بِيِكفـــينى
و يكفينى ... إنى مهما عيون تشاغلنى
و حتى عيوني يوم ما تميل
أقول و لا زى نور عيني
و أشوف العُمر كله بخيل
زرعتك وردة ف الغيمة
و قاعد وحدى ف الخيمة
بيلفحنى الهجير ع البُعد و الأيام بلا قيمة
و مستنى بقى التساهيل
و راسمك صورة ف الأحلام
ماهيش لا جنان و لا أوهام
و لا تخاريف ليالى العشق
أو رشوة لطيف إلهام
و أعيش ألعن ف ويل الويل
بيكفينى إن بيني و بين عيونك ميل
و صبر و لو هايبقى قليل
و فكرة عن أصول العشق
أنضف من نجوم الليل
و لسة العمر برضه بخيل
كِلْمِة
حبيبي
كلمة حبيبتي ....
موش دليل ع الحب
و لا حتي روحى أو حياتي ......
أو تفانين الغزل
الحب إحساس بالحياة ما بينتهيش
الحب شيئ ... فيه يستحيل
تشعر ف مرة بالخجل
من نظرة حايرة بتشهى
من لهفة و ﻻ يوم تنتهى
و لا من يقين معجون أمل
الحب ترجمة الحياة بلغة جسد
الحب ... آه م الحب
الحب شيئ زى العسل
ضحكتك
و ألمح ضحكتك كغريق
فى وسط الموج
يشوف طوق النجاة قرَّب
و أشوف الكون
براح بين الرموش و أبدأ ...
فى رِحلة عِشق أتغرَّب
و مهما يطول معاى صدَّك
ما يوم بالمح
لقلبى اليأس يِتْسَرَّب
عرفت الحب
فى لهفة عيونى عليك
و صدرى اللي إتملا بحنين
بقى بالصفح مِتْشَرَّب
من غير
ما أقول
من غير ما أقول حرفين ف سَطْر
و بيت ف وسط قصيدة يرقص
زى شِعْر
شايفاكى عينى و قلبى حاسس خطوتك
و إن كان عليا ... أنا عُمرى مَهْر
و لو على الحرمان صحيح ما يهمكيش
أنا أصلى كل حياتى صَبْر
أنا بس نفسى تكونى عارفة إنك قدر
و إنك كما الأيام
بتتكرر ف عُمرى و تبقى دَهْر
و تبقى أسابيع من حنين
و بتبقى بين و بتبقى لهفة ف كل شَهْر
و كونى عارفة إنك يا دوب ممكن تشاورى
و عقلى قبل القلب واقف عسكرى
مستنى أَمْر
و إنى عشقك جوة قلبى
زى حبات المطر ... و مالوهش حَصْر
و إنى مليان حب ليكى
بدون ما أقول حرفين ف سَطْر
إمنعـــيني
إمنعينى
إنى أرسم الصورة الأهم
ف كل لحن ها يتسمِع
إمنعينى إنى أكتب الإسم الحرير
على صدر عمرى ف بيت صغير
هو إنتى فاكرة هايتمِنِع؟!!
كل بس اللي ها يحصل
إن قلبى ها يتمِزِع
و أرسِمك
و أكتب حروف إسمك بدون
أيتها لون
على كل راية عشق ممكن تترِفِع
حتى قلبى لو ف مرة هاتسمعيه
هاتلاقى دقاته إبتهال
دعوة و أمانى ف الوصال
اللي ما منه يوم شِبِع
إمنعينى ...
