقول شاريها .. أو
رافضها أو نافيها
(15)
حب و باحبك بإقتدار
عشق و عشقتك بعد ما صار اللي صار
و إنت اللي فايتانى أعانى
و رامية أعصابي لنار اﻹنتظار
طب ليه ما حَنِّش قلبك القاسي
و سكَنْتِى راسي و الفؤاد أسرار
(16)
باكتب على الأيام كلام العشق باللهفة
و أفرش سنين العمر للخطوات .. إذا
كَفَّى
يا حب صار ليلى و نهار أحلامى فى
الدنيا
ما باطيقش أغيب عنك و لو ثانية
ويَّا الحنين .. دمى بدموع العين
بيتصَفَّى
باوهب عنيكى العمر ولا وَفَّى
(17)
هاتصدقينى لما أقولك
إن نظرة من عنيكى بعمرى كله؟
و إنى شايفك شمس كل الكون و ضله
و إن ضحكة رمشك الساحر بتدينى اﻷمل
و إن بين رمشك كلام ... عمال بيحكى
اللي حصل؟
نفس بس أقعد معاكى ... زى عاشق لاف
بخله
يا اللي نظرة من عنيكى ... بعمرى كله
(18)
القصة لسة بتِبْتِدى و الليل حِلِي
فماتقَفِّليش كشكولِك الوردى بلاش
تستعجِلي
أنا لِسة بُكرة هاقول كتير و راح
أنجَلى
بس إنتى و حياة المجيد دارى على
شَمعِك يقيد
و بلاش بقى تِتحَنجِلي
دى القصة لسة بتِبتِدى خليكى فاطمة فى
الغرام
و أنا اكون على
متشوَّقِك
متشوقك .. شوق الندى لخد الورق
متشوقك .. شوق الولد للأم بعد أما
إتسرق
نفسى أرتمى ف حضنك و أنام
و أحلم بأنى رجعتلك و أبدأ كلام
و أرسم على قبة سماكى نور حنينى اللي
برق
متشوقك .. شوق العطاشى لبل ريق
ملهوف على طوقك أنا .... لهــــفة غريـــق
و عيونى بيكى إتعلقت، و صبحتى فى
الحلم المُنى
مدى إيديكى و طبطبى على العمر
طَفِّيلى الحريق
متشوقك .. شوق الغريب اللي بكى لما
الطريق منه إفترق
و خطاه على كل الدروب خلِّت قليبى
بيتحرق
متشوقك .. شوق العجوز اللي على باب
الرحيل
فجأة عِشِق ... و إتمنى بس يدوق رحيق
و تغيبى عنى و تحزن الأيام
و تغيب معاكى ف دنيتى الفرحة
و تعودى تانى أرجع و أقول يا سلام
و تعود معاكى ورود سنين طارحة
و حياة عيونك دول و فيهم كل ويلى
و برضه فيهم نهر حبى و سلسبيلى
أنا بيكى باصبر ع السنين السود
و باقدر بيكى برضه على المعاندة
و ع الوجود
و كفاية نظرة من العيون دى تكون أمل
و ساعتها كل الظلم كله هايُحتَمل
و كفاية وردك لما يرقص ع الخدود
ما تفكريش أنا حبى كلمة و قولتها
و العشق بادئ بس عمره ما إنتهى
أجمل حياتى الباقية بيه كملتها
و قليل قليل
لما الزمن بالعشق ع الإنسان يجود
