أنا عندى حبة أسئلة
يا حبيبتى ليكى
بتحسى بيا لما بابعت طيفى يطمن عليكى؟
طب بتشوفينى ف كل نسمة حنينة بتزور عنيكى؟
ولا إذا نامت عيونك فى المسا
ما بتلمحيش حارس أمين
سهران على بابك عشان يهتم بيكى؟
أنا هدمتك سترك و سرك فى الحياة
أنا حتى ذرات الهوا اللي بيدخلوا ويا الشهيق
ما بيخرجوش مع أى ضيقه
الله ف سماه
أنا حتى قبل ما تحلمى بالشيئ هاجيكى
بس إنتى عارفة قد أيه ملهوف عليكى؟
حبك غابات و أنا حبى
كان فيكى المطر
و برغم روعتها الغابات برضه خطر
فيها جمال و طبيعة تخطف أى عين
بس اللي راح فيها إنشطَر
و أنا كنت واقف ع الحدود قلبى إنفطر
نفسى إنى أدخل قلبها و كأنى عصفور ع الشجر
أنا هاعمل أيه ،،،، قلبك خطر
ماتصدقيش لو قلتك
مرة إن حُبك هان
و لا إن شوقى و لهفتى حطمهم النسيان
و لا إن حبك قَلْ بمرور الزمان
ولا عاش لسانى إن قال ف يوم ولا كان
حبك قدر
حابب أعيشه برغم مر مافيه
و هاكون سفيه
لو قُلت كان ياما كان
و إن قالوا عن حبك خطر
أنا لسة شايفه أمان
و أرجع و أقول ما تصدقيش
لو قلتلك مرة إن حبك هان
يمين بالله
دى ضحكة ف وشى من وشِك برزق سنين
و أقول باهواكى و لا باسمع لــــ لوم لايمين
و يكفينى يا ست الحسن إن إنتى
كــــ تأشيرة دخولى لدنية العاشقين
و باحلِفلِك بصدق العشق
ولا ليكى عليا يمين
قبلك حروفى كات حروف
من غير حياة ملغومة خوف
على ضفتين حبك بكيت
على عمر فات من غير ما أشوف
تايه حزين ... من غيرحنين
بين الدروب عمال أطوف
و معاكى إنتى و فقط
قلبى عرف معنى النقط
فوق الحروف
فِ عنيكى بابدأ رحلتى
و مافيش رجوع
و لا لِيَّا صاحِب فى الطريق غير الدموع
و بتوعدينى و تِخْلفى
و إن يوم واجِهْتِك تِحلفى
إنك ما شُفتى يوم هوى من أى نوع
يا عيون بحور الدنيا تصغر جنبها
يا ساكنة بعد الكون فِ آخر المُنتَهى
حِلمِك على قلبى العليل
يا سلسبيل دا المستحيل
إنِّ العيون دى نقول عليها عيون مَها
دنيا و عيونك كون و حُبك سَرْمَدى
مِدى إيديكى إوعِك فى يوم تِترَدِدى
سهمك و صاب
قلب الصِحاب
أنا بس وحدى اللي تَجَرَّأ و إشهدى
يمكن بتبهرنى البنات
بس إنتى لأ
علشان باشوفك وسطهم
دايماً أرَقْ
أنا فيكى عاجز أوصِفك
و سألت قالوا
يابنى دا دَهْ طبع اللي فيه سهم إترشَق
طب و عَشَق
و إن قلت شعر ف حد غيرك
ألقى نفسى أستخسره
و أقول لروحى إنك أحَقْ
طب هاعمل أيه
و أنا قلبى دَق
لسة صوتك
لما ودنى بتسمعه بتتهز ليه،
أيوة لسة باعشقة و باحِن ليه،
مِش بخاطرى أعمل أيه،
رغم إنى عارف إن طريقى أصعب،
حتى يمكن مستحيل،
بس صوتك لسة ودنى بتشتهيه
خطوتك، صوت مشيتك،
كعب رجلك ع البُساط،
حاجة بتخلينى آخر إنبساط
بابقى بينى و بينى حالف إنى أتوب،
مستحيل يفضل هوايا من الذنوب،
و ألقى روحى إتلهفت لعبير مرورك،
و أبقى نفسى أبعت عيونى
يادوب تزورك،
تستحمى من جمالك،
تغتسل من نهر نورك،
أعمل أيه؟
الهوى اللى عشت عُمرى أعرفه
يطلع خيال
و الهوى اللى سكن ف روحى
صحَّى آهاتى و جروحى
يبقى ليه صعب المنال؟
يعنى هافضل عمرى كله
بدون إجابة على السؤال!
