أنا و البنات
(1)
من ليلة من أيام زمان
مالهاش تاريخ و لا حتى متذكر مكان
لقيتنى واقف ع الببان
كل الشبابيك تنفتح
و الورد واخد لونه من قبل الأوان
بستان زهور حاضن فى نور
و الضحكة سحر و رنة الخلخال جنان
و القُصة قِصة و الرموش
يا قلبى حوش
هجمت وحوش
السحر تِئسِر بالحنان
و بقيت أنا وسط البنات غلبان
تبدأ حكاية و قبل حتى ما تنتهى
بتكون حكايات إبتدت
كل البنات مالهاش أمان
عاملين مساكين فى الهوى
و هن أصل المشكلة و المسألة
إزاى يكون الحب داء؟
و يكون كمان هو الدوا
و القسوة منهم و الحنان
و العقل بيخاوى الجنان
و العشق له منطق غريب
ما بيفهموش أجدع أديب
إلا الأريب
اللي بيفهم فى الحِسان
(2)
و أنا و البنات
من يومنا مالناش فى العتاب
عايشين كما الطير فى السما
مش فارقة أبداً
الله خَد أو الله جاب
العشق رزق و ربنا بيوزعه
مالوش فى علم الإقتصاد أو فى الحساب
و الجودة بالموجود فى دنيا العاشقين
برغم إنى فى الهوى
و لا يملا عينى إلا التراب
هو الطعام هو الشراب
هو اللي بيخلى الحياة سهلة
برغم جبال عذاب
العشق مكتوب فى الكتاب
بينى و بين كل البنات سر الإله
مجبول أنا ع الإنجذاب
فى القلب عاملينلى إلتهاب
و بيبدأ الجرح الجديد
قبل اللي قبله ما يبقى طاب
و الأشيا ماشية و هكذا
متعكزة
من بعد شعر الراس ما شاب
أنا و البنات
و حكاوى لسة فى الجراب
أنا الجانى
موافق إن أنا الجانى
و إنى الظالم القاسى
و إنى طاوعت وسواسى
فـ قولى لقلبك إنسانى
ما دمتى مصدقة الأوهام
و إنك كنتِ عايشة غرام
و قلبك ضَحَّى علشانى
حبيبتى إطَّمِنى جداً
أدان العشق لو يدن
أنا مش هاسمعه تانى
أنا الكافر بمعنى الحب
و موافق ... أنا الجانى
فَـ عيشى فـ دور ضحايايا
و إنسى الظلم ويايا
و دُقى ع البِبان يمكن
تلاقى حُب و رعاية
ظلمتك و إنتهى ظُلمى
و مِش نادِم على جُرمى
و كل الظُلم له نهاية
من القلب اللي كان بيتِك
يا ريتنى ما كُنت حبيتك
و لا كان اللُقا غاية
يا ريتنى فـ يوم أكون زيِّك
أكون فى الحُزن مِتشَيِّك
و عندى طبيعة نَسَّاية
باعرف أقول
(1)
أعرف أقول ...إنك طيوف
سافرت لما بعد المدى
و إنك صدى
طرق القلوب
فوق الببان المؤصدة
و إنك كما الروح اللي
سابحة فى البراح
و إنك تسابيح السديم
مالى المجرة بالسماح ....
وِرد إبتدى
(2)
و أعرف أقول
إنك تكاوين إنشطار العشق
لما بينبلج مرَّات
و إنك تسامى الذات
و إنك خيال النور
إذا وهجه إنفرد جناحات
(3)
و أعرف أقول كل الكلام
و أعرف أقول حتى السُكات
لكنى عاشق قولى فيكى
بلهجتى
و أحب أقول كل الكلام
بسجيتى
(4)
عاشقك أنا
و إنتى اللي قلبى يحبها
و خطفتى روحى
و خليتينى أسهر ما أنام
لمسة إيديكى
بتِغنى عن كل الكلام
و النظرة فى عيونك
قصايد شعر أحلى
من تسابيح السديم
أو من تسامى الذات
على شعور الأنام
باشعر براحة ف قربى منك
و الكلام يحلَوْ عنك
باعشقك بالرغم إنك .....
