شوفت ف عنيكى الغرام
النهاردة أنا شوفت ف عنيكى الغرام
بيدارى خوفه ﻻ يتفضح وسط الكلام
ماعرفش ليه حالك كده فكرني بسلوك النعام
بتحاولى دايما تنكري ..
و تردي بعد ماتاخدى ساعة تفكرى
و تشدي بإديكي اللجام
و بتفضحك ..... نظرة عنيكى الخاطفة
و تبوح بسر العاطفة و بتعلن الشوق و الهيام
و أنا بإهتمام ..... باضرب لصدق عنيكى
100 مليون سلام
ورَّتني ف عنيكى الغرام
طمعان ف المزيد
أيوة طمعان ف المزيد
آمته عاشق طفى ناره بلمس إيد؟
بس و حياة اللي خلي القلب حبك
و اللي رابط عمري بيكى بخيط مِلَعْبِك
راضى قُربك .. حتي راضى بإني أشوفك من بعيد
بس طمعان ف المزيد
نفسي أضمك و أملا صدرى بنهر شوق
و أرشف الشهد ف شفايفك عشق يجرى فى العروق
نفسي أجرب طعم تنهيدة وصال
نفسي أغرق فى الجمال و أرتوي بقربك و أدوق
و إن عطانى ربنا كل اللي عاوزه
هاشكره طبعا أكيد .... و أبقى طمعان فى المزيد
سَلِّمت المَصِير
مَدِّت إيديها و سلِّمت
و أتاريني سلِّمت المصير
داخل بقلب كما اﻷسد
ماعرفش ليه راجع أسير
سبحانه من خَلَّي الضعيف يصبح قوى
لما القوى بقى له كسير
ملكت فؤادى بضعفها
و المنتهى فى القوة لما تكون ضعيف
ما يغركوش شكل اﻷسد
راح يعمل أيه فى القلب لما يكون رهيف؟
أصل اﻷسد ما بقاش أسد .. من يوم ما صار حلو و أليف
بيطاوع القلب الكبير
مدت إيديها و سلمت ... و أتارينى سلمت المصير
شبه إعتراف
(1)
غمزة بعين تسحر ألوف
و لا حد شاف
و حروف بتنطق بالهوى
و لسانها خاف
موش باطمع أكتر من كده
حتى كده أنا شايفه م الإنصاف
ماهو أصل قلبى ف الغرام
راضى بكلام
ترجمته تبقى ليا أنا ..
شبه إعتراف
(2)
ضحكة عنين ساعة اللقا
حمرة خجل فوق الخدود
نظرات بتهرب من عنيك
معناها ليك يبقى الوجود
و رسايل الإحساس طرود
شيلاه ملايين الوفود
أنهار محبة و الغرام
طارح على كل الضفاف
و أنا برضو فى دنيا الهوى
يكفينى من عين اللي أحبه
لو غوى .... شبه إعتراف
لَــمَّا بابتِـــــدى
بدأت معاكى القصة و الموَّال
و إتسرسبت منى المشاعر
زى شهد و سال
ما يهمنيش مين اللي شاف
مين اللي خاف
مين اللي نقل القصة عنى
و راح و قال
أنا بس لما بابتدى ...
الوقفة عندى محال
المـــــراية
تاعبِك معايا
و التعب ف حياتى ما بيعرف نهاية
كنت أكتر حد بارتاحله ف حياتى
كنتى صاحبى من البداية
بتشوفينى و تضحكى أضحك معاكى
و تحتوينى و تهمسي بأصدق وشاية
و يشاورلى حضنك الممدود فضا
على أى عيبة ف هيئتى
على بدلتى
على أى شيئ محتاج عناية
و أما أخرج أسمعك، ..
