تبيع قلبك و تاخد كام؟

تبيع قلبك و تاخد كام؟

و تطفش مرة مِ الأوهام

و تنزل بعد طول غيبة،

لأرض المُر و العيبة

و للواقع و للأرقام

تبيع روحك و تاخد كام؟

تبيع الصدق ف النيَّة

و أخلاقَك إذا لسة كما هِيَّا

و حط بإيدك الأرقام تكون دِيَّة

بأنانيَّة و حقق وحدَك الأحلام

تبيع نفسك؟ .. و تاخد كام؟

لأنك غير

لأنك غير

ما باهتمش بشكليات

معاكى أو بأى مثير

و لا باشعر بأن البُعد

ولَّا القُرب له تأثير

و مُتَأكد بأن مشاعرى

موش صدفة

و لا نظرة عيون خاطفة،

و لا قابل تكون رأفة،

و لا حتى تكون تقدير

و لا هارضى الكلام يبقى

ف عرف الناس كما التخدير

و مهما حاولت ما أوعدكيش

أعيش و السر جوة البير

لأنى مراية لمشاعرى

و عندى عيون لها عدسات

على جفونها يبان السر بالتكبير

و نظراتها ما تعرفش الخداع أبداً

و مقْرِيَّة بدون تفسير

و ده إن كان أكيد هايكون

و حق النون ... لأنك غير

قصة جنان

القصة موش قصة جِنان،

و لا إفتِتَان

و لا شهوة طالقة

لكل رغباتها العَنَان

القصة فِ الإصل الأمان

حد أما تسمع صوته

تِغْرَق فِ الحنان

و إن يوم لَمَحْتُه

بتغتسل عينك بنور

و بتِعلن البَهْجَة الحضور

حتى السرور ..

بيقول خلاص السَعد حان

و بيِتْرَفَع للنور أدان

يا كل عاشق طُهْر نول

شمس الهوى مالهاش أفُول

و الحب وقته بجد آن،

جاى ف الأوان

و القصة موش قصة جِنان

ليل الوطن

فيه نقطة لسَّة منوَّرة

ف ليل الوطن

ما تخليهاش تبعِد

لاتغرق ف الشجن

قَرَّب لها هاتشِع نور

ما تقفش على طرف الرصيف

مستَنِّى دور

فيه سِكتين

يا تعيش تِوَلْوِل ع اللي سال

يا تسِد بإيديك اللي ممكن يِتْحَقَن

الدنيا ما بتِدِّيش بلاش

و الغالى دايماً ... لُه تَمَن

الخجل

بعض الخجل ... بيكون مثير

و شعور كما نعومة الحرير

بيفِت فِ العقل بأدَب

بيخلى أى جنان يطير

بيدوب الصخر العصى

أثناء ما هوَّ بيِخْتَشِى

يقلِب اسد .. قُط و أسير

بيعذِبَك ... و يهَذِبك

و يصدَقَك و يكَذِبَك

و بيقلب الأعمى .. لبصير

بعض الخجل .. بيكون خطير

الوضع الراهِن

إفضَل كده

فى مكانك و إثبَت إوعى تقرَّب

لو هاتقرَّب ....

قلبى الطيب راح يتغَرَّب

و إوعاك تِبعِد،

أنا ماقدَرشِى أعيش من غيرك

معنى الروح

من جوة كيانى راح يِتْسَرَّب

و إوعى تشُك ف كلمة باقولها

و حَد يقولَّك طب ما تجَرَّب

و إوعاك مرة تظُن بإنِّى

من لُقياك ممكن أتْهَرَّب

بس أنا عارف نفسى كويِّس

موش هاتحَمِّل

حاجة خلاف الوضع الراهِن

موش باتحَجِّج

أو باتْدَّارى ف بس و لكن

بس أنا قلبى ف بُعْدَك واهِن

و إن قرَّبت هاكون موش قادر

أمنع نفسى و أفضَل ساكِن

أصلى بسِحر هواك مِتشَرَّب

إفضَل كده خليك فى مكانَك

... إو عَى تقَرَّب

ما بقيتش باسأل ... ليه؟

ما بقيتش أفكر فين و ليه

أو هو أيه

أو حتى مين هايقول عليه

ماعرفش أيه

كل اللي حاسس بيه هوى

أطهر حلال و شعور نزيه

حالة صراحة مع الوجود

مالهاش حدود

منقوشة فوق رمز الخلود

الروح

و بعد الروح ... ما فيه

...

هاتصدقينى إن مرة قولت

إن الملامح ترجمتها بتختلِف؟

لو (ح) و نون شبكوا ف ألِف

قبل الأخير أنا باعتَرِف

ماهو حرف نون بيكون حنون

لو كان مع الروح ... مُؤتَلِف

و أهو دا اللي نفسى أقول عليه

إنك ملامحك عندى ترجمة الأمان

موش بس تعبير عن حنان

إنك معانى بتغسل الروح و الكيان

باشعر معاها بإنى مخلوق من جديد

و إنى سعيد

و إنى يادوب هاقدر أكون

إنسان