أبخل الناس بالكلام
لو ع الوَحْشَة واحشانى
فاجئتينى
و لو ع الوحشة؟ يووووووه واحشانى
واحشانى واحشانى
لما لآخر السطر الطويــــــــــــــــل جداً
و لو ع الشوق؟
بـ أبات محروق
من اللهفة اللي سارقة النوم
لحد الفجر ما بْيِدَّنْ
و أقوم ولهان ، ماسِسنى جنان
على الشبابيك أبص عليكى رغمى إنى
أكيد عارف ، ما كنَّاش يوم جيران أصلاً
ما تفتحينيش فى وصلة بوح
و شكوة حد بات مدبوح
و إنتِ مجنناه فعلاً
وحشتينى .... و بُعدك عنى على عينى
و باحلفلك
حروف منك فى ليلة برد تكفينى
تِدَفِّينى .... و لو مرة سألتينى
هاقول يارب ما تدوقى الفراق أبداً
وحشتينى
ماهِش أسواق
ماهِش أسواق
و لا موضة ولا أزواق
و لا لمعة عيون و زْواق
لكن أشواق
إذا ضاعِت باقول يا فُراق
و إذا قلبك بحبى ضاق
هاقول الأزمة مِش فيكى
أكيد الأزمة فى الأخلاق
لكن إوعى ف يوم تِنسى
بإنك كنتى تكحيلة
و كنتى الدمعة فِ الأحداق
و يمكن يصفى يوم نبعِك
و نتقابِل إذا ما راق
بنتمنَّى و نِستنَّى
و ربك بس له ما شاء
و دى قسمة و نصيب جايز
لكن فِعلاً
ماهِش أسواق
بُعْدِك
حرام
(1)
أحتار و أنا باختار
كلام
و أفرح بنظرات الملام
على حبى ليكى من البشر
و أحلِف و أقول حبك
قدر
حبك على صدرى الوسام
لا إنتى وطن رمل و
حجر
و لا إنتى نيل يروى
الشجر
و لا بيت كبير
و أنا أبقى ساكن و
السلام
لأ .... لأ حرام
(2)
دا إنتى الحنايا و
الآهات
و أنا باعشقك
زى الصبايا الفاتنات
يا فجرى يا أمسى اللي
فات
يا أحلى صورة ذكرايات
يا أمنيات
يا عِشق معجون بالغرام
بُعدِك حرام
حبة
أسئِلَة
أنا عندى حبة أسئلة
يا حبيبتى ليكى
بتحسى بيا
لما بابعت طيفى يطمن
عليكى؟
طب بتشوفينى
ف كل نسمة حنينة بتزور
عنيكى؟
ولا إذا نامت عيونك
فى المسا
ما بتلمحيش حارس أمين
سهران على بابك
عشان يهتم بيكى؟
أنا هِدْمِتك سترك
و سرك فى الحياة
أنا حتى ذرات الهوا
اللي بيدخلوا ويا
الشهيق
ما بيخرجوش مع أى
ضيق
الله ف سماه
أنا حتى قبل ما تحلمى
بالشيئ هاجيكى
بس إنتى عارفة قد
أيه
ملهوف عليكى؟
مِ
الأوِّلَة
زى ما باقول من زمان
،،، دى المُعْضِلة
محاصرٌ بالأسئلة
حتى الإجابة إن جات
على غير المراد
مش مشكلة،
لكنها برضو هاتخلق
أسئلة
أصل الهوى الناس بيعتبروه
حرام
إن جبت سيرته بيبدأوا
بالبسملة
و الحوقلة و الإستعاذة
من الشيطان
و ما تنتهيش البهدلة
و الناس عنيها مفنجلة
بس الفؤاد مفعم بطعم
الشوق أكيد
و القصة فيه متغلغلة
من حسنها طعم الكلام
طالع جميل
و إن يوم يقرب ينتهى
نرجع نقول ،،،، مِ
الأوِّلة
الطوفان
إلى شاعرة .....