أنا بيكى باصبر ع السنين
و أبعت حروف الشوق وفود
.... دا أنا حتى
مش محتاج ردود
أمر إنتهى
غربينى و شرقينى، حيرينى و عذبينى
بس عيشى لحظة الصدق الأكيدة
و إقرى كل كلام ف عينى
و إدبحينى بهجرك القاسى و سيبينى
إوعى تفتكرى إن يوم
بدروع صدودك تمنعينى
يا حلا الأيام يا أجمل ما ف سنينى
كل ست و مهما قال الناس عليها ما
تشاغلنى ،،
و غيرك إنتى ما يملا عينى
غربينى و شرقينى طلعينى و نزلينى
جربى هجرك و بِينى، القدر بينك و بينى
مهما حتى قفلتى بابك غمضى عينك و بُصى
ركزى و إنتِ تلاقينى
سامعانى وسط الصمت بانده من بعيد
من غير كلام من غير حروف من غير بريد
و أعيد و أزيد
يا عشق عاش العمر ينبض فى الوريد
نظرة عنيكى مغلبانى سنين سفر
يا عيون غجر
يا أحلى بركان من حنين فيا إنفجر
عشقك خطر
و برغم تحذير الصحاب شايفك مطر
أوراق شجر ساكنة العيون
حتى إن قفلت رموشى يوم و ف عز نوم
بالقانى شايفك بالبصر
أصل الغرام ... وجهة نظر
و أبعِد سنــين .. و شراعى يملاه الحنين
و ألقانى قاصد نور فنارك من بعيد
ما اسألش يوم هارجع منين
عارفاك عيونى و مركبى راجعة
تحضن مرافئ صحبتك و تئن من بُعدى اللعين
باستسمَحَك بس بحنين بالله عليك .. مِد الإيدين
متغلفة عيونك بشوق مكتوم
و مضببة عيونى بأحلى غيوم
فاكرانى موش هاقرا الحروف فيهم
أو مرة هاقدر إنى أجافيهم
واصلالى أصل مشاعرك الحلوة
و لا ممكن أبعد عن طريقك يوم
إتعززى و إتبغددى و تيهى
أنا موش هاممنى الناس .. و كل اللوم
قولي لكل الناس بيعشق ضحكتي
و يدوب فى نظرة عين
و واهب باقى عمره يكون
يادوب لمحبتى
قولي إنه شايف فيا كل الناس
و مغرق الدنيا بندى و إحساس
و عيونه شايفاني النهار
حارساني ساكنة ف سكتي
قولي الحقيقة و عرفيهم قد أيه
اللهفة ماليه عنيه
و ما تخجليش تحكي غناوى الهمس
غزل اﻹيدين و الدغدغة و اللمس
قولي إن حبك دنيتي
قولي إن أنا ليله و ويله و فرحته
و كمان حروف إسمه و كل هويته
قولي لكل الناس كﻻم مفهوم
قولي و سيبك م العتاب و اللوم
قولى إنك إنتى قضيتى
و هديتي ...
و ف عتمة الليل الطويل
أنا شايف النور من عيونك .. شمعتي
قولي لكل الناس ... بيعشق ضحكتى
حيثيَّات إجرام
مجرم عشان عاشق ملامحِك؟
موش هاقول الله يسامحك
مجرم عشان نفسى ف وصالِك
باكتب الشعر ف جمالِك؟
و إنتِ مالِك؟!!
