ماعرفتش أمسك نفسى
من سحر العيون
و من الرموش
اللي تبان عبر المدى
و كأنها ضوء الفنار
فوق الجفون
ماعرفتش أمنع حرفى
من نسج الكلام
ماقدِرش قلبى يصوم
عن العشق ف سكون
و لقيتنى باكتب فيكى
و الشعر إفتتان
و الحرف جنب الحرف
مجبول ع الجنان
و أنا بإختصار
غارق ف بحر من الحنان
ماعرفش كنت إزاى
و بكره أيه يكون
ف ما تزعليش
من كلمتين غصبونى أقولهم
و إسمعيهم جبر خاطر
حد سهران الليالى
شهور بطولهم
عشقه واصل للجنون
الكلام لو كان يعبر عن مشاعر
لو يمس القلب و يثير الشجون
يبقى غالى
و أغلى من كل الكنوز
يبقى يا بخت اللي بيه
ف الكون يفوز
تضحك الأوراق لخده
ع الغصون
سامحينى يا أحلى البنات
ماعرفتش أمسك نفسى
من سحر العيون
اللي بينى و بين عيونك
لسة ما إخترعوش كلام
يوصف حلاوته
أو يفُك رموز غموضه
أصله صعب عشان بساطته
لسة حتى لو إتشرح للناس هاتسأل
يعنى أيه العين بتسكن جوة عين
يعنى أيه الروح تبوح بالسر فين
يعنى أيه مهما تراقبهم
مستحيل أبداً تصدق إنهم أصلا روحين
اللي بينى و بين عيونك
دنيا من سحر و خيال
فرضت على الواقع جمال
إتلون الكون بالمحبة
و تاه على الأكوان دلال
اللي بينى و بين عيونك
شوق لنظرة
و لهفة للصمت ف وجودك
زى ترتيل الصلاة
النظر ف عنيكى أصله
بعث للنور و الحياة
اللي بينى و بين عيونك مش غزل
و لا حب من نظرة و حصل
و لا حتى فتنة و إفتتان،
إعجاب و سيطر ع الكيان
و نجاح و جاى بعد الفشل
و لا هو درس و إمتحان
لأ ده ببساطة كان أمان ... كان الأمل
و شعور بيملا القلب و الروح و البدن
ما فيهوش مشاعر دنيوية
هاكون صريح .... مش بس هيا
اللي بينى و بين عيونك طوق نجاة
إشارات تشاور من بعيد
على سكتى لأى إتجاه
و موانى حاضنة المركبة
اللي الموج عشان يهديها تاه
أيوه اللي بينى و بين عيونك
يملا أوراق الكتب حكايات كتير
إن يوم حكوها لشهريار
تنزل دموعه من الرهَف
و لشهرزاد ... لازم تغير
ضحكة عيونك
راسمة ع الوش إفتتان
و بتبدر الأفراح بذور
على كل وش يبان جنان
و اللمعة فى العين و البريق
بيقيدوا ف القلب الحريق
شوق و إشتياق
و كمان حنين يطرح حنان
.
ضحكة عيونك
أقوى تصريح بالمرور
و سلاح ما يوم هاقدر عليه
و بدون غرور
إنتِ اللي قلبى عشانها زايد دقتين
و الباقى زور
شهدوا الجيران
إن العيون راسمة على الوش إفتتان
معجون بنور
مكسى بأمان ... و نقول كمان
.
ضحكة عيونك نبع أصفى من الندى
و المهرجان اللي إبتدى
باين على الكون إنه فارد ع المدى
ورد و فراش عامل مزيج ألوان
و الصخر من ضحكة عيونك لان
ماهو أصل طبع الحسن راسم
ثغر باسم
عاملة ف الروح إفتتان
.... ضحكة عيونك
كل حلم حلمته قبلك
كنتى فيه
و أما شوفتك
اللي باحلم بيه يوماتى
أصبح ناسيه
إنت ذاتك
حلم عمرى ما كنت أطوله
لما أنوله ...