مش لاقى كلمة أرد
بيها ع الطوفان
شلَّال حنان
و كلام يخلِّى الصمت
يصبح بغبغان
و العشق بيضفَّر كلامك
بالأمل
حتى الحروف من عشقها
طلبت كمان
عايزاني بعد الكلمتين
دول أفتكر أنا إسمى أيه؟
هايكون ده أصعبها
إمتحان
عاشق و لون العشق
باين ع الخدود
بس إوعى تستنى الردود
أبكم باكون
بعد أما باقرالك و
مغرم من زمان
بس أعذرينى حبتين
أنا لسة خام فى العشق
ما كتبتش ديوان
و إنتى الحروف عندك
عبيد و الشعر سِيد
فسيبينى أتهَجَّى
الهوى كده من بعيد
يكفينى أبص عليكى
من آخر الميدان
بتوحشينى
و إنت صورتك لسة مافارقتش
عينى
بتوحشينى ... و قبل
حتى ما تسيبينى
يبتدى يزداد حنينى
بتوحشينى قبل حتى
ما تلاقينى
حتى لما بتلمسينى
أقفل رموش العين عليكى
و برضه لسة بتوحشينى
ما بقيتش أشوف إلا
بعنيكى
و لا يحلى وقتى إلا
بيكى
و لا حتى أحس بإنى
عايش
إلا أما تلمسنى إيديكى
و لا أحب إسمى إلا
لما بتنادينى
بتوحشينى
الوقت بيمر بعذاب
و القلب داب
لو هاتلومينى على
حنينى
منك بيحلو العتاب
لما تلومينى
بتوحشينى
بقيتى جوه عيونى ضىّْ
و حب و الله ماله
زىّْ
عمرى الرمال و لقاكى
رىّْ
من صوت أنينى هاتسمعينى
و تعرفى إنى لسه حىّْ
و بتوحشينى
طيفك
(1)
طيفك ما بين
أحلامى لاح
عشمنى بالأفراح
وراح
و السهم صابنى و
إنتهيت
رمشك ملا قلبى
بجراح
***
(2)
أنا من زمان عايش
وحيد
و كنت فاهم إن
أنا
عايش سعيد
القلب كان بيدق
آه
بس مش دق الهوى
و أما غوى ... فى
حبك هوى
حسيت كأنى ...
غصب عنى
كأنى عايش من
جديد
***
(3)
قبلك حروفى كات
حروف
من غير حياة
ملغومة خوف
على ضفتين حبك
بكيت
على عمر فات من
غير ما أشوف
تايه حزين ... من
غيرحنين
بين الدروب عمال
أطوف
و معاكى إنتى و
فقط
قلبى عرف معنى
النقط
فوق الحروف
***
(4)
طيفك سنى ... و
إنتى و أنا
عرفنا أهه طعم
الهنا
ومن حبنا ...
بقينا ندعى ربنا
إنه يهنى كل عاشق
زيِّنا
كل القلوب الطيبة
يا مرحبا
على ذكرى حلوة
تضمنا
يوم فرحنا
ما أنكِرْشِي
(1)
صحيح باهواكى ما
انكرشى
و أبيع العمر علشانك
لكن نفسى مابتهونشى
و أعيش أستنى إحسانك
أسامحك آه
لكن قلبى ما يقدرشى
يكون مش مَلْوْ أحضانك
و مهما هواكى كان
برضه ما باقبلشى
....
.... يكون حبى
خبر فى طى كتمانك
ما تكتبينيش على
الهامش
ما تعتبريش هوانا
ف وضعِنا عايش
أنا ليا اللي
شاعر بيه
ماليش أبداً ف
حِلفانِك
(2)
أنا قلبى يعيش مكسور
يعيش مجروح لكن فى
النور
و لا يقبل يكون فى
نعيم
لكن مسجون و حواليه
سور
دا قوت الحب حرية
و عفوية
و لا ينفع يكون فى
الحب عبودية
و حتى الطير ما يبقاش
طير
و لو بيته قفص بنُّور
بيهرب منه مهما يكون
و يبنى من الحطب عشه
فى حضن النور
(3)
و لو مرة الفؤاد ميل
و ليل شعرك عليه ليل
ما عمره يوم هايتخيل
يكون حبك و حبى زور
و أنا الترياق لحرمانك
من
غير فروق
متشرَّباك روحى أنا
من غير ما أدوق
و باحِس بيك عمال
بتجرى
ف الخلايا و العروق
و بــ انام و أنا
ملهوف عليك
و أصبح بشوق
صوتك نغم باسرح معاه
على لحن دق القلب
ليك
يا عِشق شيك،
يا ريت يدوم إحساسى
بيك
و ياخدنى فوق
ما يشدينيش للأرض
و أنسى العِشق و المعشوق
و أصحى ،،، و أفوق
من أحلى حلم
كأنه على ليلى الشروق
و الدنيا سوق
متشرباك روحى أنا
و إنت و أنا
من غير فروق
خَافِى
خافى
........
