متخيلاها هاتعترف؟
و تبوح بأحلى سرَّها؟
و إنى بقيت ملهوف
عليها أو وقَعت ف أسرها؟
تفتكرى هاتقولك كمان
إن السؤال مليان
جنان؟
و إن الخيال خلاها
تنسى أمرها
مع إننا و لا يوم
بيجمعنا مكان
بس إنتِ شاغلِك أمرها
كان أولى تيجى و
تسألينى بدون خجل
و أنا لو حصَل؟
ما قدرش أقول غير
اللي كان
و إن اللي ف دماغِك
جنان
و لا عمرى رُحت
لبرَّها
إنتى ف سمايا الشمس
بتزور النهار
و بتنعكس على كل
أوراق الشجر
تملاه خضار
كل النجوم بتزورنى فى
الليل الطويل
حتى القمر لو مرة زار
بيجينى ملفوف بالحنين
و يبوح بشكوى و يختفى
قبل النهار
و إنتى اللى وحدك فى
السما
يا حبيبتى مالهاش أى
جار
إطمنى و عيشى الحياة
و بلاش حصار
إحساس جديد
و حب حاسس بيه بيبرق
من بعيد
باين على آخر المدى
...هايزيد و يملا الأوردة
و بالوصال يكبر ،،،
يزيد
إحساس و طعمه مختلف
مع إنى مش خام فى
الهوى ،،، أنا باعتِرِف
بس الجديد فى العشق
وياكى أنا
ضهرى إنحنى
و بقيت خبير فى كل
أنواع الغرام
موش باتكِسِفْ
وياكى ماشى بدون كلام
و لا أسئلة
كل اللى شوفته و كان
ف غيرك مُعْضِلة
وياكى ما بقاش
مُشكِلة
أنا بالتِمِسلِك ألف
عُذر
كأنى عِشت معاكى عُمر
صدق اللي قال
الحب فعلاً بهدلة
و دا برضه كان إحساس
جديد
عِشقى الوليد
بيهِز كل كيان حياتى
و دا الأكيد
خلانى رغم اللي جرى
عايش سعيد
و أنا بعد خبرات
السنين
باقول هواكى ،،، شيئ
فريد
و كل يوم ويَّاه
باعيش ....إحساس جديد
لما بابدأ كلمتين
ويَّاكى
ليه ما بينتهوش؟
و أبقى متخيل ملامحك
ضحكة فوق كل الوشوش
حتى صمتك باسمعه
زى عزف الناى على شط
الترع
لما غيرى ما يسمعوش
و أبقى راسمك
لون خضار الريف ف
أيام الربيع
و إنتى قاعدة تحت ضل
التوت
بوجه ملائكى ...
دايماً بشوش
باعترفلك بالهوى و
الشوق دليلى
ياللي ساكنة عِز ليلى
بس طيفك للأسف
ما بالمحوش
وحشتينى ماهِش كلمة
يادوب تنقال
دا إحساسى اللي
ترجمته تكون بوصال
و همسة و لمسة و
الديالوج بنظرة عين
و من طعم الوصال يبقى
إفتراقنا مُحال
هاتلقينى الدفا من
برد ليل طوبة
و هاتشوفى الغرام من
قلبى أعجوبة
و هاتحسى بشيئ فى
الحضن مِش عادى
كأنك قبلى ماعشقتيش
ولا نوبة
ما أنا زيِّك من
العِشق الصحيح محروم
ولا باسمع ف كل اللي
مضى غير لوم
و أنا الدنيا ماهِش
عندى سنين و أيام
أنا يكفينى منها
الفرح لو كان يوم
فى حضنك بانسى هَمْ
كتير
و رغم الآه بياخدنى
الغرام و يطير
و عارفك زى ما أنا
عارف تمام نفسى
كتاب مفتوح و حضن
حرير
ما تستنيش ولا يهمك
كلام الناس
و من خمر الهوى
إسقينى و صُبى الكاس
أنا قبلك لا شوفت
وصال و لا عِشته
كانت أيام بتِتقَضَّى
،، بلا إحساس
قالتلى هاخد وقتى و
هاشوفلك معاد
و أنا اللي شوفت بنات
بعرض أو طول البلاد
النوم جافانى و شكلى
هاعتاد السهاد
يا حب يا مبهدل كيانى
و كل ما هرب من عيون
تنادينى تانى
يا قلبى يا خيبة
القلوب، دايماً تدوب
و مستلمنى أنا
بالعناد
عاجبك كده؟
آهى لسة مش متأكده
أو قاصده تتدلع
عليك و تبقى سيرة دا وِدَه
بس الغريبة إنك يا
قلبى سِكِت عادى