إنى شايفك أحلى
من كل البنات و الناس
آمته كان الشوق يُقاس؟
صدقينى إن إنت عندك إلتباس
صارحى حالِك
مجرم أما أكون صريح؟
لما بارضى أبات جريح؟
لما عقلى فات دماغى ف يوم و جالِك
ماشى جداً ..... هوه ذلك
لما شوفتك إبتدا الإجرام معايا
و صار حياتى و صار هوايا
لما أعبَّر عن شعورى دا شيئ حلال
ربنا بس اللي عالم بالنوايا
و حبى هايجاوب سؤالك
إن أنا باعشق ملامحك
و إوصفينى بإنى مجرم
موش هاسامحِك
باضعف قصاد
نظرة عنيكى و بابتدى
أتمنى قربك بس أقول لو تبعِدى
ماهو مستحيل هاقدر أقولك كلمتين
و إنتى بسهام عينك فى قلبى تسددى
أجرأ عيون قابلتها عينى و شوفتها
و لا مرة شوفتك فى الهجوم تترددى
يا لوعتى يا فرحتى يا سلوتى
لو مرة بالعشق اللي ساكن
جوة قلبى تِنعِدِى؟
لو مرة أبلغ مقصدى؟
أنا كنت أقول للدنيا
على حبى إشهدى
موش هاتوب
لما كفى بيلمسك
باشعر برعشة فى البدن
و أسمع سكون الكون
و أكون مليان شجن
على فرحة سارية ف الحروف
حتى الكلام
واقف على لسان الزمن
دايب فى لحن كما الحرير
يرقص معاه القلب
دقات من جديد
و العشق يجرى ف الوريد
و باحس بيكى
كإنى جاى من غربتى
و إنت الوطن
،،
و إن يوم صدَف
و بخدى مرة لمست خدك
بابقى فايت روحى عندك
و أمشى تايه فى الدروب
ما عرف شروق الشمس
أبداً م الغروب
باقدر يادوب
أسند على لذة مشاعرى
و سحر خدك ف الخيال
و أرسم قلوب
و إن حذرونى من هواكى
باهز راسى من العجب
و أحلف ما أتوب
و إن قالوا عنك ذنب أقول
يا رب كتَّر م الذنوب
رغم ان حبك فى العيون مكتوب
و مرسوم ع الجبين و منقوش ع الشفايف
لسة قلبك قافل الأبواب
و عامل بالخداع قال يعنى موش شايف
و أنا كل حاجة ف دنيتى شاورت عليكى
و كل يوم بيفوت و أنا ف بُعدك باموت
محتاج و لو لمسة إيديكى مستحيل أصبر
كده
عايش على أمل اللقا لو إنت موش متأكده
طب أيه بقى؟ .. حسى بمشاعر روح بتتعلق
بطيفك
بالوريد اللي يغذى القلب حاضن حد سيفك
إوعى يوم يبقى اليقين ف عيونى متعلق
بزيفك
حتى لو ... ماقدرش أخبى الحب أو ألغى
إنشغالى
و الحقيقة واضحة قدَّام العيون و
فاضحنى حالى
أنا موش باحبك بس لكن الأكيد ...
ماعرفش مالى
ضحكة عيونك شباكين ع الروح
بيقولوا أحلى كلام صريح
و مهما داروا سرهم مفضوح
ضحكة عيونك سلوتى و زادى
و عشان جمالهم ياما بانسى جروح
بس إضربيلى معاد و فين مايكون
أنا روحى قبلى للمكان هاتروح
محسسانى بلهفتى دايماً عليكى إنى غلط
و إنى مكمِّل فى العبط
أو إنى طفل ف لعبة بجنونه شبَط
أو حد فى دماغه إتخبَط
و أنا بَلْوِتى ف قلبى الضعيف مخى
الزلط
قلبى ..... ف بحر الحب من غير طوق
نجاة
فجأة سَقَط .. معلش بكرة ها
تِتْظَبَطْ
بس اللي نفسى تعرفيه إنى باحبك .... و
فقط
ما تحاسبنيش على لهفة جوة عيون
حبك خلاص خلانى 100 مجنون