و خلِّى الإنجذاب
خافى
و القلب فيه ناره
محتاجة لمطافى
مستعذبة التعذيب
و الوصل لِيه شافى
تلميح عيون بالهوى
فى العشق مش كافى
و إن جات حروف تعترف
بكلام حنين دافى
تهرب و ترسم نجمتين
ساعة ما أكون غافى
و أفوق على طعم الألم
فى الوهم خُطَّافى
يا أحلى من لون الندى
يا أغلى أصدافى
لؤلؤ عنيك لَمَّا
بَرَق
قلبى إنحرَق
مع إنه مِتعافى
أمانة بس بدون
زعل
من عشقى ما تخافى
البوح
جروح
(1)
مرَّات يكون البوح
جروح
أو ضغطة ع الجرح اللي
بات مفتوح
وبرغم ألمى مافيش
دموع سالت
و الخلق قالت ..
لو يشح الدمع، أصعب
نوح
و أنا هاعمل أيه مع
قِلة الحيلة؟
ساعة ما أشوف وجهك
مِنَدِّى صبوح
بانسى المحاذير كلها
و الدنيا لومها و
غِلَّها
ريحة الغرام من كل
كلمة تفوح
و أرجع و أقول بعد
الأوان
كالعادة كان
البوح معاكى جروح
(2)
رمشِك جرحنى
و سابنى دمي يسيل
و أنا صبرى على بُعد
الأحبة ..
قليل
عارف طريقك بس ليه
قلبى
محتاج عشان يوصل إليكِي
دليل؟
يمكن تكون
رهبة هوى صادق
يمكن يكون علشان بيتسابِق
يمكن يكون ....
يمكن يكون
أصل الزمان وَيَّا
اللي حَبُّوا بخيل
و أنا أصل حبى بيبتِدى
..
و ما بينتهيش
و مالوش فى طهرُه
مثيل
و خداعى ليكى صدقينى
مستحيل
غيرِك
ماليش سِيرة
أنا غيرك ماليش سيرة
و عايش دنيتى ف حيرة
و قسوة قلبك الناسى
بيتلذذ بإحساسى
بنار الوجد و الغيرة
و مش عارف باحبك ليه
ولا ايه فات و هابكى
عليه
نصيبى معاكى م الأول
عذاب مع سهد بيطَوِّلْ
و ليل بيطول و فكرى
ماليه
يا نتصارح و نتصالح
مع روحنا
و ننسى عذابنا و جروحنا
و نبدأ فى الهوى قصة
يزيد الشوق و يتوصى
يغنى العاشقين بوحنا
يا نتفارق بلا لوعة
بلا آهة و لا دمعة
يادوب هانشوفه حب
و راح
و فات فى القلب باقى
جراح
نقيد فى الذكرى كام
شمعة
بلا حيرة
عادى
بقى العادى إني أدوب
فيكى
و أشوف روحى بتتمايل
على لحنك
أمني النفس بالفرحة
و بالطرحة
و بالآمال طيور سارحة
بقى العادى
إني لما عيونى بتغمض
تشوف صورتك ساعات
أوضح
و لو حتى باكون مهموم
علي سيرتك أكيد بافرح
بقي العادى إن كل
الناس
تلاحظنى و تربط بين
وجودك و إنتشاء الروح
و بين غيبتك
و بين قلبى اللي بان مجروح
بقى العادى
إني باضحك لما أجيب سيرتك
و باحزن لما أشوف
غيرتك
و أشوف ع الوش تكشيرتك
بقى العادى إني أدوب
فيكى
و أجمل جايزة فى الدنيا
إنى أقدر بس أرضيكي
فوق العادى
و أتواضع ... و
أقول عادى
ملهوف
عليكى
كل يوم بيزيد بشوفتك لهفى ليكى
و الطريق اللي إترسم ف بحور عنيكى
قد ما بيهدينى بيتوهنى تاني
و الكلام فى حروفه بتضيع المعاني
و أبقى شايفك و العنين هاتموت عليكى
الوصال وياكى ما يطفيش حنين
و الحنين بيكحل الشوق فى العنين
