وحشتينى

شايفك كما النور اللى بيصحى النهار
يبدر على صحرا السنين لون الخضار
من كتر شوقى إليه باعيش حلمه المحال
أول ما قال يا عشق وجدانى انتبه
أول ما مال القلب إتفجرت أنهار

شغف بيكى ابتدا يكبر
يبان ع الوش و بيظهر
ما بين حرفى اللى داب فيكى
اجيب للقلب صبر منين
أنا سلمت لو مكتوب و مقدَّر

شغلتى البال و طار من عينى طعم النوم
يادوب شوفتك و حسيت ان انا محروم
من العشق اللى عشت استنى فى قدومه
ادور بين الدروب تايه و باتمناه
أخيراً قصتى الحلوة ابتدت م اليوم
--------

فكرك يعنى إننا بالصدفة؟
أبداً مش نُكتة و لا طُرفة
تقدير المولى اللى خلقنا
نبقى بدون ترتيب فِ الغُرفة
فكرت أتراجع ماعرِفتش
أصل انا كنت عليكى بافتِش
تَوْ ما شُوفتك قلبى همسلى
نور فى عنيها دخلنى و كَلبِش
فات م العمر كتير و لا مَلِّش
أمل القلب سؤال ما اتحَلِّش
تانى و تالت لسة يا قلبى
ناوى ف بحثك عنها تبَلِّش؟

 ---------------

ما تفكريش إنك هاتنسى قصتى
انا ما اتنسيش
أنا عكس كل اللى اتنسوا
أنا لو بدأت معاكى قصة ما تنتهيش
أنا جد جدا فى الهوى
و ف أى هلس مع المشاعر .. لأ ماليش
باعشق من القلب العفى
و عنيف أوى لو تعرفى
و جريئ إذا انتى ما تعرفيش
باكتب بلون الدم إسمى على الزمن
و باموت فى عشقك ماتخافيش
الموت هنا بيكون حياة
بيكون ضرورى عشان اعيش
و ارسم على خدودك ربيع م السرمدى
مهما الفصول بتفوت عليه
ما بينمحيش
و اعصر شفايفك شهد يهدى غربتى
يروى السنين التايهة و المعجونة طيش
ما انا لما باعشق مش بافوت زى الهوى
أنا بابقى لـ اللى باعشقه زى السما
أول ما بيصدقنى بابقى جناح و ريش
و افضل حياته و فرحته
و الفرحة دى لو تبتدى .. ما بتنتهيش

--------------

ساعات باحتاج كلام أقوى، ما بيعبرش عن شهوة

و لا قلب إنشغل بعيون و لا فتنة و لا نزوة

و نفسى الحرف يبقى مطيع

و يكتبنى أما باعشق روح

و بامضى بروحى ف التوقيع .. و أقول أهوى

و موج العشق ييجى الشط و يشاغل رمال قلبى

و يستنَّى اللى فيه صادق و بيروح اللي كان رغوة

و مهما هاقول ف عشق الروح

كلام يسحر ودان الناس .. أنا محتاج كلام أقوى

--------------

عارفة أما شوفتك

كنت فاكر نفسى عايش، و الحياة مافيهاش جديد

و المشاعر كلها مستهلكة متوزعة رغبة و نزوة أو حنين

المشاعر كات بتمشى ف الطرق من غير عنين

كنت باحسب وقتها إن السعادة شرطها علاقات كتير

واحدة تتمناك و تانية تصدها و التالتة تتلوَّع تغير

و إكتشفت بدقة القلب اللى رنت رنة غير

إنى تايه و إهتديت و إنتى النبى، أيوة و حياة النبى و ربك كبير

الصراحة النظرة لعيونك حياة

و الحياة إنك تكونى الحلم و إنتى منتهاه

الأكيد إنى إكتشفت ف يوم ما شوفتك إن سحر الدنيا و جمالها إبتدا

و إن قبلك كل حاجة كات سراب و إن لذة دقة القلب اللى توجع

جنة أوسع ...من براح الكون بدون عشق و غرام

(2)

إغتسلت بنور عنيكى من ذنوب كل اللى فات

و إتشاهدت بلا إله للحب و لا قبلك نبى

و إن رب الكون فتحلى باب عشان أقدر أتوب

و إنى لما صدقت ف النية أجابلى مطلبى

إتنست كل البنات قبلك و صبحوا ف العدم

و إنطوى الماضى إنتهى بجرة قلم

و العجيب إنى ما حسيتش بأسف، اللذيذ إنى ما حسيتش بندم

ربنا ....و كأنه شاف نظرة عنيا ف الفضا متقلبة ...

