عنيكى
...
ليه فيهم باتوه
مع إنهم
جفنين و رمش و نِن عين
ضحكوا على قلبى و خدوه
و هناك فاتوه
و أنا للأسف ......
ماعرفش فين؟
ليه فيهم باتوه
مع إنهم
جفنين و رمش و نِن عين
ضحكوا على قلبى و خدوه
و هناك فاتوه
و أنا للأسف ......
ماعرفش فين؟
ف عنيكى سرى
و جهرى و شعورى
ف عنيكى بوصلة مركبى
و نورى
ف عنيكى وطنى
اللي ماليش غيره
لو كنتى حتى ف عمرى
بتزُوُرى
عارف كتير قبلك ...
مانيش ناكر
و إن حلفونى بجد
مش فاكر
مش أى حد يمر و يعلِّم
أمَّا اللي بس يادوب
بعنيه ف يوم سلِّم
هو اللي فاتنى أسير
و فتح باب أسره
ما عاد ف مقدورى
و لقيته سرى
و جهرى و شعورى
و جهرى و شعورى
ف عنيكى بوصلة مركبى
و نورى
ف عنيكى وطنى
اللي ماليش غيره
لو كنتى حتى ف عمرى
بتزُوُرى
عارف كتير قبلك ...
مانيش ناكر
و إن حلفونى بجد
مش فاكر
مش أى حد يمر و يعلِّم
أمَّا اللي بس يادوب
بعنيه ف يوم سلِّم
هو اللي فاتنى أسير
و فتح باب أسره
ما عاد ف مقدورى
و لقيته سرى
و جهرى و شعورى
عيونك
مش رموش و جفون
و لا عيون زى أى عيون
دى دنيا و تُهت أنا فيها
و لاجل عنيكى كُله يهون
....
إذا تضحك بتسْحِرنى
و إذا تزعل بتقْهِرنى
و لو سألت سؤال عابر
أخاف لا إجابته تكسَرنى
و أبات محزون
....
و لو طلْ الأمل فيهم
و وعدونى أداريهم
و من شر العوازل دول
بسورة الناس أنا أرقيهم
و أبات مفتون
....
و لو مرت عليها دموع
يبات قلبى بألم موجوع
و لو كانت دموع فرحة
و لا يسأل أيه الموضوع
صحيح مجنون
....
عيونك صيادين و شباك
و أنا واقف حِدى الشباك
أسير و الليل مرافقنى
يا ساكن مهجتى رحماك
شاورلى أكون
باشتاق لنور الشمس ف عنيكى
و البرد ياكل مهجتى لو غبتى يوم
موش شايفة شدة لهفتى عليكى
و الروح فراش حواليكى ما بطلش حوم
ما تغيريش نظرة عنيكى ناحيتى
و لا تسأليش بيهم كرهت الأسئلة
وياكى عمرى و ف إتجاهك سكتى
و البعد عنك ... صدقينى بَهْدَلة
ف عنيكى مأوى للعيون
و حاجات تشد الناس و تسرق قلبهم
و ساعات أقول أنا مين هاكون
بس أما قربت لعنيكى
بجد حسيت إنى ساكن من زمان
ف عنيكى تسبيكة غواية
مافيش ف أى عيون لها أبدا مثيل
ما تدلينيش أبدا
على عنوان عنيكى و هاعرفه
و هاشم ريحك من بعيد
أمواج عبيرك مش هاتخطئها الرئة
نسمات عطورك مرشدى ليكى
سرب الطيور اللى سكن بطن السما
علشان يحوش عنك
حرارة شمسها يشاور عليكى
و حاجات كتير هاتشدنى ناحية طريق
سايبين خطاويكى عليه مليون دليل
البوصلة عندى بتنجذب دايما إلى
قلبك لأنه بدون جدل
مغنط خلايا جسمى كله و شدنى
و بقيت بادور
فى مدار ما بابعد عنه يوم
فى نظام مالوش أبدا مثيل
ما تدلينيش أبداً عليكى
و هاتلاقينى عند بابك مبتسم
على ضهر خيل
ف عنيكى طارق ع الرموش
باب الوصال و الطرق طال
بس البيبان مابيسمعوش
ما يقدروش إن البشر
ليها إحتمال و أنا حالى حال
فى عنيكى بهجة
بتنقليهم للبشر فدادين
و البهجة زى النور
ضرورى للحياة
و كأنه دين
ف عنيكى فرحة عمر
بتودع دموع اللى إنقضى
من ليل حزين
باطير بيكى لبعد الكون
و أشوف ف الضمة تسبيحه
و فى لمس اﻹيدين ترتيل
و فى قبلة شفاة باللهفة