و بسرعة أرجع أودعك
و يطول غيابى و لما أعود
أرجع عليكى و نبتدى سرد الحكاية
عايز أقولك و بصراحة
عندك إنتى بالاقى كل هدوء و راحة
و إنك إنتى بس موش حتة مراية
إنتى أصدق حد بيقوللى الحقيقة
و اللي بينى و بينك أكبر
من ترانيم الغواية
يا المراية
موش عارفة
ماعرفش .... موش عارفة
دى إجابة دى؟ .. ولا دى كات وصفة؟
طب قولتى أيه؟ ..... تجاوبى موش عارفة
طب رأيك أيه ... و الله ما أنا عارفة
طب قولى أيوه
طب قولى لأه
طب قولى خايفة
طب قولى مهلة و لسة و هافَكَّر
طب قولى ردى عليك هايتأخر
طب جاوبى مرة إجابة مختلفة
مع إنى مؤمن بياما لسة نتعلِّم
ما بقيتش عارف حد بيترجم
معنى إجابة .... لسة موش عارفة
أجمل وردة ف الصُحبَة
مجدولة روحى بضفاير حبك الأخضر
و مسبسبة القصة على الجبين أنور
مفتون يا قلبى و الفِتَن ألوان
و لا حد شُفته على الغرام يقدر
ما كفاية غُربة
يا أجمل وردة ف الصحبة
يا شمس ف دنيتى الرحبة
يا كون مسكون بمعنى الحب
يا شبابيك على الجنة و متواربة
صباح الفل يا معنى الجمال كُلُّه
و يا نور إحتضن ضِلُّه
يا ملكة بين بنات الحور ...
و متعاجبة
ممكن أكون
ممكن أكون مجنون أنا ............ ممكن أكون
ممكن أكون .. برضو بحاجات مفتون
ممكن يخالط حكمى ع الأشياء رياء
ممكن يكون إحساسى بالذات ........... كبرياء
ممكن يكون تنشيف دماغى ده غباء
ممكن و يمكن كل شيئ ممكن يكون
بس الأكيد إنى أنا ..عايش بقانونى أنا
ما يهمنيش وقفة طابور ف الدور .. سنة
ما يهمنيش كتر العَنا
بس المهم إن الأهم
أكون أنا .. هوه أنا
و لا يوم على ذاتى أهون
ممكن و ممكن .. و اللي ممكن راح يكون
موش خايـــف
موش خايـــف
أنا عشت موش خايف
ماليش ف الدنيا و بريقها ..
و لا بيشغلنى يوم ضيقها
ماليش ف البهرج الزايف
رغم إنها بتبوس عتبتى عشان ألين
و تشاغل الأهواء بلين
و شمال يمين ... و أنا باعمل إنى ف ضلمة
موش شايف
أصدق ما فيا لحد يوم الدين
إنى مانيش هايف
قيس الكلام ع الفعل .. متطابقين
و عشان كده تلاقينى ... موش خايف
عشِقْت الآن
راح يبقى قليل
راح يبقى قليل
لو أجيب الدنيا دى كُلَّاتها
ف صرة منديل
لو هاقطف
من أوراق الورد الناعم لون
و أجيب الريش
من كل طيور الدنيا لقلبى
و أصنع أحلى جناح مع ديل
و أطير و أرفرف
فوق ف سماكي
أجيب النسمة لحد الليل
راح يبقى قليل
و إن مرة حاولت
أغزل من كل حروف الشعر كلام
و حايلت شيطان الوحى
و بوست على دماغ الإلهام
أسمع جوَّاية بعد عنائى ملام
ماهو أصله كلام
ما يليقش بحبك جواية
و لا ده منايا ...و لا أصلاً كانت .... دى الغاية
كان أملى أغزلك من أشواقى الصافية ديوان
بيعبر عن صادق حبى،
كلمات من نور و حروفها حنان
مع إنى مصدق إن لكل حقيقة أوان
إنما كان نفسي أقولك إنِّى
..
عشقت الآن
باحكيلك و أشعُر بالراحة
ماعرفش أتخيل نفسى
بدون ما أحكيلك و تردى عليا
و اسرح فى كلام مالهوش آخر
و إنتى بحنية توافقينى
و بطيبة و ذوق
تتسابىى جوة بعفوية
و كلامى معاكى كأنه غسيل للروح بالنوح
من غير ولا دمعة ولا قسوة
بتعالجى العقد النفسية
و يطول القول بكلام عادى و كلام هادى
و كلام معقول
و كلام بيصحح مفاهيمى و بكل أصول
و لسانك بينقط سكر
كل ما أفكر
إزاى أنا كنت تايه عنك
كنت مقَصَّر
و إزاى البدر بيملا السما
و أنا عينى اللي رمدها بينكر
ماجراش حاجة .. ماهو أصل ساعات العين
بتكون لغسيل الأجفان محتاجة
بس اللي هاممنى حقيقى بجد
إن كلامنا .. أبو مية معنى
يفضل يغسل زيف أسماعنا
و يحرك فينا مشاعر تخلق إبداعنا
ماهو أصلى بكل صراحة .. و كل بجاحة
ما أعرفش أتخيل
نفسى بدون ما أحكيلك
و أشعر بالراحة
مين ما يحلمشى
و مين فينا ما يحلمشى
بحبيب آية؟
ونيس و حسيس
و فى ساعة الصفا مراية
فى وسط الدمع ضحكاية
و ساعة الجد
تحت الشمس ضلاية
و لما الدنيا ترمى حمولها
بقساوة .. و تتساوى
الصحاب فى البين
بييجى يشيلها و يايا
و مين فينا ما يتمناش
يصادف قلب زى الفل
مليان حب يكفى الكل،
وسط العتمة شمعاية
و حنيَّة ف ليل قاسى
يطبطب بس و يواسى،
و يمسح بالكفوف راسى
بلمسة تزيح جبال الهم، ..