بتبث شكوتها و كاتمة الفضفضة

يا رب ... نفسى ف قِبلة لمشاعر نضاف

يا رب ... روحى نهر بس ما لوش ضفاف

ما تصبهاش فى البحر من غير أى نور

و إجعل لها وادى و بحيرة تضمها

خليها عذبة و جود عليها بالخميلة و الندى

ساعة إجابة من إله رحمن رحيم

خلانى أشوفك واحة فى آخر مدى

يا جنتى اللى دخلتها برحمة إله

من يوم ما شوفتك قلبى ع الباب إنتباه

---------

طمن روحى عليك ... كلمنى، سيبك بقى م الفعل الضمنى

لَبِّس حرفك شوق و غناوى، أصل الكلمة الحلوة تداوى

و أنا مش طالب غير تفهمني ....

واجه خوفك و إنسى ظروفك، خلى حروفك تحضن ودنى

ريَّح قلبى و طاوِع لَبِّى، اللي غدربى ظَلَم ما رحمنى

جيتلك بعد الشوق ما اتمكن، ولا باتمسَّح ولا باتمسكن

بس باحاول مرة ويمكن، تبقى دى آخرة بُعْدَك عنى

----------

ماشية الحياة من غير إيقاع

و اللي يبات ع القمة ليه تصحى تلاقيه فْ القاع

و العشق للأسف الشديد بيعانى مُر الإلتياع

و الصدق ولَّى و الشعور لو يِنْشِحِت بيكون مذَلَّة

و الشعور لا بيِنشَرى و لا عمره كان ينباع

و انا أصلى فى صدق المشاعر ليا حظ و باع

بافهم فى أرواح البشر، و مِش إختراع

أنا ياما قلبى للمشاعر جاع، دخل الصراع

و لقيتنى فى الآخر هنا، حارس على باب الضنى

و الفرحة للخاليين مشاع

ماشية الحياة ... من غير إيقاع

------------

حب إنما فى إطار جديد

و لو إنى ...موش فارق معايا التسميات

بس اللي بيننا جميل أكيد

إحساس بلهفة على اللُقا

روعة وِصال متنسقة، و حروف كلام متنمقة

حتى التطابق ف الرؤى، بيشكلوا إحساس وليد

عارفة أما يبقى الكون براح ... و الروح بتسبح ف السماح

و الجسم مبسوط بالغرق ف طوفان يمارس إجتياح

مع إنه كان دايماً عنيد ... لأ لأ أكيد

دا شعور بحب بيبتدى فى إطار جديد

أبعد من الطين و الغريزة، و أعلى من "أوقات لذيذة"