و الشوق كوانى و عشقى بهدلنى
لو أغيب ثوانى .. ماعرفش أيه راح أكون
ما تحاسبنيش على نظرة مشتاقة و لا ع
الحنين
و أنا كلى بيه معجون
أنا بس صابر لاجل أنول و عشان عيونك
كله كله .... يهون
كل الكلام ... عاجز عن التعبير
بيقِل عن وصف الحقيقة و ناقصه لسة
حاجات كتير
بامسك إيديكى يادوب ... و بابقى خلاص
باطير
و بابص فى عيونك و من نفسي باغير
يبقى أما خدي ف مرة يلمس خدك الوردى
ما تكونش لحظة خلاص و هاتعدى
غارقان فى دنيا من الحرير، نشوان فى
موجة من العبير
عارف ... مانيش أول حبيب، و أتمنى إنى
أبقى الأخير
سامحينى على حرفى الشقى، و إتحققى
كل الكلام عاجز عن التعبير
فى كل يوم تتأخرى
بيكون عذابى كبير .. و أقول ها تقدرى
و لا حاجة فارقة معاكى ليه؟
فرحانة فى عذابى بصحيح؟
... بتهزَّرى
يا دنيا بنسيم الربيع تتعطرى
لو حتى مرة كل يوم طلى عليا و شقَّرى
من غير ما مرة تلمَّحى و تصرَّحى
بإنى طماع ........ مفترى
لو مرة واحدة تحسى بالشوق اللي طال
أو بيكى لما تزيدى تقلك و الدلال
ها تقدرى
و لا مرة تانى عن ميعاد
.. تتأخرى
الدنيا من غيرك غيوم
و الثانية يوم
و القلب مليان بالهموم
باتفقدك
فى الشاشة و نجوم السما
و أعمل ما بينى و بين خيالى ملحمة
و أستنى كلمة بأى شكل تردنى
لحياتى أشهق عشق ليكى
و أنا اللي بافهم بالوما
و باشِم ريحتك ف الهدوم
و أستغيبك طيف فى الليالى
شاغِلِّى بالى
و برضه بيغيب ع المعاد
طال البعاد
و أنا روحى حوالينك تحوم
ترجع تقولى خلاص
ما بتفكرش فيك
إرحم عنيك
و يرد قلبى بكل لوم
يمكن ظروفها ملعبكة
و الحجة للغايب معاه
و الشوق يدوم
أرجوكى يوم لو تقدرى
بس لمشاعرى تقدرى
و تداوى لهفة قلب عاشق
فيه رموشك سهم راشق
نفسه يفرح بيكى يوم
دى الدنيا من غيرك غيوم
نفسى أسألك
عن كل لحظة بعدتى فيها عن العنين
نفسى أسمعك تحكيلى و أفرح
لما أضمك بالإيدين
نفسى إنه تانى ما تبعديش
و لا يوم يقدَّر ربنا ف ما بينا بين
نفسى إستحمى بنظرتك وسط الكسوف
و امد أيدى بلطف تترجى الكفوف
و تضمها و تحضنها و تنسيها خوف
باين على رمشك حزين
نفسى أسكنك و تكونى أوطانى
نفسك أمنحك فى العشق روحى و دنيتى
و تكونى كلى و مهجتى و معظم كيانى
نفسى أرسمك لوحة حنين
و الشوق و أحلامى الكتير يبقوا الإطار
نفسى أرسمك نور النهار
نفسى أحضنك و أنسى اللي راح
و أسامح العمر اللي عدى
و أقول لقلبى خلاص سماح
و أنا عارفه هايقولك آمين
نفسى أسألك
و إنتى ف إيديا ... روحتى فين؟
جايلك و خجلانة الخطاوى
و كنت ناوى
أوهبلك الدنيا بكنوز الكون
و يا ريت تساوى
ف إيدى وردة
يا تقبليها ،،، يا تُرفضى
بس إعْرَفى عنى إنى غاوى
و إن إسمك عندى أحلى
مِ النسيم و من الغناوى
و إنى شايفك أغلى من كل البشر
كُحل العيون نور البصر