و العنين شايفاكى بحر من البراح
و البراح و ﻻ مرة بيساعى الحنين
بس قربك زى فرحة للحزين
عمرها ما بتكتمل غير بين إديكى
كل يوم بيزيد بشوفتك لهفى ليكى
أصعب الحرمان من الحاجة ف وجودها
تقطف إنت الشوك و غيرك
ييجى يتهنى بورودها
تبقي قدامك و نفسك
مرة حتى تمس عودها .. تبوس خدودها
و الدوافع كلها بتقولك إنت
مد إيدك يوم و خدها
حطم السور القزاز .. كسَّر قيودها
و إنتى صايبانى السهام من نور عنيكى
كل يوم بيزيد بشوفتك لهفي ليكى
أيوة عاشِق
بيسألونى ...
هو كل الشعر ده عن تجربة؟
يعنى عاشق؟ ...
و أبقى حاير لسة بين الأجوبة
و أبقى نفسى أدارى عشقى من الفضول
و أبقى نفسى أعلن غرامى أكيد و أقول
بس تفضحنى العيون و الشعر يملا المكتبة
و الحكاية موش حكاية موهبة
أيوة عاشق ... و الحنين ما بيداراش
و الوله جوه العنين عامل فلاش
و اللي بيدارى الغرام .. بيروح بلاش
و الله ما بتنفع معاه الأحجبة
كل حرف أنا باكتبه نابض بحبى
ليه هادارى؟ ليه هاحاول بس أخبى؟
اللي جاى أنا ماعرفوش
و اللي حاصل راضى بيه
أنا أصلى راضى بحكم ربى
إعتراضى موش هايلغى الأنصبة
أيوة كل الشعر ده عن تجربة
أيوة عاشق
أصل أصل العشق من ربك .. هبة
و لا حد زَيِّك فِ الكلام
(1)
و لا حد مس القلب زيِّك بالكلام
و لا بالحنين
و لا بالأنين ولا بالسهام
و لا حد خلانى أراجع طيف هوايا
و لا كل مرة أتفقده
جوة المرايا
و لما يوم باستغيِّبه ،،،
باقول على الدنيا السلام
(2)
بينى و بينك
حاجة أكبر مِ الحروف
يمكن قدر، يمكن نصيب، ،،،
يمكن دَوَا و موصوف
بينى و بينك إنسجام كامل
طيفِك عامِلِّى إجتياح شامل
و الحرف عندك
ليه بيبقى عطوف؟
بينى و بينك
حاجة أكبر مِ الحروف
حاجة أكبر مِ الهِجاء
أو مِ العلام
و لا حد مس القلب زيِّك
بالكلام
(3)
نظرة عنيكى
كتاب قصص أساطير
توصل لقلبى بالاقى روحى تطير
و لا إبتسامتك
لما بتصالحى الزمن بيها
روضة أمل سحرك بيرويها
لو حد شافها بالاقى نفسى باغير
مهما تقوليلى إن اللي بيننا
بيتنقش ع الصخر
و أى حد حكايته بالطباشير
العشق غايتى و قربك إنتى مرام
و لا حد مس القلب زيِّك بالكلام
لسة
ما بطَّلش دق
بعد السنين دى و قلبى ما بطَّلش دق!!
لسة بيشوفك حبيبته
و لسة بيشوفك أرق
لسة بيحس بمشاعر طاغية لو تتكلِّمى
و يْمِد قلبه ف كفُّه لو هاتسلِّمى
و على الجبين اللهفة تِملاه بالعَرَق
و كمان حروفى بتبقى ليه ناسية الكلام؟
و تعيد عليا كل حرف نطقتى بيه
ساعة ما أنام
طب مش حرام؟ أسهر أنا كل الليالى
أحتار فى حيرتى و إنشغالى
و قلب باعنى و إشتراكى
و قال على الدنيا السلام
قلبى اللي بالشوق إنحرَق
شافِك بَرَقْ
قلبى اللي بعد العمر ده ...