سعى و هرولة تايب
قالوله مشايخه لو هاتطوف
تكون دايب
و تملى القلب بإستغفار
هايرجع عشقك الغايب
و أشوف ف عنيكى
بحر كسوف
طرح ع الخد لون مألوف
و أنا المشتاق لسجدة يا دوب
فى كعبة و قلبى بيها يطوف
نويت أفطر و أنا الصايم
إذا رفعوا اﻷدان بالعشق
و اللي إشتاقوا وقفوا صفوف
ما يهمنيش
الدنيا لو ترضى
و ﻻ يوم شغلنى
غير عنيكى السود
كل الليالى
بحلوها بتمضى
و الفرح بس
بضحكتك بيعود
عارفانى
لما بتلمحك روحى
تنسى البشر
تقفل جفونها
و من عنيكى الطيبين
بالحب بتكحل عيونها
و تصبغ العمر اللى جاى
أفراح بلون خدك و لونها
يصلبنى عودك
و يقيم سنين مايلين
و يصالح العمر الحزين
اللي إنحرم
طعم الحياة الحلو
من دونها
الكلمة قبل ما أقولها متقالة
و الفكرة جوة عنيكى متشالة
بطلت حتى أستغرب اللي يكون
أنا فيكى عاقل لسة مش مجنون
أنا و إنتى فى عرف البشر حالة
ف عنيكى، أكواد المرور
مش بس نور
ف عنيكى أسرار السرور
و الراحة
و الإحساس و وادى الأمنيات
و اللحن كاسى الأغنيات
و العشق على مر العصور
الجنة بين جفنين يضللهم رموش
و الباب يحوش
و العشق أكواد المرور
هو الحقيقى ف عمرى كله
و غيره كان ف الأصل .. زور
ف عنيكى جنة ما تنتهيش
بربيع يدوم طول الشهور
لما عيونك
تبقى العالم بالنسبالى
و بابقى لوحدى باصارح حالى
باعشق سفرى لجوة عنيكى
و بابقى رومانسى
كمان و خيالى
يحلى القارب وسط مغارب
لما البحر يكون متدارك
لما اللحن يكون متقارب
لما الجو بيبقى مثالى
جوة عيونك دنيا بحالها
و واحة جمالها
بياخد عقلى أيام و ليالى
جوة عيونك باهرب منى
و مش مستنى
ف يوم ألاقينى و أغمض عينى
ف ساعة لما بامُر قُبالى
أصل عيونك
هى العالم بالنسبالى
هاتصدقينى لما أقولك
إن نظرة من عنيكى
بتلغى كل الأخريات
بتصالح العمر اللي فات
بتفاجئنى النظرة منك
إنى حققت اللي عاوزه
و إنى نلت الأمنيات
ف عنيكى الدنيا بتضحك نور
و ف قلبك
نبضه بيبقى حروف
منقوشة ف صخر قلوب عاشقين
واقفين ملايين
و كأنك بدر إتلألأ فوق ف سماه
و عيون الناس
شايفاه يتفرق على المساكين
ضحكاية بتمسح دمعة قديمة
لكل حزين
باعشق
عنيكى الحلوة لما بتهربى
من كلمة خرقت
حاجز الإحساس
و نطقت بالشعور
و بتسدلى فوقهم
ستاير من خجل
و بترفعى سور الكسوف
و بتقفلى
أبواب عنيكى المليانين إحساس
و بتترسم فوق الخدود
براكين لهب
تسرق حمار الشمس
فى سقف السما ف نهار بؤنة
و تنفجر .. خطوات هروب
ف عنيكى سحر الكون
و قلبى ساعات بقصد
بيبقى نفسه يشوف
جمال الإنفعال
و بيبقى محتار حبتين
بين نبل إرضائك
و بين أمله المحال
و بتكسبى دايماً من القلب الرهان
ف عنيكى السود
السعد لمين بوصال موعود
و حنين بيحاوط رمش العين
و براح ما بيعرف أى حدود
و نغم معزوف
على أحلى كمان
و الرمش يشاغل وتر العود
ف عنيكى السود
ف عنيكى بستان أجوبة
على أسئلة ما زرعتهاش
ف عنيكى وديان اليقين
و أنا نهر حيرة
و ضفتينى كفوف
بتترجَّاكى تهديها السبيل
ف خدودك الشال
اللي مغزول بالحياء
عمَّال بيعلن عن
وصول الروح لمرتبة الكمال
ف شفايفك الحرف
اللي مَسْقِى بالنغم
بيصُب سحر لكل عاشق للدلال