بس عُمرى ما هاتْمِنِع
الحرف
نون
الحرف نون
و غلاوته من نِن العيون
و حلاوته لما يكون قَسَــمْ
شاهد على ما يسطرون
تكوينه ف الشكل إنسيابى
و نقطة الحرف ف سكـــون
لو يبتدى بيه الكلام يصبح ندى
لو ينتهى بيكون حنـــــــــون
معجون بسحر و من هواه
بدأ الجنــــون
و اللايمين على عشقى لِيه
و بيتهمونى بالمجون
ناس غلبانين من غير جدل
بس الأكيد ... لا يعلمون
كنز
يزيـــد
مِدِّى إيديكى
الوَرْد له مواعيد
و الفرح ..... زَيّْ الحُزن
ها تاخدى منه ... يزيد
ما تضَيَّعِيش عُمْرِك هباء
و لا تِزْرفِيش دمعِك .. ما بين الناس
و تدارِى عِشقِك ف الخفـــــــــاء
النور أصَحْ .... أكيـــد
مِدِّى إيدِيكى و إقطُفى وردِك
إوعِى الندَم
يصبع نَغـَـــم ... و نشيــــد
الحب كِنــــــزْ
بتاخدى منُّه .... يزيــــــد
إلا
العواطف
موش قادر أعمل
نفسى موش عارف
و ﻻ عارف أعمل
روحى ف التوهان
و ﻻ أشوف عنيكى
و أقول بريق عابر
و ﻻ حتى أجبر
عينى ع الزوغان
روحى بدون نظرات عنين هامت
و قيامة قامت لما كنا وكان
أنا أصلى مؤمن إن عشقى نصيب
و القلب يعشق لو يحين اﻵن
أنا بس نفسي
إنى أقول كلمة
معظم جوارحى بتيجى بالعافية
إلا العواطف ... شرطها التحنان
من
قَبـــلْ
من قبل ماعرفلك ملامح
عقلى سارح
و الهوى ... شعلق ستاير روحى
على شباك عنيه
و سافِرْت باﻷحلام ﻷبعد م النجوم
و بنيت قصور النور على حرف الوصال
و القلب فيه
و لاقيتني موش مهتم أصلا بالرتوش
و ﻻ بالعيون و لا بالرموش
و لا بالملامح و الوشوش
القاسي منها أو البشوش
و بقيت يقينى إن اللي رابطين عشقهم
بس بملامح فى الحقيقة .. ما يفهموش
العشق أيه
العشق أصلا م البداية
ما فيهش ليه
..
بالعقل ... و بناءا عليه
أنا روحى هامت بيكى
من غير ماعرفك
و العشق رزق .. تكون سعيد
أما تلاقيه
و بدون سوابق .. طل بدرك ع الدجى
و لا كان هلال .. عدى المحاق
و لا مرة كان المرتجى
أنعمت بالطلة السخية على البشر
طلة القمر
و عيون بتضحك معجونين بكسوف
بتقولى شوف
كده م النهاردة ... إنت ف خطر
بطل تيمم بالتراب
و مالكش أعذار ف الوضوء
الماء حضر
فسبحان اللي سوى عنيك على
مهله
و خلق الصعب من سهله
و شال قلبك هدية ل اللي يستاهله
ملاك ... و متصور بشر
بيطل ع الناس من علاه
طلة قمر
أول
مرَّة
و ﻷول مرة ...
باخاف م الخوف
و باحسس على نظرة عينى
خايف ﻻ تشوف
و باخاف الكلمة ف يوم تطلع
محتاجة حروف
و ﻷول مرة
أحسب
للشعر اللي باقوله
عرض و طوله
و أخاف ﻻ يبان
الواصف عاشق للموصوف
و تبان علاقات العاطف
دايب ف المعطوف
و ﻷول مرة أتردد موت
و كلامى بيصرخ
من دون صوت
و ﻷول مرة
أكدب على روحى
و أقول دى ظروف
أنا حالي إتغير و إتبدلت
لقيتنى باقول
...إعمل
معروف
و ﻷول مرة
ألقانى ضعيف
و اﻷغرب إنى ..