إنسى يا عم
مهما تكون جراح ... تتلم
نام على صدرى تغفيلة
هاتصحى للألم ناسى
لكل اللي إبتدا نهاية
تحت شبَّاكْهَا
و فايت تحت شبَّاكها
و عينى إتعلَّقت بيها
و باب شرفتها كان مفتوح
دعيت ربى يجود قدرى
و ألمح نظرة ف عنيها
ساعة طلت
كما بدر ف سماه ع الكون
دعيته يصون و يحفظ للبشر آية
...
و يكتبلى إنى أعيش مفتون
و من حظى لمحت السحر ف عنيها
وقف قلبى
و رجلى إتخشبت ف الأرض
باصص بإنبهار ليها
رمت وردة و ضحكت نص ضحكاية
عملت أنا منها فى الأحلام
بداية قصة و حكاية
و شِلت الوردة
فى حضن الكتاب لسنين
و بارويها بدمع العين
كانت تدبل ..
لكن تأثيرها جوة الروح
أمل و يقين
و من ساعة ما شوفت البدر
و أنا مأسور
و موش شايف لغيره نور
على الشباك عيونى مثبته المنظر
يا ريت يظهر
يقوللى ف مرة عدى السور
ما عْرِفْتِش أقول
ما عْرِفْتِش أقول
(1)
قولتلها بحبك ردت تسأل قولِّلي إزاىْ
حسيت بسؤالها بيُصرُخ جوه أنين الناىْ
طبطبت و قولت أحاول أفسر
قمت حاولت ...
و حاولت كل حروف الشعر معاىْ
ما لقيتش كلام على قد مشاعرى
نسيت ف غرامها اللي مع سير دمى بيجرى
أبيات شعرى
و أنا أصلى بلغة الهوى .. نساىْ
حسيت بالبكم معشش ف لسانى
علشان على كلمة حب بتسألنى
و بِتْقُولِّلي إزاى
(2)
ماعرفتش أقول إن هواها
نفسى الداخل
و بيطلع زفرة لبعد نجوم السما واصل
و بيرسم بالنجمات علامات
بتضوى ف ليل الناس أنوار
(3)
ماعرفتش أقول إن هواها
ضحكة أطفال ف نهار العيد
لابسين بسعادة كل جديد
و أنا بارقب لمعة ف عيونهم
و القلب سعيد
(4)
ماعرفتش أقول إنى بقيت غير، و إنى بقيت طير
يفرد جناحاته يحلق فوق، مع إنه لسحر هواها أسير
(5)
ماعرفتش أقول، إنى بقيت باضحك من قلبى
و إن بقت كل الناس عارفة، مع إنى باظن إنى مخبى
(6)
ماعرفتش أقول
إنى بقيت حالة ف عنبرها
و إن أنا من قلبى باقدرها
و إنها ببساطة بتبقى دواى
مع إنى أنا أصلا بقى رغاى
ماعرفش البكم اللى مسكنى
ماعرفتش أرد على سؤالها، بتهوانى إزاى
(7)
يمكن علشان الهوى أفعال؟
يمكن بقى صعب إنك تحصر
مضمون الهوى فى كلام يتقال
يمكن علشان تلقائى ف حبى
و متفاجئ من أى سؤال
يمكن علشان موش ف الممكن
إنك توصف بحقيقة .. خيال
(8)
يمكن علشان أنا موش دارس
و الحب مذاهب و مدارس
و انا أصلى باحب و بالفطرة
لا قصدت اكون عاشق أبدا
و لا قاصد إنى أكون فارس
يمكن علشان العشق لغاى
ما جاوبتش لما بتسألنى، بتحِب إزاى
ودَّعت خـــــــوفى
(1)
ماعادش هواكى شئ يِمكِنى كِتمانُه
يا فرحة عمر عاش بِيدَارى أحزانُه
و بعد اليأس من ضِحْكة
و بَعد ما طالت السِكة
على شطك رجع قلبى لأوطانه
و لا عُمْرُه حِلِمْ يرجع
و لا كان يوم فى حُسْبِانه
و بعد الزيف و نار غِشه
و بعد الطير ما لَقَى عِشه
و داب من مُرْ هِجرَانه
و بعد ما حس بالفرحة
غيطان طارحة
مايقدر يوم يدارى الشوق
شواهده برضه بيبانو
(2)
ماعادش هواكى يتدارى
