من قبل ماعرفلك ملامح
عقلى سارح
و الهوى ... شعلق ستاير روحى
على شباك عنيه
و سافرت باﻷحلام ﻷبعد م النجوم
و بنيت قصور النور على حرف الوصال
و القلب فيه
و لاقيتني موش مهتم أصلا بالرتوش
و ﻻ بالعيون و لا بالرموش
و لا بالملامح و الوشوش
القاسي منها أو البشوش
و بقيت يقينى إن اللي رابطين عشقهم
بس بملامح فى الحقيقة .. ما يفهموش
العشق أيه
العشق أصلا م البداية
ما فيهش ليه
.. بالعقل ... و بناءا عليه
أنا روحى هامت بيكى
من غير ماعرفك
و العشق رزق .. تكون سعيد
أما تلاقيه
و بدون سوابق .. طل بدرك ع الدجى
و لا كان هلال .. عدى المحاق
و لا مرة كان المرتجى
أنعمت بالطلة السخية على البشر
طلة القمر
و عيون بتضحك معجونين بكسوف
بتقولى شوف
كده م النهاردة ... إنت ف خطر
بطل تيمم بالتراب
و مالكش حجة ف الوضوء
الماء حضر
فسبحان اللي سوى عنيك على مهله
و خلق الصعب من سهله
و شال قلبك هدية ل اللي يستاهله
ملاك ... و متصور بشر
بيطل ع الناس من علاه
طلة قمر
بتجينى ف الحلم الأخير
قبل أما أقوم
من نومى و أضحك
بابقى عارف إنه خير
بتفسريلى
اللي بيحصل ف الحياة
و كأنه هو الحلم
موش هو المصير
ما بقيتش أقوم م النوم
بدون ما تجينى
ع النسمة الحرير
تاخدينى فوق نهرب سوا
و ألقانى فجأة
بقيت باطير
و نروح بعيد عند القمر
وسط السهر
و تصدقينى إن قولتلك
أنا شوفته من حسنك يغير
و أضحك أنا من فرحتى
و أستنى علشان مُهجتى
بتجينى ف الحلم الأخير
على وش القمر منك
سنا فضى
و ليل بسماه لنور حسنك
ماهو مقَضِّى
و أنا مليان كلام عاشقين
منايا أقوله .. و أفضِّى
و منى بتهربى دايماً
و لما باقول وحشتينى
... بتتخَضِّى
وعدتك ... موش هاجيب سيرة
و هاخفى اللهفة لو شوفتك
و أدارى من العيون حيرة
و لو لمسك كفوف تانيين
فى حتى سﻻم هاطفى الثورة
و الغيرة
و لو سألونى أيه مالك ..
غريب أمرك عجيب حالك
يسكتنى إنى واعدك
موش هاجيب سيرة
وعدتك .. و الوعود مواثيق
هاعيش كصديق
و جوة الصدر قلب عشيق
و موش هانطق ما بين الناس
و ﻻ هاكتب سوى ما يليق
و موش هاضعف و أبوح بالسر
لما تمر لحظة ضيق
و مهما يكون نصيبى فى الهوى راضى
أشوفك بس أو تتبخترى قصادى
باكون راضى و أقول عادى
و باعتبر البعاد تشويق
وعدتك .. رغم إنى غريق
أعيش مربوط بتسبيرة
و لو راح أموت .. و عمرى يفوت
بشرفي ... موش هاجيب سيرة
باعترف
إن طعم العشق عندك مختلف
و إن لحن الحرف فى كلامك بديع
و إنى حاسس باﻷمان
لو كان ما كان
هامشى مشوارى لعيونك
موش هاضيع
يا جمال رقة حضورك
لما لحن الحب بيننا بينعزف
أصل طعم العشق عندك .. مختلف
أيوة موش هانكر هيامى
و إنبهارى .. و القصور اللي ف كلامى
حتى عجز الحرف عن وصف الشعور
و الجبين أبو وهج نور
و الحنين لو يوم يفور .. و تخور عضامى
برضه موش هانكر هيامي
و هاعترف
إن طعم العشق عندك مختلف
طب و دينى ....
باقفل السكة يادوب .. و بتوحشينى
و أما تبقى بين إيديا
و طيف ملامحك جوة عينى
بابقى نفسي أسأل عليكى .. صدقينى
و أما عينك مرة تهرب
م النظر بكسوف ف عينى
بابقى محتاج حتى همسة تشجعينى
عارفة نفسي ف أيه بجد
و جربينى
أسرقك من بين عيون الناس و أطير
و أكتبك قصة ف كتاب اﻷساطير
و أبقى بحرك و أبقى سرك
و أبقى بير
و أبقى عبدك يا أميرتى .. و تؤمرينى
و أبقى جيشك و أبقى ريشك
و أبقى ملحك و أبقى عيشك
و أبقى ضلك لو تبينى
نفسي مرة ف حضنى تهدى
تستكينى
متغلفة عيونك بشوق مكتوم
و مضببة عيونى بأحلى غيوم
فاكرانى موش هاقرا الحروف فيهم
أو مرة هاقدر إنى أجافيهم
واصلالى أصل مشاعرك الحلوة
و لا ممكن أبعد عن طريقك يوم
إتعززى و إتبغددى و تيهى
أنا موش هاممنى الناس
و كل اللوم
و تغيبى عنى و تحزن الأيام
و تغيب معاكى ف دنيتى الفرحة
و تعودى تانى أرجع و أقول يا سلام
و تعود معاكى ورود سنين طارحة
و حياة عيونك دول و فيهم كل ويلى
و برضه فيهم نهر حبى و سلسبيلى
أنا بيكى باصبر ع السنين السود
و باقدر بيكى برضه على المعاندة
و ع الوجود
و كفاية نظرة من العيون دى تكون أمل
و ساعتها كل الظلم كله هايُحتَمل
و كفاية وردك لما يرقص ع الخدود
ما تفكريش أنا حبى كلمة و قولتها
و العشق بادئ بس عمره ما إنتهى
أجمل حياتى الباقية بيه كملتها
و قليل قليل
لما الزمن بالعشق ع الإنسان يجود
أنا بيكى باصبر ع السنين
و أبعت حروف الشوق وفود
.... دا أنا حتى مش محتاج ردود
أمر إنتهى