كبر مخك

كبَّر مخك مخك يكبر
و إنت ساعتها هاتبقى أمير
و إنسى الواقع هفهف ريشك
دق على دماغك عصافير
و إمشى فى وسط زمايلك باشا
و ما تزعلش إن صبحوا حمير
كبر مخك مخك يكبر
و إنت تحس إن إنت كبير
سيبك من عقلك و كلامُه
و إنسى ملامُه إتحرَّك سير
و إوعى تسير ورا ناس خرفانه
رافعين شعارات التغيير
حبة ناس قال أيه .... طهقانة
من إمتى بيطهق فرافير؟
رافعين شعارات الحرية
ضد الكوسة و التزوير
بيعطلوا موكبنا الساير
بتأنى لعصر التنوير
سيبك منهم كبر مخك
و إمشى على دروب المشاهير
إنسى ضميرك و إسرق غيرك
و ماتقلقش السر فى بير
كبر مخك مخك يكبر
يمكن تعلى و تبقى وزير