و إن حبك ملحمة ،، و أنا لِيها راوى
طبيعية
و مالية القلب حنية
و نظرة بين عيونك دول
أكيد من ربنا هدِيَّة
يا مالكة عَلَيَّا وجدانى
و ساحرانى و آسرانى
و كل ما فيكى يعجبنى
عشان إنتى .... طبيعية
جوة العيون
سحرك واخدنى للمدى
فى عنيكى بتسافر عيونى
و ليه بِترجع مُجهَدَة
و أنا أصلى متعود كتير
ع الهَدهَدة
ياللي هواكى يدور
ف جسمى مِ الفؤَاد
بين العروق و الأوردة
و صابنى السهم من بدرى
و قلبك لسة لم يدرى
و نظراتك سهام صايبة
قلوب بمحبتك دايبة
شوية رحمة يا عُمرى
صُبُرْت كتير و طال صبرى
ماليش فى العِشق لو هادى
و لو كل الكلام عادى
أنا الطوفان فى أشواقى
و أنا الرغبة اللي بتنادى
و أنا الطامح و أنا الجامح
و أنا اللي ف حبه ما يسامح
و لو هِدْيِّت مشاعرى ف يوم
هايفرح فِيَّا حُسَّادى
غيابك طال و لسة الأمس متفارقين
و حالى حال
و مش باصعب على اللايمين
بتفضحنى عيونى كتير
و كنت باظن سرى ف بير
لكن من صدق إحساسى
رسايل شوقى شالها الطير
و دقة قلبى مهما داريتها
برضة سامعها منى الغير
بتعزف لحن كله حنين
و حالى حال
و مش باصعب على اللايمين
عيونك شايفة كمّْ الحب ف عيونى
و قلبك حس كمّْ هوايا و جنونى
و بين إيدك و بين إيدى يدوب مترين
و مش قادر على لمسك بقالى سنين
عذابى و سلوتى قربك
و صوتك عشق للودنين
و أمد إيديا و أتردد
و كل شجاعتى تتبدد
و أخاف من قسوة اللايمين
بيجمعنا المكان أحيان
و أشوف فى عنيكى كل حنان
و نظرة غيرة م التانيين
و ألف سؤال فى نظرتهم
عيونى بسرعة جاوبتهم
بنظرة شوق غلافها حنين
و موش ساكتين
مابين همسة و لوم لايم
و نظرتهم فراش حايم
و حتى الحيطة ليها عنين
و لا يهمك يا روح قلبى
و لا تدارى و لا تخبى
مادام أرواحنا متفاهمين
عِشت السنين باستَعْطِفِك
مِش لاقى أوصاف تِوصِفك
و أنا اللي بين الخلق كان
بيبوح بعِشقُه و يِنْصِفِك
بتحسسينى ليه بإن
الذنب ذنبى لو باحِنْ
و بتقوليلى حاجات تِجِن
كإن حبى مْكِتِّفِك
و لا مرَّة واحدة تقَدَّرى
سامحينى مِش عايز أعرَفِك
و هاتِخسَرى
داريهم
أصل يبقى حرام
فِ قلب الناس تِشُكِّيهم
عيونك مدفعين رشاش
و خِلِص الشاش
و أنا للمولى باشكِيهم
و لو فِ الدنيا فيه إنصاف
و إذا قلبى قِدر ما يخاف
هاقَدِّم شكوِتى لقاضى
يقولِّك غُضى و إتغاضى
يا إمَّا بجد ..... داريهم
كل الحروف المضربة
عن نسج أتواب الكلام
بتقول حرام
ما يكونش كل كلامى مكتوبلك
و متفصل عشانك
موش كلام بقى و السلام
بعض الحروف واقفين على لساني
و ناويين ل إنتحار
و البعض رافض ل إنتظار
أما النقط ... طالبين فقط
تغيير مسار
يا يكونوا فوق العشق أو تحت المحبة
يا يبلغوا حالا فرار
كل الحروف عاشقين عشانك يغزلوا
أحلى الكلام
و يكونوا بعد الليل نهار
و لسانى عاجز عن محايلتهم