و سبتها تختار مكان
يبقى التَجَمُّع أو معادى
و إنت ولا أى إندهاش،
ما عارضتهاش
تعبت روحى مابدِهاش
هاسكت و أشوف إذا كنت
هاتحقق مرادى
هايبقى عادى
بس إن رجعت و زى
عادتك تِشتِكى
ماسمعش لوم، لِم
الهدوم
و اللي هايجرا لحضرتك
و لا يتنظر و لا يتحِكى
رقم غريب
ظاهر على شاشة
موبايلى
روحت باصص من قريب
رنة حس القلب بيها
قُولت صوتها مش غريب
الجرس و بصوت صراحته
سبته لما قفل براحته
و قولت هيا ولا لأ
أنا قلبى دق
روحت طالب و التساؤل
كان مالينى
هيا ولا حد م اللي
بيرازينى
و قولت أجازف
مِش هاقضى العمر خايف
و الألوه طلعت و تاهت روحى فيها
كنت باسمعها و ناسى
إنى أرد ألوه عليها
صوتها يسحر أى ودن
هاتسمعه
و اللي تاخده مستحيل
هاترجَّعه
قلبى من أول مكالمة
سبته عندك،
و المشاعر اللي
ولِّدتيها فيا
ع البشر يتوزعوا
و الكلام خدنا وراح
لبلاد كتير
و الحكاوى و الغناوى
و الأميرة و الأمير
و الحصان اللي ظهر
بجناح و ريش
و الأسامى منورة فوق
الأفيش
و السما زرقة و موج
بحرك مهاود
و الألم لو راح يعاود
يستحى و يرفض يعيش
و المكالمة اللي
إكتشفنا إنها
من طولها خلَّصت
الرصيد
كان منانا من حلاوة
طعمها
من تانى نبدأ من جديد
و إحنا من فرط الحنين
السلام ما لحقش ينشف
اللقا كان نفسه يعرف
المعاد آمته و فين؟
هاتصدقينى لما أقول
عاشق؟
و هواكى سهم و فى
الفؤاد راشِق؟
و تحنى على قلبى اللي
عاش ليكى
و لا الكلام وياكى مش
فارق؟
على كل حال أنا
باعترف و خلاص
أصل القدر ولا منه أى
مناص
و أنا قدرى أعانى
الحظ فِ الدنيا
لأن قلبى إتعَوِّد
الإخلاص
حبك سكن جوايا ما
إخترتوش
و اللي ظهر على روحى
منه رتوش
لا بانام ولا شايف
بنات غيرك
على خط سيرك
خطاوى القلب ما
بيهدوش
لو ده النصيب أنا
راضى بيه قانع
و لو هايملا القلب
بمواجع
وجع حبيبى أكيد شِفا
روحى
و تطيب جروحى
إذا بعد الغياب راجع
ساعات باشتاق
لحتى خناقى وياكى
و نرفزتك و صوتك و
إنتِ مجنونة
و بتقولى كلام خارج
حدود العقل
و فى نهايته بتبقِى
زى بالُّونة
و فجأة تفرقعى ف وشى،
أغيب و أمشى
عشان برضه ما باقدرشى
أرد عليكى برعونة
و بارجع بعد حبة وقت
أقول دلوقت تعرف قد
أيه غِلطت
و يمكن تيجى تتأسِّف
تقوللى إشتَقت
و يمكن إحتمال تغلط
تقوللى أنا بيك
مفتونة
و مابيحصلش، و
ألاقيكى
بتقلبى كل كلمة لقلش
و بالقانى باموت فيكى
برغم إنى
صحيح واثق بأنى
عِشِقت مجنونة
ساعات تانية
ما باصبرشى و لو
ثانية
و باشعر إن موش إنتى
اللي حبيتها
و أقول من قلبى
ياريتها
تُفُك الأسر و أتحرر
و أشوف برة حياة
تانية
و أشوف العمر بيعَدى
و لا بيدى ،، دى حتى
الدنيا دى فانية
هاسيب مصر اللي
حبيتها
و أروح أسكُن ف
ألمانيا
و ما يمُرش سوى لحظات
ألاقى القلب قام يعزف
على الآهات
نغم مصرى بلون قمحى
و موش قابل فرنسا ولا
أوكرانيا
و أشوف نفسى أكيد
فقرى
و أجيلك جَرْىْ
و أتكعبل و أنا باجرى
وبعد دا كله ياريتنى
أشوفك طيبة و حانية
و هاعمل أيه، و أصل
العشق ده أرزاق
و شيئ فى الجلد راق
فوق راق
و هوه هوانا و المية
كلمونى الأصدقاء ....