و لسة ما بطَّلش دق
كل
حاجة
أنا ليه باحِس إن الحياة
من غير عيونك ناقصة حاجة؟
و ليه باحس بإن قُربك
كل حاجة؟
و إن كل الدنيا حاجة .....
و إنتِ حاجة؟
و إن حتى الشعر
مهما يقول فى حبك
يبقى لسة ما قالش حاجة؟
إنتى عندى الكون بحاله
و إنتى ليا كل حاجة
مش هاشوفِك ليه؟
مش هاشوفك؟
طب مش هاشوفك ليه؟
و لقاكِ عينى بقت بتشتاق ليه
قاسية الحياة ف ظلمها
و دا شيئ سنينى عودتنى عليه
و أنا هاعمل أيه؟
أنا روحى طايرة فوق سماكى طير
و القلب عندك دَقُه خطوة سير
و حياتى بيكى طعمها بقى غير
تاقلانه ليه؟
بصى ف عيونى و ترجمى النظرات
فيهم سعادة و فيها برضه آهات
سهرانة عينى تراقب النجمات
بتناجى طيفك ع الهوى توصيه
حنى عليه
الشوق
غايات
(1)
ما أعرفش أخبى الشوق
ف قلبى
و أعيش على شَطِّك
و حيد
كان نفسى أقول ،،
لو موش هانول
ما أقعدش أشاوِر من
بعيد
يا نار و نور ،، يا
أعلى سور
عاشقِك أنا و أيه
الجديد؟
بيكلمونى و يحسدوا
صورتك ف عينى
كل الصحاب اللي صِعِب
على قلبهم حالى ....
يا عينى
لأ طيبين ،، و حنينين
مِش مُدرِكين ،، حجم
الأنين
فى قلب داب بينك و
بينى
دول موهومين
(2)
الشوق غايات ، و أمنيات
و ساعات نايات
تِعزف حزين اللحن
تصرُخ ف السُكات
و أنا من هِنا
من عند آخر مرة شُفتك
من سنة
موش طالبة منك إلا
بعض الذكريات
عمرى اللي فات
ضحكة سعادة بصمت نطقِت
جُوة شات
ما تخلينيش أندم على
صوت جلجلة صَحَّى
المشاعِر من سُبات
و طرَح آهات
أنا حُبى مولود للنهار،
مالهوش قرار
باتمنى تُبدُر قمحُه
و نعيش فى الخَضَار
محتاجة أبوح، دا الحب
روح
كائن مُناه يِكبَر
و يفرح بإنتصار
أنا
باعشقك
أنا باعشقك
مهما الزمن عاند معايا
و فرقتنا بلاد سنين،
برضه عايش فى الحنين
بالمحك علي شط بحر العمر مينا
و الحياة أصلا سفينة
و رحلتى طالت ما بين الضفتين
و السؤال بيلح دايماً
و اﻹجابة بيتجي ﻻزماً
باللي مكتوب ع الجبين
غربتنى الدنيا فيها
و الحياة ل اللي يجافيها
طوع و مكتوفة اﻹيدين
و إنت يا أجمل بلاد الكون
ف دنيتنا العنين
فيكى بنشوفوا الجمال
و نمارسوا عشق لكن حلال
و بنشربوا البحر بنهم و نكونوا لسة عطشانين
انا باعشقك .. و نويت أطفى الشوق وصال
بس السؤال ... أبدأ منين؟
علامة
إستفهام
و تانى عنيكى
فيها علامة إستفهام
و شك كبير
و مبنى أكيد على أوهام
و أنا ف حبك كتاب مفتوح
و ف عيونى الهوى مفضوح
و لا محتاج أدارى شعورى و لا عايز
و باكتب بالدموع شعرى و أقول جايز
تحسى بصدق إحساسى يا روح الروح
و مهما القلب عاش ف آلام
بيئلمنى أشوف ف عيونك الحلوين
ف مرة علامة إستفهام
كفــــــايَة
و كفاية بس أحس بوجودك
و إنك موش سالينى
و أيه هايسعدنى ف عمرى
غير إن قلبك يبقى عارف
إن نفسك ف الحياة نبض العروق
و رؤاك بتبقى ضى عينى
و إن أجمل حاجة ف الدنيا إبتسامتك
و الهَنا إنى أبقى عارف
إن فكرك موش ناسينى
كفاية طلَّة من بعيد و كفاية همسة
كفاية لما تِهِف على بالى يا غالى
باحس بكفوفك بتمسح دمع عينى
...