صحيح
صحيح
و الرمش غار
بيقوللي سيبك م الحروف
أنا نظرة مني بكل شعر الدنيا
و اﻷبيات كتار
كل الحروف المضربة
فارضين على لسانى الحصار
الدنيا من غيرك غيوم
و الثانية يوم
و القلب مليان بالهموم
باتفقدك فى الشاشة و نجوم السما
و أعمل ما بينى و بين خيالى ملحمة
و أستنى كلمة بأى شكل تردنى
لحياتى و أشهق عشق ليكى
و أنا اللي بافهم بالوما
و باشِم ريحتك ف الهدوم
و أستغيبك طيف فى الليالى
شاغِلِّى بالى
و برضه بيغيب ع المعاد.. طال البعاد
و أنا روحى حوالينك تحوم
ترجع تقولى خلاص
ما بتفكرش فيك، إرحم عنيك
و يرد قلبى بكل لوم
يمكن ظروفها ملعبكة
و الحجة للغايب معاه و الشوق يدوم
أرجوكى يوم لو تقدرى
بس لمشاعرى تقدرى
و تداوى لهفة قلب عاشق
فيه رموشك سهم راشق
نفسه يفرح بيكى يوم
دى الدنيا من غيرك غيوم
فِ عنيكى بابدأ رحلتى و مافيش رجوع
و لا لِيَّا صاحِب فى الطريق غير الدموع
و بتوعدينى و تِخْلفى و إن يوم واجِهْتِك تِحلفى
إنك ما شُفتى يوم هوى من أى نوع
يا عيون بحور الدنيا تصغر جنبها
يا ساكنة بعد الكون فِ آخر المُنتَهى
حِلمِك على قلبى العليل يا سلسبيل
دا المستحيل إنِّ العيون دى
نقول عليها عيون مَها
دنيا و عيونك كون و حُبك سَرْمَدى
مِدى إيديكى إوعِك فى يوم تِترَدِدى
سهمك و صاب قلب الصِحاب
أنا بس وحدى اللي تَجَرَّأ و إشهدى
هاتصدقينى لما أقول عاشق؟
و هواكى سهم و فى الفؤاد راشِق؟
و تحنى على قلبى اللي عاش ليكى
و لا الكلام وياكى مش فارق؟
على كل حال
أنا باعترف و خلاص
أصل القدر ولا منه أى مناص
و أنا قدرى أعانى الحظ فِ الدنيا
لأن قلبى إتعَوِّد الإخلاص
حبك سكن جوايا ما إخترتوش
و اللي ظهر على روحى منه رتوش
لا بانام ولا شايف بنات غيرك
على خط سيرك
خطاوى القلب ما بيهدوش
لو ده النصيب
أنا راضى بيه قانع
و لو هايملا القلب بمواجع
وجع حبيبى أكيد شِفا روحى
و تطيب جروحى
إذا بعد الغياب راجع
رقم غريب
ظاهر على شاشة موبايلى
روحت باصص من قريب
رنة حس القلب بيها
قُولت صوتها مش غريب
الجرس و بصوت صراحته
سبته لما قفل براحته
و قولت هيا ولا لأ
قام قلبى دق
روحت طالب و التساؤل كان مالينى
هيا ولا حد م اللي بيرازينى
و قولت أجازف
مِش هاقضى العمر خايف
و الألوه طلعت
و تاهت روحى فيها
كنت باسمعها و ناسى
إنى أرد ألوه عليها
صوتها يسحر أى ودن هاتسمعه
و اللي تاخده مستحيل هاترجَّعه
قلبى من أول مكالمة سبته عندك،
و المشاعر اللي ولِّدتيها فيا
ع البشر يتوزعوا
و الكلام خدنا وراح لبلاد كتير
و الحكاوى و الغناوى
و الأميرة و الأمير
و الحصان اللي ظهر بجناح و ريش
و الأسامى منورة فوق الأفيش
و السما زرقة و موج بحرك مهاود
و الألم لو راح يعاود
يستحى و يرفض يعيش
و المكالمة اللي إكتشفنا إنها