و إن هزمت المستحيل، يطلع محال
قلبى بيدق بخطاكى بيعشقك
بقى حالى حال
لما تبقى وحيد فى حُزنك
و الفرح دايماً مشاع
و أما همك يبقى وزنك و الأسى ملو الشراع
على فين مركب حياتك ترسى غير شط الضياع؟
دفتى مش ملك إيدى لما موج البحر هاج
و القلوع زى الضلوع ضَامَّة قلب ملان صِراع
الغلط بقى هو صح ... اللى إشترى زى اللى باع
و اللى نام زى اللى قام و اللى قال الحق جاع
عندها لازم تفكر لما عقلك ينبسط آخر مزاج
تسوى آيه الدنيا دية مهما زاد طولها إتساع؟
آخرة المشوار هانرحل زى غيرنا بدون وداع
مش هايبقى إلا ذكرى وصفها حسب الطباع
يا إمَّا تبقى ذكرى حلوة
يا إمَّا تبقى بيت زجاج
يطول بُعدَك ... يا
طول صَبرى
و من حُبَك ... أعِد الثانية من عُمرى
و شوقى لما يِغلِبنى ... عليك أجرى
و ألاقى سلوتى فى قربك ... و سحر عنيك
ولا باعرف ف يوم نسيان ... ولا نُكران
و لو طال الغياب مسافات
أقول مَرَّة .... و أصَبَّر نَفْسى بالجايات
و
لَهَفى عليك
يخلينى عليك أجرى
***
يا قسوة قلبك الناسى
...
بيسقينى مرار كاسى
...
و لا باخْطُر على بالك
بكلمة ف لوعتى تواسى
و هُنت عليك
و بحر هواك بلا شطآن
و لا مرَاسى
و موجه العاتى كان قاسى
نَدَهْت عليك
و لا سْمِعت النِدا منى
و لا لبيت ... و هُنت عليك
و أيه يعنى
...
غريق من جملة العشاق
و كان باين عليه مشتاق
و سبته يكابد الأشواق
يا قسوة قلبك القاسى
و هُنت عليك
و بعد دا كله مش باملك
سوى الغفران
...
م أنا قلبى زرعته حنان
***
يا خوفى عليك
ماهى الدنيا كدة دايرة
و كورة بين إيدين حايرة
دا يُحضنها و دا يحدِفها
و يرميها بقسوة لفوق
و ياما كتير تبات داين
و تصبح ف الهوى مديون
و بتعدى ... و كله يهون
سوى الظالم قلوب الناس
أو اللى يخون
مصيره ف يوم يبات محروق
بنار ياما حرق بيها
قلوب تانيين
و فاتهم ف الهوى تايهين
صحيح مساكين
***
مصيرك يوم
تقاسى لوعتى مرة
و تشعر بالحياة مُرة
و تتقلب ف ليل الشوق
و تشرب م الهوى و تدوق
ماهى دنيا و مش بتدوم
و لا تفضل بحالها يوم
و آه من قسوة اللوعة
و آه من آهة المظلوم
و هايصادف ف عُمرك يوم
ولما تحس نبض الحب ف عروقك
و ليل سهران على شوقك
و جمر اللهفة من تحتك
و من فوقك
أنا هابقى لهواك مَرْسَى
و لا هاجرح و لا ها اقسى
ما انا قلبى ملان غفران
أنا قلبى زرعته حنان
لما شوفتِك ...