زى ما قال كده حد لحد يحبه بجد
إعتراض
موش هاغيَّر نظْرِة العين
اللي مالية كيانى لهفة
و أعترفلك بالمودة و الحنان كدة بالمخالفة
قلبى نبضه ماهوش مشاعر حلوة بس
قلب عاشق عُمر عشقه ف يوم ما خَس
قلبى من أول ما شافك
بيكى إنتى ف لحظة حس
و عمره بعد ما داق حلاوة
نبعك اللي تملى يصْفَى
عُمره من حُبك ما يكْفىَ
و إن طلبتى منه يبعد،
مستحيل يقبل و يِخْفَى
سامحى عينى إن خالفت الأمر الأميرى
و سامحى رجلى إن مرة عكَسِت خط سيرى
و سامحى ودنى إن مرة طاوعت حد غيرى
طاوعت القلب اللي شارى
و اللي مجبول ع المناكفة
موش هاغَيَّر .. نظرة العين اللي مالية كيانى
لَهْفَة
الوِد
بِيِتْجَدِّد
إوعى ف أحلامَك تِتْشَدِّدْ،
صحصح بدَنَك قوم و إتمدِّد
و يا نور الشمس اللي بدونه
الكون مِ البرد هايتجمد
و يا فرح العمر اللي على إيديه
الباقى يحاول يتسَنِّد
و حياة ربَّك
مين أبدع صنعك يوم و بناك
و برحمة و نور من تحت العرش
حاباك و سقاك
أنا قلبى إتعلق بيك آية
و ماهيش غاية
و يوماتى الود بيتجدد
...
زى ما قال واحد بيقر بنعم الله
شُوفى
أمَّا أقولك
شوفى أمَّا أقولِّك
بالصريح من غير غباوة الأسئلة
مغرم أنا كده بيكى كُلِّك
و أبقى باكذب لو ف مرة قولتلك
شرطة عنين، أو عود و خَدْ
و نار ف قَدْ و شكل وردك ولا فُلِّكْ
باعشقك ماعرفش ليه
و هاموت عليكى و هاتخرس
لو تسألينى اللي عاجبك فيَّا أيه؟
من غير سبب
و إجابتى هاتكون بإختصار
قلبك يدِلِّكْ
راضى قربك راضى بعدك
راضى تعذيبى ف هواكى
و لو يبان للكل شكلى أنا راضى ذُلِّكْ
بُصى أما أقولِّكْ
باعشقك من غير فصال
و شاريكى كُلِّكْ
بــــــداية
غربينى سنين
فى عشق مالوش نهاية
و ودعينى و عارفة إنك
برضو هاتكونى النهاية
و إن نظرة عينك الآسرة
اللي رامية شباك حريرهم
ع البدن .... كانت بداية
و إن صدف مرة و رأيتك ف الموانى
وصى قلبى عليا أنا
ما توصيهوش أبداً عليكى
ما إنتى عارفة إن إنتى غاية
غربينى سنين ف عشق بيبتدى
و أنا لو فردت شراع أمل
و ركبت مركب صبر قدر المُحتمل
هامشى ف طريق مالهوش نهاية
غربينى و علَّقى ف الشعر وردة
و إبقى بس إتذكرينى
لو لمحتيها ف شعرك ف المراية
دستـة
تراتيل
(1)
خبينى ف جرابك كأني موش جدَع
و إرميني ع الرمل بدلالك ف الوَدَع
أنا خط فى الكف اللي مفتوح بتشوفيه
إقرى اللي مكتوبلك معايا بدون وَجَع
بتعذبي قلبى اللي حبك
ناسية ليه إن اللي يِوْجَع ...