من طولها خلَّصت الرصيد
كان منانا من حلاوة طعمها
من تانى نبدأ من جديد
و إحنا من فرط الحنين
السلام ما لحقش ينشف
اللقا كان نفسه يعرف
المعاد آمته و فين؟
وحشتينى
ماهِش كلمة يادوب تنقال
دا إحساسى اللي ترجمته تكون بوصال
و همسة و لمسة و الديالوج بنظرة عين
و من طعم الوصال يبقى إفتراقنا مُحال
هاتلقينى الدفا من برد ليل طوبة
و هاتشوفى الغرام من قلبى أعجوبة
و هاتحسى بشيئ فى الحضن مِش عادى
كأنك قبلى ماعشقتيش ولا نوبة
ما أنا زيِّك من العِشق الصحيح محروم
ولا باسمع ف كل اللي مضى غير لوم
و أنا الدنيا ماهِش عندى سنين و أيام
أنا يكفينى منها الفرح لو كان يوم
فى حضنك بانسى هَمْ كتير
و رغم الآه بياخدنى الغرام و يطير
و عارفك زى ما أنا عارف تمام نفسى
كتاب مفتوح و حضن حرير
ما تستنيش ولا يهمك كلام الناس
و من خمر الهوى إسقينى و صُبى الكاس
أنا قبلك لا شوفت وصال و لا عِشته
كانت أيام بتِتقَضَّى ،، بلا إحساس
إحساس جديد
و حب حاسس بيه بيبرق من بعيد
باين على آخر المدى ... هايزيد و يملا الأوردة
و بالوصال يكبر ،،، يزيد
إحساس و طعمه مختلف
مع إنى مش خام فى الهوى ،،، أنا باعتِرِف
بس الجديد فى العشق وياكى أنا.. ضهرى إنحنى
و بقيت خبير فى كل أنواع الغرام
موش باتكِسِفْ
وياكى ماشى بدون كلام و لا أسئلة
كل اللى شوفته و كان ف غيرك مُعْضِلة
وياكى ما بقاش مُشكِلة
أنا بالتِمِسلِك ألف عُذر.. كأنى عِشت معاكى عُمر
صدق اللي قال الحب فعلاً بهدلة
و دا برضه كان إحساس جديد.. عِشقى الوليد
بيهِز كل كيان حياتى و دا الأكيد
خلانى رغم اللي جرى.. عايش سعيد
و أنا بعد خبرات السنين
باقول هواكى ،،، شيئ فريد
و كل يوم ويَّاه باعيش ....
إحساس جديد
مِشوار و مهما يبان بعيد
هانعَدِّى ليه، لو إيد بإيد
ما أنا لما بالمِس بشرتِك
إصرارى ع المشوار يزيد
و خشونتى ..
من لمسة نعومتك تبتدى
تقدر على كسر الحديد
و يا بشرتك متمغنطة
يا صوابعى أنا متسلطة
هاتموت على لمسك أكيد
ما تحاسبينيش على أى أعراض إنجذاب
أنا كلى داب
و قالولى ده مرضى الحميد
هانكمِّل المشوار سوا
أصل الدوا
نفضل تملىى الإيد ف إيد
هاتصدقى لو قولتلك
مرات كتير أنا بالمسك
زى العِيال
لاجل إنى أصدق إنى جنبك
و إنى عايش فى الحقيقة
و إن صورتك موش خيال
ما أنا أصْلِى خايف ف الحقيقة
إنى أعيد نفس السؤال
هو إنتى جنبى بجد؟
و لا دا إحتمال؟
ما أنا لما إيدى بتلمِسِك بافرح أوى
و باحس دايماً بالدَفا
لو حتى موش لابس هدوم
و أنسى الهموم
و باسيب لروحى كمان مجال
ما أنا أصلى موش قادر أصدق
إنك إنتى موش خيال
إنك حقيقة
و إن أنا واقع ف بحر من الجمال
مَدْ الإيدين عفوى و طفولى
و قولى عنه كيف تقولى
بس غايته يا دوب أحس
بملمسك بدل السؤال