و بصوت حزين ،،
دمعهم غلِّف حروف نص
الكلام
أنا قُلت مين؟
قالوا صاحبك ،،، قُلت
أبداً ... إستحالة ،، كان معايا من يومين
ضحكته مالية المكان
بيعاتبنى ع الغياب .. و يقول بلهفة
إنت فين؟
زى عادتى قلتله شوية
مشاغل
حط إيده فوق كتافى و
قاللي عاذرك
الحياة أيه غير مشاكل
إتكسفت و حيَّرتنى ف
عينه لَمعة
و اللى كان وسط
الصحاب و كأنه شمعة
ضحكته ماعرفش ليه ،،
خِلصِت بدمعة؟
كان بيعزف لحن عمره
بين صحابه
كان بياخد من سنينه
لمَّا شابوا
كان حضوره و ضى نورُه
،،، فرحته لو جيت تزوره
الحنان اللي ف عنيه
ولا مرة سابُه
النهاردة و مرة واحدة
،،، بيطلبوا منا إجتماع
كل واحد جاى بوردة
،،، و اللُقا حفلة وداع
آه يا دنيا مفرقانا
،،، مهما تاخدى ليه جعانة
و بأمانة اللي يآمن
ليكى ضاع
ليه يا ورق العمر
تدبل
فى الربيع قبل الخريف
بعد ما بتسقط بتسأل
الفراق ليه كان مخيف؟
و الحياة أيه غير
مفارق
و اللي جاى لازم
يفارق
فى المغارب فى
المشارق
روحنا جوة الدنيا طيف
حلمى إن أشوف الكون
براح
و الناس عفية بدون
جراح
و الضحكة فى وشوش
البشر
فاض و إنتشر و رسم
سماح
حلمى إن ألمحش الدموع
و لا آه بتمزع فى
الحشا
تهرى الضلوع
حلمى إن أملا الأرض
نور
حتى البحور
و الورد طالل ع الشجر
يكسى الفروع
حلمى إن يبقى الحلم
حق
حلمى إن يبقى الناس
أرق
حلمى إن لو مرة
إشتكيت
ماندمش مرة و أقول
ياريت
كان قبل ما أشكى
بلعنى شق
حلمى الأمل ما يكونش
صعب
و بكرة ده ما يكونش
رُعب
و لو فى مرة صادفنى
خوف
ألقى الألوف
بتقوللى دوس ع الخوف
بكعب
حلمى إنى مانعاش أى
هم
حلمى اليتيم مايشوفش
يُتم
و إن يوم بعينه طلب
معين
يبقى الشمال قبل
اليمين
مرصوصله مليون خال و
عم
و ده الأهم
حلمى إنى أفضل برضو
أحلم
و أصبح و أقول الله
أعلم
و أفضل أحلم أحلم
أحلم
حتى جوه حلمى أحلم
أنا العيد عندى مش
دبدوب
و لا قلب و كلام
بيدوب
و لا وردة ،،،،،،
و كارت ف ظرف و
معايدة
ولا رسالة على
التليفون
و رنة يادوب
أنا عيدى ...إنى أشوف
الحب فى عيونك
يلاغى العشق ف عيونى
بدون مكتوب
و شوق بيزيد و نار
بتقيد
إذا غابت عيونك يوم
و نتلهف على المواعيد
و كل اللي أرفضه
لغيرك
يكون مرغوب
أنا عيدى .....إن أحب
الحب علشانك
و أعيش الحلم علشانك
و رغم الخوف ،،،،
بتبدأ خطوتى المشوار
و لو كان لسة مش
محسوب
أنا عيدى ،،،،
غناوى الكون يرددها
على سمعك
و لو ف الحلم
هاتشاوريلى
أنا سامعِك
أنا القسمة
و أنا طرحك و أنا
جمعِك
و أنا اللي البعد عنه
ذنوب
و عيدِك عنده ،،، مِش
دبدوب
أنا عندى حبة أسئلة
يا حبيبتى ليكى بتحسى
بيا لما بابعت طيفى يطمن عليكى؟ طب بتشوفينى ف كل نسمة حنينة بتزور عنيكى؟ ولا إذا
نامت عيونك فى المسا
ما بتلمحيش حارس أمين
سهران على بابك عشان يهتم بيكى؟
أنا هدمتك
سترك و سرك فى الحياة
أنا حتى ذرات الهوا
اللي بيدخلوا ويا الشهيق
ما بيخرجوش مع أى ضيق
الله ف سماه
أنا حتى قبل ما تحلمى
بالشيئ هاجيكى
بس إنتى عارفة قد أيه
ملهوف عليكى؟
متشرَّباك روحى أنا
من غير ما أدوق
و باحِس بيك عمال
بتجرى ف الخلايا و العروق
و بــ انام و أنا
ملهوف عليك و أصبح بشوق
صوتك نغم باسرح معاه
على لحن دق القلب ليك
يا عِشق شيك، يا ريت
يكون إحساسى بيك
بياخدنى فوق
ما يشدينيش للأرض و
أنسى العِشق و المعشوق
و أصحى ،،، و أفوق
من أحلى حلم كأنه على
ليلى الشروق
و الدنيا سوق
متشرباك روحى أنا
و إنت و أنا من غير
فروق
