(1)
هو أنا لو روحى هامت بيك
و سافرت للخلا
و العشق عشش ع البدن
خلَّى اللسان مرة إنجلى
و كتب كلام عاشق
بينطق فيه هواه
و الشوق كمان
دارت مع الأيام رحاه
و النوم نساه
يبقى الفؤاد بيك مُبْتَلى؟
(2)
جربت روحك
مرة تعشق روح و بس
و تنسي كل الدنيا
و الناس و الزمن
تفضل ما بين اليوم و بكره
و تنسى أمس
و تدفع اللي طلعت بيه
م الدنيا لغرامك تمن؟
جربت لما
تشوف خيال طيف الحبيب
و إنتم سوا ... تنسي النصيب
و تعيش ملاك من غير هوى
رؤية خيال خلك تطيب
و الفانى منك و لا منه ما يشغلكش
يمين دا عشق الروح غريب
(3)
الحكاية و ببساطة
إن أنا عاشق أعيش
ف الكآبة و الرتابة و الخيابة
.. ﻷ ماليش
حاولى تنسى اللوم
و أطنان الهموم
و العتاب اللي بقى
ف ريحة الهدوم
و إن فشلتى ...
إرحمينى ما تشتكيش
مرة واحدة واجهى روحك
إنك إنتى ما تقدريش
و إن ذنبي كله عندك ...
إن أنا عاوز أعيش
نفسي أشعر إنى طاير
و إن ليا جناح و ريش
و إنى حر ف لون حياتى
لو ساترني فيها خيش
موش أسافر ف اﻷمانى
و أصحى و ألقاني ... مافيش
صدقينى ... ما تنكريش
الحكاية و ببساطة
إن أنا عاشق أعيش
(4)
طب و دينى ....
القرب بيزَوِّد حنينى
و إنت بين دراعاتى
باشتاقلك
بجد و صدقينى
حسسى بإيدك عليَّا
و حسي بِيَّا و قربينى
و لو كلامى إحتاج أدِلَّة
بصى بصَّة جوَّة عينى
صدقينى
القُرب بيزَوِّد حنينى
(5)
مجرم
عشان عاشق ملامحِك؟
موش هاقول الله يسامحك
مجرم
عشان نفسى ف وصالِك
باكتب الشعر ف جمالِك؟
و إنتِ مالِك؟!!
إنى شايفك أحلى
من كل البنات و الناس
آمته كان الشوق يُقاس؟
صدقينى إن إنت عندك إلتباس
صارحى حالِك
مجرم أما أكون صريح؟
لما بارضى أبات جريح؟
لما عقلى فات دماغى
ف يوم و جالِك
ماشى جداً ..... هوه ذلك
لما شوفتك إبتدا الإجرام معايا
و صار حياتى و صار هوايا
لما أعبَّر عن شعورى
دا شيئ حلال
ربنا بس اللي عالم بالنوايا
و حبى هايجاوب سؤالك
إن أنا باعشق ملامحك
(6)
موش بإختيارك
الهوى أما بييجى
بيلَخْبَط مسارك
مهما هايكون مستشارَك
هو حُكم عليك
و حظك و النصيب
عُمره ما يكون بإختيارَك
مهما تهرب أو تسافر
مهما بالإنكار تعافر
مهما تحبس حتى روحك
جوة دارك
بعد نبض القلب
ما خبَّط و زارَك
الحقيقة إن الهوى
موش بإختيارَك
(7)
مساء الخير
لو كان الخير يقدر يرسم
بسمات ع الوِش
و مساء النور
إن كان النور يقدر يكشف
مساحيق الغِش
مساء الفل
و لون الفل بيتدارى
خجلان من وشك لما يبِش
مساء م الآخر نفسه يليق
و مناه يتحوِّل لكريستال
يعكس من عينك بعض بريق
مساء يتمنى يلف مكان
ف حضورك طل الفرح و آن
و القلب بيطلب قربك وِش
و مساء الخير على فُل و نور
لو كان النور يقدر يكشف
مساحيق الغِش
(8)
تقدرى تخبى العنين
الحلوة دى؟
تقدرى تدارى القمر؟
تقدرى يوم تمنعى الأحضان
ما بين الموج و شطُّه؟
تقدرى تلغى السهر؟
تقدرى تخلى الكلام
يخنق حروفُه؟
يموت بخوفه؟
تقدرى تخلى المشاعر
من حجر؟
إمنعينى من الكتابة
إملى أيامى بكآبة
بس أنا
ما أقدرش أوعد بإستجابة
دا الكلام طاقة سجين
بيبص منها على الحياة
الكلام قوت الغلابة
الكلام
وسط الغابات زى المطر
الكلام أرزاق و منعه
يبقى أيه غير البَتَر
تقدرى تدارى القمر؟!!
(9)
موش هابطل فيكى أكتب
عارفة ليه؟
بس علشان الكتابة
موش بخاطرى
و إن ما صدقتيش كلامى،،،،
عندك الشِعْر إسأليه
(10)
ف عنيكى حقيقى
عوامل جذب
و نظرة كأنها سهم
و طالعة تصيب القلب
و لما عنيكى بتبعد عنى
باكون مستنى
تحنى ف مرة تجينى برغبة
و موش بالغصب
أنا لما بتغضب عينك منى
الخوف يقتلنى
و أحس برُعب
لأن ف عينك عالم تانى
مداه الكون الواسع رَحْب
و كل عنيكى عوامِل جَذْب
(11)
هو أنا لو قلبى خالفنى و حبك
هابقى ملُام؟
طب يعنى إن مرة طاوعته و قلت
أجرب حظى
هاتبقى دي أيه ... حبة أوهام،
أضغاث أحلام؟
طب أصلاً يعنى قوليلى بجد
الحب حرام؟
طب يعنى إن قُلتى حلال
طب أيه؟ ... محتاجة كلام؟
أنا قلبى بقوللي إن أنا عاشق
و الحب إتحَوِّل فيه لغرام
و إن كان خوفك لا الحب يموت
طب أيه كان دام؟
طاوعينى و عيشى الحب إن لاح
دا العمر كبيره يادوب أيام
(12)
أنا من رحابِك
قد طُرِدتُ
و صدقينى ..
لا تعودى
شُفيت جراحى
من سهامك هاهنا
و إشتد عودى
ما عُدت أشكو
منكِ للدنيا ولا
نطقت شهودى
ما عاد حبك غايتى
أبداً ولا
مبعث خلودى
(13)
روحى و روحك أبرياء
حتى لو إلتقتا معا ...
عند السماء
تتجردان من الهوى
أو من حضيض اﻹشتهاء
روحى و روحك هاهما
تجدان واحات المنى
من بعد مشوار العناء
صدقينى
حين أصفك بالندى
روحى و روحك .. أبرياء