الكلام عندى إختلفْ
و الحروف بدأت تعانى إتلخبطت فيها المعانى
و الدقايق و الثوانى، وِقفوا صَفْ
و الحروف على كُترها فقدت جمالها و سِحرها
مابقيتش راضى بأى حَرفْ
طب أيه وظيفة الكلام بعد التحية و السلام
غير إنه يبقى رسول بيحمل ليكى وصف
و
لو هايعْجَز؟
يبقى يهرب من كسوفه يختفى مش عايز أشوفه
هاخترع بدال حروفه ألف حرف
نظرتك لما تشوفينى
تقول كلام
عنيكى بترد السلام
كل لفتة تقوللى حاسة بالغرام
دوِّبوا قلبى اللى بيقولك حرام
إرحمى القلب اللى بعنيكى إنشغل
كل حاجة فيكى بتقوللى حصل
و الخدود الوردى يكسيها الخجل
تدى
قلبى ف الهوى ألفين أمل
ما تلاوعينيش .... ما تجاوبينيش
بس إوعى تسرقى منى الأمل
خلينى أعيش
و لو دا حلم سيبينى فيه
ما تصحينيش
سيبينى عايش فى الخيال
مهما ليل الحلم طال
أصلى لحظة أعيشها من غيرك
محال
و ما تساويش
ما تلاوعينيش ... ما تجاوبينيش
بس إوعى مرة تسرقى منى الأمل
خلينى أعيش
نظرة من عينك إجابة
أقوى من كل الكتابة
أخاف لا تكونى كدابة
و الألم ما ينتهيش
ما تلاوعينيش
تعرفى؟
أنا كان ناقصنى إنى أعرفِك
ما كانش كافى إنى
أعيش ع البعد بس أستلطفِك
و أستظرفِك
أنا كان ناقصنى إنى أعرفِك
و أعرف حاجات
عن
صنف تانى من البنات
قُدَّامها بيموت السُكات
أنا كان شوية و هاخطَفِك
هاموت عليكى
و نفسى رافضة إنى ف يوم أستعطفِك
و بكل صدق
أنا كان ناقصنى إنى أعرفِك
حوار أزلى
مابين قلبك و بين عقلك
يقول العقل يا قلبى على مهلك
مافيش مرة مشينا وراك و غامِرنا
و إلا وحَلتِنا ف مَهْلَك
ما بِتفَكَّرش يا قلبى
خلاص مَلِّينا من جَهلَك
بتِجرى
زى طفل بريئ
إذا ضحكاية تِندَهْلَك
صعيب سَهلَك
يقول القلب هاشرَحلَك
هاتعمل أيه بدون دقاتى يا غلبان؟
أنا أصلَك
و أنا الهادى فى ليل العُمر و المَسلَك
أنا الإحساس و موش إنتَ
و أنا اللي ف إيدى أسمَحلَك
و أعيش الحب بسذاجة
و لمَّا بـ اعُكْ باندَهلَك
و إنت يادوب بتِحسِبها
و تِتمَخْوِل فى ترتيبها
و بتسِيبها
و بتقوللى ده مِش شُغلَك
ما تِعمِلِّيش رزين و إسكت
و بالراحة و على مهلَك
طول عمرى باحلم بيكى
شط الموج بيتهادى عليه،
يمسح دموع اللى بكى، يسمع شِكاية اللى إشتكى،
و ف عِز حر الصيف يضَلِّل ع الغريب و يْحِس بيه
يفرد دراعه يضم كل الوافدين
و يوزع الضحكات على كل البشر
نهارُه
مليان بالمَرَح، وقت الغروب يِعمل فَرَح
و ف ليله بيضوى الفنار بشموع بتهدى الحيرانين
تفرح عيونها أما تلاقيه
طول عمرى شايفِك ع المدى حلمى البعيد
بُكره السعيد
اللى الليالى بتِبعِده و أنا برضه مُقتَنع إنى رايح
ليه أكيد
يا ضوء فى آخر سكتى العَتمة
يا خلاصى من غُمة على الصدور كاتمة
يا فجر عيد ضحكة وليد
صوت شقشقة من عصفورين على شجرة ف جنينة لأجمل بيت
جديد
طول عمرى شايفك جايزة المشوار
و حاجة روحى لاجلها فاضت فروعها خَضار
و نسيت قساوة غربتى على غباوة صحبتى
و عذابى ليل و نهار
طول عمرى شايفك جنة و طريقى إليكى سراط
و أنا كل ذنبى إنى منايا تكونى إنتى الدار