ف العود ليونة خيزرانة
على إستقامة غصن بان
ف العود حاجات
تفرض على النفس إفتتان
ف كفوفك الغيم السخى
عمَّال بيهطل غيث
على أرضى الجفاف
ف عنيكى مليون إختصار
على ألف باب
فاتحين على قلب العَمَار
ف عنيكى بستان أجوبة
على أسئلة ما سألتهاش
سامحينى على كل اللي يحصل
و بصراحة .... ما بِدِّهَاش
و جوة عنيكى
مكتوب الحكاية
و مين هايقدر بس ينظر
أو تطول النظرة يوصل
آخر السطر الطويل
و اللي سافر فيكى راجع
كل حاجة بيسألوه
دايما يجاوب .. مستحيل
ف العنين قصة حياتنا
و ذكراياتنا
و ريحة من كل اللي فات
ف العنين حتى الأمل
و اللي إنكتب
للجاى من الأيام رموز
طب مين ها يقدر ع القراية
و صبره يوصل للنهاية
و قدرته تساعده إنه يفهم
سر مكنون العنين
العنين كنز البشر طول السنين
و العنين
تصريح مرور للقلب من غير إنتظار
و العنين
سهمين يصيبوا القلب و الروح بالحنين
العنين جنة ...... و نار
بسهولة تفهم لما تقراهم
معانى الإنكسار
و الإنتصار
طعم الألم لون النهار
العنين
أكتر جمال ف الكون باشوفه
و أبقى حاسس بإنبهار
علمتنى عنيكى ...
فلسفة العيون
و السحر و الخير و الجنون
حسن الظنون
علمتنى أنا مين أكون
بس جوة عنيكى
لسة السر كله
و نفسى مرة أستحله
و أقدر أقراه رغم إنه
حصن من جواه حصون
بس مش قادر أقول
على رغم عجزى
إلا بس .... الله يصون
مش أزمتى ف بحور عنيكى
الخوف من الإبحار
الخوف بجد ... يلفنى الإعصار
أنا مهما شال الموج و حط
منايا بس ألقالى شط
و يبقى قلبك ... بعد ما أرسى الدار
ف عنيكى شوارع للغرباء
ميادين واسعة .....
لنزوح لاجئين
و جناين ورد
و نهر بيجرى ما بين بحرين
كرانيش على شط النهر
و ياما من العاشقين
قاعدين مع بعض
إتنين إتنين
شرفات ع الشارع مفتوحة
بيدلى الفل مع الياسمين
و من الشبابيك
سكان ناشرين ملايات بيضة
و الشمس بتحضن فيها بشوق
ف عنيكى بكل صراحة حياة
و الكون و سماه
و حاجات مش جاية لوحديها
بتقول م الحسن
أنا صنع إله
ف عنيكى مداخل للجنة
و رصيف مدهون عطر و حِنة
و لا حد بيدخل
إلا بجد ... بيتهَنَّى
ف عنيكى خيال واصل لمداه
ببساطة عنيكى
بجد حياة
فِ عنيكى بابدأ رحلتى و مافيش رجوع
و لا لِيَّا صاحِب فى الطريق غير الدموع
و بتوعدينى و تِخْلفى
و إن يوم واجِهْتِك تِحلفى
إنك ما شُفتى يوم هوى من أى نوع
يا عيون بحور الدنيا تصغر جنبها
يا ساكنة بعد الكون فِ آخر المُنتَهى
حِلمِك على قلبى العليل
يا سلسبيل دا المستحيل
إنِّ العيون دى نقول عليها عيون مَها
دنيا و عيونك كون و حُبك سَرْمَدى
مِدى إيديكى إوعِك فى يوم تِترَدِدى
سهمك و صاب
قلب الصِحاب
أنا بس وحدى اللي تَجَرَّأ و إشهدى
بتفكرنى عنيكى بأول
رسم رسمته
مش مفهوم للعالم كله
رغم إن أنا شايفه اﻹبداع
كنت باقول إزاى بعيونهنم
مش شايفين
السحر العالق ف اﻷلوان
و المكتوب أسرار ف عيونك
أكبر من وعى اﻹنسان
ف عنيكى
بتسافر سفن عبر البحار
و تتوه و لا تعرف موانى
أو فنار
كل اللي قبلى
قرروا فيكى السفر
ما بيرجعوش
و اللي رفض برضو إنتحر
دا أنا حتى قررت إنى أسافر
و القرار ... ماهوش إختيار
الدنيا ليل ..