تبقى أحلامى الكتير
لزمتها أيه؟
مجنون الحرف
اللي على الطرف
و ما بيتقالش
و عجيب المعنى
اللي بيوجعنا
و ما بيرحمش
و بليدة النظرة
لو منتظرة
إنها تتفسَّر للعاشقين
و حرام الوقت
اللي أنا دلوقت
باضيَّع فيه
علشان ما أسألش
هو إنتى بجد
مافيش ولا حد
سبقنى و قالك باهواكى
و لا طير يوم طار
فى سماكى و زار
البدر السهران وياكى
طب أقول الحق
أنا قلبى ما رق
لقبلك مخلوقة إلاكى
أنا م الآخر
فيكى باذاكر
و يا ريتنى أتكافئ بلقاكى
العمر قبلك
كان ظلام و إنتى الشروق
و إنتى ف كرات الدم لون
و شعور حنون،
عمَّال بيجرى ف العروق
بيوزع الفرح بتساوى ع البدن
و غرام يزيد وَيَّا الزمن
و بيملا كل ساعاته شوق
و إنتى الحقيقة ف الخيال
و الدفئ فى حضن الوصال
و الفن لما يكون بذوق
و الدنيا من غيرك غيوم
و لو إنتى موش بين النساء
عنهم هاصوم
و هاعيش ف ليلى بالأمل
كل القساوة تُحتَمل
لو إنتى من بعده .. الشروق
لما غيابك طال و ما طولتش
أى وسيلة أبعتلك شوقى
قلت أكتبلك بعض مشاعرى
حروف من شِعرِى
تلف كيانى و تِملا عروقى
و أما تروح ع القلب بتنبُض
بس بترفُض
إنك .. ألمى ف مرة تدوقى
ما أنا ما أرضاش لعيونك دمعة
و لا تنطفى فى بريقهم لمعة
ما إنتى الشمس بتسطَع فوقى
بس غيابك طال ولا طولتش
أى وسيلة أبعتلك شوقى
لو بس أقدر مرة أقولك كلمتين
و أنا عينى
غرقانة ف عيونك مبهورين
لو بس عندى الجرأة
أو ألقى الحروف
أنا كنت أقول اللي فى غيابك
بانظمه شعر و حنين
و غناوى ألحانهم
بنبض القلب طالعين مرتاحين
لو بس أعرف
أيه بيجرالى و أنا
قدام عنيكى الطيبين
و إزاى باحس
بعجز عن وصف المشاعر
و المعانى جوة قلبى
و بين عيونى مرسومين
لو بس أقدر مرة أقولك كلمتين
من عين لعين
و بحرف مرعوش ع الشفايف
لسة خايف
لو يقدِّم أو يأخَّر خطوتين
من لمسة فى الإيد
اللي حلمت ألف مرة
بضمة لإيديكى الي بتطفى الحنين
من وهج خد بيصطلى
من نار ورودك ع الشفايف
و لا نورك ع الجبين
لو بس أقدر مرة أقولك كلمتين
مقاطع شعور
--------------
(1)
و باعلن إنى مش مسئول
عن الإحساس و عن قلبى
و عن صدق الكلام ف القول
و موش فارق معايا
إذا كنت تُعذُرنى، و لا تلومنى
و لا لآمته الحكاية تطول
هاعيش معجون بعفوية
و حرية و دينى سلامة النية
و أكون للعشق بس رسول
و عن روحى اللي طايرة لفوق
و بترفرف على المعشوق
مانيش مسئول
(2)
مستبد الشوق،
و مستعصى الحنين
و الليالي مكحلة بسهد
العينين
و السؤال ...
اللي مالوهش إجابة عندى
إنتى فين؟
حاسَّة طيب
باللي أنا فيه من ساعِتها؟
سامعة مراسيل الغرام
اللي باعِتها؟
تحذرك
(كُل القساوة سلَف و دَين)
و القصاص ف الحب جايز
روح بروح أو عين بعين
مستبد الشوق بقلبى
و برضه مستعصى الحنين
(3)
و لا بينى و بينك وعد و عهد
و مهلة عشان ناخد على بعض
أنا فجأة لقيتنى بدون أسباب
القلب لنظرة يروح مِتشَدْ
و نظرة ف عينك لها مفعول
بتخلى البال
على طول مشغول
حتى التركيز
و بشكل يغيظ بيروح مفصول
مع إن مابينى و بينك سَد
و ألف طريق صعب و مقفول
و تعِبْت بجَدْ
لا بينى و بينك حتى معاد
و لا أيُها عَهْد
(4)
و كتير بانسانى
ف ضِل رموشك ع الأجفان
و أستغرب منى
إزاى أنا عاشِق للنسيان
و البحر الغرقان ف عيونك،
سافِر فِيَّا
و أنا بابعِد عنى و أتوه فيكى
شوية شوية
أنا بيكى و فيكى
باكون إنسان
(5)
طب و إن ما قولتش
زى باقى العاشقين
تفتكرى قولى يكون لمين؟
أنا كل حرف يمس قلبى
بامغنطه
و أشحن كيانه بالحنين
و أشفَّره
بالمعنى و شكاوى الزمن
و أحمِّله بسرِّى الدَفين
و أغَلِّفُه ، و أحَلِّفُه
و أترَجَّى فيه و أكَلِّفُه
ينقِل مشاعرى
..... يكون أمين