ما باشوفش غيرك فى الشبابيك و الدروب
و إنتى الشروق و الباقى كله غروب
طول عمرى شايفك قصر له أسوار
طول عمرى موش شايفك فتاة يعشقها شب
و لا نصيب زى القدر فوق الجبين ينكَتَبْ
و لا فرصة زى اليانصيب حاجة كدة و تنكَسَب
شايفك حكاية م الليالى الألف، لكن حكاية فيها عجب
العجب
إنتى الأميرة اللى عيونها نجمتين بس القمر دايماً
بيخجل من جبينها
و الليالى تبقى باهتة جنب شلال شعرها
و نجوم سماها مرصعة الفستان على خيوط الدهب
أما أنا فارس يادوب بيسوقه حظه يشوف جمالك
يلقى سيفه اللى ف إيديه أصبح خشب
حتى كل سلاح ف إيده عندك إنتى بْيِتْسَلَب
و إنتى من رقة مشاعرك ترمى وردة ترد روحه
ضحكة بتطبب جروحه و كلمة بتخليه أمير رغم التعب
أما وعدك ليه دى حاجة مِ الخيال
حاجة تخلق منه فارس لا يدانيه أى فارس
حاجة بتخليه بيوهب عمره ليكى و روحه يدفعها و يبقى
ليكى حارس
حتى عمره اللى مضى ما بيتحَسَب
أنا لسة باحلم بيكى و الأحلام عزيزة و إنتى تحقيق
الآمال
و إحنا عايشين الزمان اللى الليالى فيه وجيزة، حتى
إن الحلم فيها مِ الخيال
و الأمانى مستحيلة و و الهموم زى الجبال
بس أنا ماقدرش أعيش من غير ما أفكر فيكى نور جاى من
بعيد
و حلم يتحقق برغم إن الزمن قال دا المحال، عمر مافى
حد زيى طلب و نال
يا إبتسامة شاقة يأس الناس بتروى العطشانين و إجابة
على مليون سؤال
يا أمل فتح الببان المقفولين و لمس جروح المجروحين
و طرح عيال
أصفى من نور القمر و أحن من رقة نسيم البحر أطرى مِ
الظلال
أنا لسة باحلم بيكى يا قبلة فؤادى و مقصدى و يا
خمرى الحلال
و باحلم بيكى فرحة ترش ع الأيام أمل
و باحلم بيكى أوبريت للحياة مسيره يوم راح يكتمل
يا أحلى بوح يا اللى عنيكى بتعتِرِف
زى إعترافات الربيع على غصون الشجر أوراق و بوحه
صار زهور
يا فجر نور يا كاس يدور و أنا قلبى من رشفة ثَمَلْ
أيه العمل؟
ناوية تسيبينى أحلم كتير؟ و لا فى يوم هايرِق قلبك
تظهرى
أو حتى يوم تترأفى بقلبى تردى عليه فى مرة لو
إتَّصل
كل النِمَر مرفوعة مِ الخِدمة و الخَط فيه أزمة
مع إن رقمك حافظه أنا منذ الأزل
ما تلاوعنيش أعصاب مافيش
ردى عليا بالعَجَل
و باحلم بيكى طفلة بتبتدى خطوة و تتعب لما تتهجى
الحروف
و باحلم بيكى نبتة صغيَّرة ضاربة جدُورها و قاصدة
تتحدى الظروف
و باحلم بيكى موجة حنينة على رمل شط المستحيل و
نسيم عليل
أو خط باقى العمر بيه توصف جميع العرافات المستخبى
فى الكفوف
أو كلمة السر اللى بيها باعرفك ساعة اللقا من بين
ألوف
يا شيئ بدونه أعيش و أموت من غير ما ألاقى أى تفسير
للحياة
يا منطقى و هزلى و جدى و وهم يتحول حقيقة تنكتب فوق
الجباه
باتخيلك؟ ...... طبعاً و عارف كل فرق ما بين حياتى
و الخيال
بس الخيال هوه اللى مدينى الأمل لاجل التحدى معايا
يوصل منتهاه
ماقدرش أعيش من غير أمل
حتى و لو طيفك خيال بياخدنى للحلم الكبير
........... أو يوم عساه
أربع رموش
ما بيرحموش
من غير كسوف و لا شيئ يحوش
واحد لوحده يعذِّبَك، و يطبِّبَك
إمَّال بأه لو أربعة؟!!