ما عادش هواكى شئ يِمْكِنى نُكرانه
لما بتشوفك عيونى
بتُحضُنِك تِقْفِل رِمُوشْها
خايفة عنِك يبعدونى
خايفة أى شئ يحوشها
يفضل الطيف كحل عينى
و أنت مالى عنيكى خوفها
مِ الهوى لما يشوفونى
ولا لما الناس تشوفها
(3)
بس أنا ودَّعت خوفى
حتى بصى حتى شوفى
قلبى بيدق بغرامك
صوتى بيردد كلامك
و إنتِ لسة عيونك الحلوة
بتهرب من كُسوفها
مستحيل هاتدارى حُبك
مستحيل الكلمة تهرب من حُرُوفها
و النهار أيه لو هِرب من صافى نُورُه
و الكتاب من غير سُطوره
يبقى عمرى بدون هواكِ
زى زهر بدون عطوره
زى كلمة بدون حروفها
و إنتِ لسة عيونك الحلوة
بتهرب من كسوفها
ما تلاوعينيش
(1)
نظرتك لما تشوفينى تقول كلام
عنيكى بترد السلام
كل لفتة تقوللى حاسة بالغرام
دوِّبوا قلبى اللى بيقولك حرام
إرحمى القلب اللى بعنيكى إنشغل
كل حاجة فيكى بتقوللى حصل
و الخدود الوردى يكسيها الخجل
تدى قلبى ف الهوى ألفين أمل
ما تلاوعينيش ....
ما تجاوبينيش
بس إوعى مرة تسرقى منى الأمل
... خلينى أعيش
و لو دا حلم سيبينى فيه
... ما تصحينيش
(2)
سيبينى عايش فى الخيال
و إن ليلى طال
أنا عيشتى من غيرك محال
... كده ما تساويش
ما تلاوعينيش
بس بكلام ما تجاوبينيش
و إمنحى قلبى الأمل
خلينى أعيش
نظرة من عينك إجابة
أقوى من كل الكتابة
و الألم ما بينتهيش ... ما تلاوعينيش
مافيش غيرك
مافيش غيرك بالاقى معاك راحة بالى
و صوتك غنوة تحلالى
و بين إيدك يا روح قلبى
عذاب الدنيا يِهْنَالى
بعيد عنك ...باكون محروم من الجنة
و لا بافرح و لا أتهنَّى
و لا غيرك عزيز غالى
و لا عمى و لا خالى
(2)
مافيش غيرك ملا قلبى اللى كان خالى
و حسسنى إن أنا عايش
و بيه جددت آمالى
و عشت الحب حلم كبير
مكانه ف السما عالى
(3)
ما فيش غيرك مسح دمع السنين م الخد
و ضم القلب ضمة بجد
و طبطب فوق سنين عمرى
و عوضنى عن العمر
اللى فات يجرى
و خلَّى الدنيا تصفالى
(4)
ما فيش غيرك رسم ضحكة على خدودى
و لا حسسنى بوجودى
و هَوِّن من عذابى كتير
و كان جنة بتستنى
وصولى ف آخر المشاوير
و كان الناى ف موَّالى
و لا غيرك يا روح قلبى
ملا قلبى اللى كان خالى
أنا العاشق
(1)
أنا العاشق و حابس فى الضلوع شوقى
و أنا الجارى هواكى دم فى عروقى
و أنا المسكين يهون حالى على اللايمين
و ليلى حزين و صوتك فجرى و شروقى
(2)
قصاد عينى و تحرمنى العيون منِّك
على لسانى كلام يهرب و لوْ إنِّك
ساعات باشعر بإن عنيكى قاريانى
و قاصدة إنك تقيدى لهيبى من ضَنِك
(3)
و رغم القرب مش حاسس وصال بينَّا
و لو غبتى و فوتِّينى كأنى خرجت م الجنَّة
و لا قربك مريَّحنى و لا بُعدك مفرَّحنى
و لا الدنيا بقسوِتها بِتِدى للِّى يتمنَّى
(4)
و لما القلب يتألم أقولُّه خلاص بقى إنسى
يقولِّلى مسيرى أتعلم ألاقى لمركبى مرسى
دانا من غيرها دقاتى ما ليها لزوم
خلاص قلبى لها سلِّم و لو تُهْجر ولو تِقْسى
(5)