جايلُه يوم و ها يِتْوَجَع
(2)
ما تعاتبينيش .. على حرف أجرأ من لسانى
ف لحظة أعلن إنه عاصى
و إنه موش راضى بهوانى
و إنه قرر ينتحر
و يقول لنور الشمس عاشقك
و إن ف مرة خيرونى إنى أنتحر
أو بس أعيش صمتاً
هاموت ف الحب تانى
أعمل أيه ... عاشق أنانى
(3)
ما باعرفش أوصف الإحساس
ساعة ما أغرق فى بحر عنيك
و لو ف الصورة بالقانى
حروفى موش مطاوعانى
كأنى أبكم .. يشاور ل اللي موش شايفين
و أصلا مهما قُلت أنا فيك .. قليلة عليك
حروفى لو هايجمعهم نغم شرقى
و حسن عنيك هنا مَرْأى
و عاجز حرفى يوصف فيك
(4)
ضحكة عنيك ...
هلة نعيم الدنيا من بعد العذاب
لمسة إيديك ... طوق النجاة لغريق
فى بحر من السراب
و العمر كله يفوت و أنا باسأل و مستنى الجواب
و النظرة من عينك فرح و الغمضة برموشك عتاب
أنا بس باترجى اللقا حِنى على العاشق بقى
ينوبك ثواب
(5)
عارفانى عمرى ما أحب أستجدى الغرام
و ﻻ بارضى ف الحب الوصال، كده و السلام
انا باعشق العشق اللي بيهز البدن
و بادوب ف قوة حب بترج الكيان
و باموت ف معنى تقوله نظرة
ما يوصفوش ابلغ كلام
(6)
طب ما إنت عارفة
قد أيه، باعشق وجودك ف الجوار
و باحس بالشمس اللي
حاسة بالخجل دايما .... تحاول اﻹنتحار
و النور بيتوارى فى ضلك، لما ضيك يبقى ليه
عز النهار
طب ما إنت عارفة قد أيه
و كمان زمانك لسة مش واخدة القرار
أنا قلبي هايم بيكى فى كل الزمن
و لو التمن ... قلبى اللي مجنون بيكى داب
أهون عذاب .. و أعيش فى دنيا العشق جار
طب ما إنت عارفة إنك سمايا
و إنى موش ناسي المدار
(7)
عارفة إنى لما باحب أشوفك باعمل أيه
باقفل جفونى و أضم صورتك ع المدى
و أحضن خيالك طيف و باشعر باﻷمان
يمكن جنان ... ساكن كيانى
او هيام بيكى إبتدى
(8)
و كات لمَّـــا تِمِدْ إيدِيها بالحِنَّـــة
أقول لوْ بَسْ فى سلامها تِزِيد سِنَّـــة
و لو غابت و طال شوقى
تصيب العقل بالجِنَّة
و لو من ألف مِيل نادِت
أنا باسمع نغم مسحور كأن اللحن مِ الجَنَّـــة
(9)
و نور سابح ف بحر النور
مالوش ضفة و لا شاطئ
و لا له دفة، أو حتى إتجاه خاطئ
و جنة ضيُّه مالهاش سور
و يا ماحلاها جزر العشق
لما تكون ف وسط بحور
(10)
أصلا لقايا معاك خيال ...
و سعادة فوق اﻹحتمال
و أنا قلبي أضعف من كده ...و
مافيش مجال
و رضيت و قانع بالفضا و الفضفضة و يادوب سؤال
و باشوف بأن الروح
مع الروح ف السما عايشين وصال ...
ماهو أصل سجن الروح .. محال
(11)
و بدون يمين
قسماً وجودك ف الحياة نبض ف عروق
من غير ما أقول إنك ف أحلامى مُنى
و لا حتى أصرَّح ....... إنِّك المعشوق
(12)
و كفاية نبضِك ف الحياة يبدر أمل
و كفاية إن الفرح بيكى بيُكتَمَل
و كفاية من غير أى همسة
أى لمسة ...القلب من حبك ثَمَل
و الوجد و الإحساس بشوق
يوم بعد يوم .. لا يُحتَمَل