و أنا رايح أوهبلك نهار
تذكرة السفر اللى معايا
صلاحيتها .. لحد عنيكى
على شط الرمشين مستنى
أى سفينة تعوز بحارة
و تدى إشارة
و تقبل راكب ﻻجئ ليكى
ف عنيكى المركب بيعافر
و مشاعر أشواق بتسافر
تحت الرمش رميت مرساتى
فاكر إنى ف حبك شاطر
باكتب على الأيام
كلام العشق باللهفة
و أفرش سنين العمر للخطوات ..
إذا كَفَّى
يا حب صار
ليلى و نهار أحلامى فى الدنيا
ما باطيقش أغيب
عنك و لو ثانية
ويَّا الحنين
دمى بدموع العين بيتصَفَّى
واهِب عنيكى العمر ولا وَفَّى
ندرٍ عليا يا ست الحسن
لو جيتى
لا أعلق الزينات
و أعملِّك الزفَّة
ف عنيكى حقيقى
عوامل جذب
و نظرة كأنها سهم
و طالعة تصيب القلب
و لما عنيكى بتبعد عنى
باكون مستنى
تحنى ف مرة تجينى برغبة
و موش بالغصب
أنا لما بتغضب عينك منى
الخوف يقتلنى
و أحس برُعب
لأن ف عينك عالم تانى
مداه الكون الواسع رَحْب
و كل عنيكى عوامِل جَذْب
مرسومة ف عنيكى
خريطة عمرى ف الدنيا
و أيامى اللي كحَّلْهُم
رموش جارحين
بتحلالى الحياة بيكى
و لو ثانية
ماهى الحياة
ف البُعد بتعافر
و إنتى الحياة بيكى
حياة تانية
مافيهاش أسى
و لا قلب بات موجوع
و لا عاش بيهرب زمن
ولا مختفى ف ضلوع
من غير عيونك أنا
تايه ف عمر غريب
مشتاق أشوفك هنا
مشتاق بشكل عجيب
ف عنيكى بالمح أرصفة و وداع
و إيدين تشاور و الصدور أوجاع
ف عنيكى حزن بيملا بحرك موج
و الشوق بيرحل منى فوج ورا فوج
و أنا لسة فارد باقى حلمى شراع
ف عنيكى سرى و جهرى و المكتوب
و إن حذرونى سنة
أنا عاصى قال للعشق مش راح أتوب
ف عنيكى شيئ بيشدنى
و يمنى قلبى بالوعوود ...
و يصدنى
و يجيبنى من آخر البلاد
و بدون ما يدينى اﻷمل
بيردنى
ف عنيكى كون
أقواس قزح .. من كل لون
عشق و جنون
حبة مشاعر كات جليد
و رمت بروحها ف الأتون
ف عنيكى قوة جذب ..
بتشد البشر
تخطف من العين البصر
خلتنى أقول ..
دول مش عيون
ف عنيكى ... كون
لسة الدنيا
بتضحك جوة عيونك لمعة
لسة الدنيا
بتحزن لما بتنزل دمعة
لسة الدنيا عنيكى
و رمشك باب متوارب
لسة اللحظة الحلوة معاكى
تفوت مش راجعة
و أنا علشانها تمللى باحارب