ما بيختشوش
الوش لو شافهم لابُد يكون بشوش
رافع
إيديه و كل أمره مسَلِّمه
و مْعَلِّمه عُمرُه اللي فات
إن البنات ،،، ما بيرحموش
أربع رموش
كفين حيارى
مرفوعين و الرب سامع
و بيحضوا بعض بحنان
عشر صوابع
بيسلموا و يتكلموا
و يقولوا شعربدون حروف
و يحوِّلوا البرد لدفا
ولا
يعرفوش إحساس بخوف
بيطبطبوا على بعض
فى لحظة صفا
ساعة ما يِلقوا الدنيا تِدى ضهرها
ما يدوَّروش على مهرها
و لا يلعنوش أبداً ظروف
كفين و دقوا ع الدفوف
و الكون فرح
قلبين صغار
بيدُقوا دقة و دقتين، و بيعزفوا الإتنين
عاملين إيقاع للدنيا و لنور النهار
ساعات يكون الدق همس
مكسوف يبص لقرص شمس
و ساعات يكون مليان شرار
لكنه فى كل الظروف
أجمل حوار
قلبين صغار
مِش مُكتفى فى العشق
بالتلميح
و لا بالكلام اللي يعوز توضيح
أنا مِ البداية قلتلِك
أنا مِش مُريح
عاشقك و باعلن عِشقى للدنيا
و باقضى ليلى بطوله فى التباريح
ما يكفينيش منك كلام عايم
بيفوتنى
وحدى ف السما هايم
و ما يرضنيش منك سوى التصريح
قلبى الجريح
ما يطببوش نظرة و همسة حنينة
و الحُكم واقف عندى ع البَيِّنة
و البيِّنة تصريح ماهِش تلميح
ما تفَكَّريش ف اللي مضوا قبلِك
كل اللي فات فِ العِشق كان تفاريح
بِتبيعِى فِيَّا و
تشتِرى
وِ بْتِظلِمينى و تِنكرى
و تْجُورى على قلبى الوَفِى
و بكُل قَسْوَة بتِفتِرى
إتمادى يا عِشق السنين
دوسى على الشوق و الحنين
و إيَّاك تراجعى هواكى يوم
أو
تِسهرى تعِدِّى النجوم
إيَّاك بِعَقل تفكَّرى
هاتجرَّبى طعم النَدَم
و تْحِسِّى أيه معنى الألم
و حياة هوايا اللي إتظَلَم
وحياة دموعى لَتِخسرى
عِشت السنين باستَعْطِفِك
مِش لاقى أوصاف تِوصِفك
ضاع الأمان
و الحُب هان
و أنا اللي بين الخلق كان
بيبوح بعِشقُه و يِنْصِفِك
بتحسسينى ليه بإن
الذنب ذنبى إنى باحِنْ
و بتقوليلى حاجات تِجِن
كإن ظُلمى مْكِتِّفِك
و لا مرَّة واحدة تقَدَّرى
سامحينى مِش عايز أعرَفِك
و هاتِخسَرى
يا طالب الدنيا شيل
الدنيا على ... حالها
و إوعى ف يوم أسمعك تشكيلى من ... حالها
دى الناس تحب الناس طول ماهى ف ... حالها
و الناس علادَا وِدَا زهقانة من ... حالها
قبل الفقير الغنى موحول فى أو ... حالها
والدنيا قسمة ونصيب
و القسمة مهما تخيب رجلينا رايـ .... حالها
باعترفلِك بالغرام
و إنى لما كنتى مرة
بتلاقينى أهرب و أسيبك
كل ده كان إهتمام
حتى لو صِغتيه فى صورة إتِّهام
كنت خايف عينى تيجى جوة عينك
و إتلبِخَ و يْفِر من عقلى الكلام
أو
تصيب قلبى كما صابت عيونى
من عيونك بالهوى بعض السِهام
كان هروبى صدقينى غصب عنى
و إنتِ فاكراه كان تجاهل ... ده كلام؟!!
كان غرام ،، كان أكيد مِ الإهتمام
تِقدرى تقولى إنه كان قِلة علام
عِشت أيامى اللي فاتوا فِ الندَم
و النهاردة باعترفلِك بالغرام
و آدينى واقف بين إديكى
عندى جُرأة أبُص فِ عنيكى و أصارحِك
و أعتِذِر و كمان أصالحِك
أمَّا لو قلبك سامِحنى ... يا سلام
ينتهى عهد الكلام
و هاعمل أيه
و أنا بيني و بينك ألف مية حاجز؟
و أنا اللي ما كان يحوشنى شيئ
بأشواقى أقف عاجِز
و أقول يمكن يِحِنْ الدهر
بعد ما طال عناده سنين
و أتنازِل و أرضى بأبسط الأشياء
و هوه برضه مِش عايِز
و مهما حاوِلت أدارى
الشوق
بنظرة ف عينى صار مفضوح
و هاعمل أيه؟
و أنا نفسى إنعِكاس ليكى
و باشبهلِك لكن بالروح؟
يا أغلى الناس على قلبى
يا أجمل نعمة من ربى
يا
شمس مزهزهة دربى
خلاص حرَّمت انا اخَبِّى
أو أشرح فى كلام مشروح
السنين اللي حرمني
الدهر فيهم من وصالِك
و البِعاد اللي كواني و هم طالني فوق ما طالِك
كلهم من نظرة فِ عيونِك نسيتهم
كان يا ريتهم
يبقوا أكتر لو فِ آخر الأمر هاتْمَلَّى فْ جمالِك