و إنتِ تقرَّبِينى يوم و و تسقينى البعاد أيام
و أنا ف يمك نسيت العوم وأنا اللى كنت قال عوَّام
و لو تعذيبى يرضيكى أنا موافق و لو بعيونى أفديكى
على جفونى ينام النوم و أنا سهران مع الأوهام
(6)
أناجى الليل و أحزانى و أملى ف رقتك باقى
و لو تِقْسِى هاقول تانى و أطَفِّى النار بأشواقى
أنا عندى يقين فِيكى و لو طالت خَطَاوينا
مسير الدنيا تِدِّينا و تبقى نَدِيمى و السَاقى
(7)
وأنا أملى من الدنيا أكون جنبك
تداوينى رموش عينك
يدَفِّينى حنان قُرْبِك
و لمسة إيد بتمسح كل أحزانى أقول تانى
ما باشبع من هواكى يوم و لا قربك
لسة عنيك بتتسائل
(1)
و لسة عيونك
التايهين بتتسائل
و لا مكفيها نظرة عينى بتجاوب
و أنا العاشق لكن لسة ماهوش طايل
و أنا التايه و رمش عنيكى كان قارب
و كان حاجب بكل دلال بيتخايل
و أنا العطشان و لو هايموت ماهوش شارب
سوى شهد الرضاب من ثغرك السايل
و لسة عيونك الجارحين بتتسائل؟
أنا من لوعة التباريح تاخدنى الريح
و تملا شراعى بالتنهيد و بالتسهيد
و بحر هواكى لو يصفى يفوتنى جريح
و أنا الطير اللى من حبك نسى التغريد
و طار بجناحه فوق عشك بدون تصريح
قبض شبكك على قلبه اللى لسة وليد
و برضه عيونك الجارحين بتتسائل
(2)
و أنا حالى إجابة لكل عين تنظر
و مهما باشوف عذاب منك باعوز أكتر
و أنا اللي كان ف يوم مغرور و كان أخضر
و كان فاكر بأنه فى الهوى أشطَر
صبح متصاب بسهم عنيكى و مهاود
و لا غيرك يشوف بعنيه و لا بقلبه كمان يُشعُر
و لا لغيرك كلام قايل
و لسة عيونك التايهين .... بتتسائِل
أبدأ منين؟
من إشتياقى و الحنين؟
من لهفتى لرمش العنين؟
الدبلانين ... المليانين شوق السنين
أبدأ منين؟
من دق قلبى اللى إنشبك
و عِشِقْ يعيش جوه الشبك
من فرحته .. من لهفته
حسيته هايمان مرتبك .. مليان أنين
أبدأ منين؟
من الخطوط فوق الورق
من الفؤاد اللى إتسرق
و برغبته فـ بحرك غرق
و السهم جواه إترشق
ليه بتفوتيه تايه فى تيه
من نار حنينه إتحرق .. و يروح لمين؟
أبدأ منين؟
من النهار اللى إختلف
من فكر وياكى إئتلف
و زهر عمره أهه قطف
و لفهم صحبة
و برغبة فوق رهبة
شالهم بين الإيدين
بهواه متغلفين
و بيسألك بالعين
أبدأ منين؟
أنا فارس
(1)
يا ظالم فى الهوى قلبى و قدرت تخون
و ناسى الحب و هوايا عليك بيهون
أنا ممكن أكون خايف على شعورك
لكن عمرى ما يوم هاقدر أكون مجنون
(2)
أنا فى الحب مش صياد يا طيرى
و أضحى بفرحى لو تدمع عيون غيرى
و أنا فارس على باب الأدب حارس
و لو كل البشر مالوا أنا باقى على سيرى
(3)
و مهما الحُر شاف يفضل فى نفسه حُرْ
ولو يوم ضحكت الدنيا و شاورتله بزينه تِغُرْ
يدوس ع الزينة لو حتى جبال من مال
و يستبدل بزخرفها شرف يمكن بطعم المُرْ
(4)
أنا ماقدرش أكون خاين لعشاقى
و لا هاقدر أبيع بالحب أخلاقى
و لا يمكن فى يوم هاقبل أكون تافه
و لو ضاع الشرف منى ...
ماليش من بعده شئ باقى