و برضو و بكلمات وجيزة، دى حالة بتخليك سعيد

حُب إنما .... فى إطار جديد

-------------

بُعد المكان موش بالضرورة بيبعِد المسافات

و أنا مهما كان عايش و أملى إنى اكتبك أبيات

و باشوف غيابك .. يملا أى حضور

و الكلمة منك .. ألف طاقة نور

و أنا بس عايش .. منتظر ف الدور

و تاعبنى إنى، باحسب الحسابات

بس ف قرارة نفسى دايماً باعترف

باشتاق لصورتك .. تِتْلِغى المسافات

----------

خافى ........و خلِّى الإنجذاب خافى

ف القلب قايدة النار، محتاجة لمطافى

مستعذبة التعذيب و الوصل لِيه شافى

تلميح عيون بالهوى فى العشق مش كافى

و إن جات حروفك تعترف بكلام حنين دافى

تهرب و ترسم نجمتين ساعة ما أكون غافى

و أفوق على طعم الألم فى الوهم خُطَّافى

يا أحلى من لون الندى يا أغلى أصدافى

لؤلؤ عنيك أمَّا بَرَق قلبى إنحرَق

من عشقى ما تخافى

----------

أحلى ما فى العام اللي فات غير إنه فات

سابلى معاكى الذكرايات، حبة آهات

على ضحكة م القلب الحزين، تفرح ساعات

على دمعة سالت بإنتظام، على طيف غرام

ما بيتعاملش بخُد و هات

أجمل ما فى العام اللي فات

إنه منحنى صُحبِتِك، صوت ضِحكِتك

لمسة إيديى اللي بتِشعِل قلبى دق، و أقول بحَق

أيوه الزهور حلوة و رقيقة، و عينى بتشوفِك أرَقْ

يا اللي إنتى مِ الآخر بقى و بصوت و يِمكِن من سُكات

أحلى ما فى العام اللي فات

--------------

ما يهمنيش الدنيا و الناس و العيون

ما يهمنيش حتى انى اكون مجنون

مش فارقة تسمية البشر ل اللى احنا فيه

أنا هارضى قلبى و يجرى أيه ما يكون

----------

وحشتينى

و مش لاقى كلام يوصف مشاعرى ناحيتك أبدا

و لو كنت أقدر ارسم روحى و أعمل ف الكتاف جناحات

تطير لحداكى كنت أعمل

تشوف روحك و تحضنها و ترجعلى تطمن قلبى على قلبك

و تملا العين صور منك و تملا الصدر من ريحتك عبير دايم

و تتحايل على روحك تجينى تزورنى و أنا نايم

أنا عن كل خلق الله عزفت خلاص، بقيت صايم

و هافطر بس على صوتك، على لمسة إيديكى فى السلام مشتاق

على لمعة عيونك لما بتحاول كتير تهرب من الجرأة اللي ف عيونى

وحشتينى

و لما تغيبى باستهبل و أشوف كل الوشوش وشك

و باسمع فى غناوى الطير رنين صوتك

و باتكلم مع النسمة اللى لما تمر شايلة من العبير عطرك

و أقول كل اللى نفسى تسمعيه منى

و أقول يمكن تكون النسمة أسعد حظ من حظى و تقدر تلمس الخدين

و ترسم ع العيون بسمة و تنطق كلمتين منى .. باحبك، و العيون بتقول ... 

وحشتينى

و توحشنى حروف كلمة وحشتينى، و يوحشنى السهر بالليل

و نور الصبح لما يطل م الشباك عشان هاكتب بخيط منه وحشتينى

وحشتينى .. و صباح الخير بتحيينى

و رمشك لما ليا يميل يسيل منى الحنين لك سيل

و غير وصلك ما يروينى، وحشتينى

وحشتينى، ...

وحشنى كلام مالوش آخر بيلضم ألف قصة ف بعض

لما باعيد تفاصيلهم ما باعرفش الجمل من بعض

و لا باقدر اشوف فارق ما بين جملك و بين جملى

كإن النص كان مكتوب و أنا و إنتى يادوب نقراه ف ساعة عرض

من اﻵخر .... وحشتينى

وحشنى السحر فى جمالك و باتلكك على قصة و أقولهالك

و لو حتى نهاية القول هاكون هالك

وحشتينى و قوى جدا و كل كلام باقولهولك يكون سالك

مفيش كلمة بتتردد سوى كلمة وحشتينى

باشوفها حروف على صورتك و نقشة حرير على شالك

و باتمنى يادوب منها إذا إتقالت ..  تكون بطريقة تحلالك

وحشتينى، ولَه فـ الواو و بعد الواو حنين فى الحه

و شين الشوق شبك دايب و تِه تايهة فـ هوى الغايب

و يِه يوم الغياب بسنين و نون ناسيانى على بابك

و يِه ترديدها يحيينى .... وحشتينى

وحشتينى، و بافتح عينى و أضحكلك فى كل صباح

و أداعب خصلة من شعرك على جبينك و بتحاول تدارى عيونك الحلوين

و شلال الخجل نازل على خدك مخليكى تبصى لتحت مبتسمة

و إيدى ترفع الدقن اللى من دقتها مش باينة

أشوف الجنة فى عيونك و روحى بتقرا تحويطة و معوذتين

و بتقولك وحشتينى