مانيش مكسوف
و ﻷول مرة
ف عمرى لقيتنى
باخاف م الخوف
الحب
جــــاه
الحب جاه
و الوِد ترنيمة حياة
و العشق
ترتيل الصلا ف حضرة إله
و وضوء بنور الروح
و تهليلة طواف النفس
من غير إتجاه
وسط الملايكة المِحْرِمين
و بياض قلوبهم
زغلل البدر ف سماه
الحب مذكور ف الرسايل كلها
و الحب ترجمة الوصايا
تشوفه ف عيون الصبايا
و هو أصل المشكلة أو حلها
و تشوفه قنديل ل اللي تاه
الحب جاه
قلب
حنون
قليل لو يسعدك حظك
و تلقى ف مرة قلب حنون
قليل فى الدنيا لو تعتر
ف ناس موش دون
خلاص من كتر ما شوفنا
بشر موس ناس
بقينا نقول ياريتنا نعيش
حياتنا بدون
فلما ف يوم نصادف ناس
عشانها العمر نفسه يهون
أكيد كل اللي كان ممنوع
يشاوروا عليه و كن فيكون
قليل لو يسعدك حظك
تشوف ف الدنيا ...
قلب حنون
علمتينى
أكون إنسان
علمتينى أكون إنسان
و عشقتك من أول لحظة
أصله بيبدأ م العنوان
سحر حضورك، فايض نورك
الحرف المعجون بحنان
من غير ما أوصف،
من غير ما أحلف
أصل الفعل أكيد بيبان
و إنت كلامك كل كلامك ...
كلمة بكلمة كأنها هانم
خارجة و بتنقي الفستان
و بتحتار ف العطر اﻷقوى
و اللي يناسب جو اﻵن
عقلك قلبك .. كل جوارحك
هو اللي مخلينى أصارحك
يا اللي بعطف كبير من قلبك
صرتى مراية للغلبان
و اللي إتعلم منك يبقى
مهما مشاعرة تفور ... إنسان
و إنه يسيطر حبة بحبة
ع المفتاح و يصون الضبة
و إنه يعيش بهواه ف أمان
و إنه إن حتى الدنيا إتمايلت
جات أغراته ف يوم و إتحايلت
يفضل ف عيونك إنسان
إنه ف عز الثورة ما ينسي
إنه هايخسر لو يوم يقسى
و إنه هايكسب لو بحنان
و إنه هايفضل دايما أفضل
لو حافظ يفضل إنسان
علمتينى و كل علامك
ف اﻷخلاق بيعلى مقامك
و إن الدنيا قبل ما أشوفك
صبَحِت فى طى النسيان
أنا
هاعتِرِفْ
أنا هاعترِف ......
و بكل راحة
هاقول كلامى و أنصرِف
و بدون ضغوط
و لا حتى إلحاح ف السؤال
و بدون ما حتى نَخْتَلِف
أنا هاعترف
العشق موش رهن الملامح
و القوام و الحُسن
و الشعر اللي سايح
أو لتصنيف البشر أجناس
شرايح
الغرام ماهوش إنتقائى
الغرام حادث فُجائى
ست ممكن تبقى عادى
و لو تشوفها .... تبقى رايح
أصل أصل العشق أبداً
موش ملامح
العِشْق
الأخير
من يوم ما قلبى
ف مرة دق برتم غير
من يوم ما حسيت
إنى باهتم بكلامك
و إنى باسهر و إنى باسأل
و إنى فى الأغلب باغير
من يوم ما قولت
ف وصف بنت كلام كبير
من يوم ما حسيت
إنى نفسى الدنيا تسمع
يوم ما كان أملى
أنى أعمل بس شير
أنشر على الدنيا إبتسامتك
يوم ما كان حلمى إنى أقدر بس أطير
أخطف حبيبتى
و أروح بعيد بعد الفضا
من يوم ما كان كل الأمل
إنى ألمس الخد الحرير
من يومها حسيت إنى عايش
و إنى عاقل و إنى طايش
و إنى رافض خط سير
و إنى بس .. النجم بيلف ف مدارك
و إنى دارك
و إنى موش فارق معايا
لا الحكاية
و لا النهاية
و لا المصير
و إنى نفسى
إن كنت موش أول هواكى
أبقى ف العشق ...
الأخير
مَقْسُوم
آمنت إن المصير محتوم
و قلت خلاص كفانى اللوم
و حتى اﻹعتراض برضو مالوهش لزوم
و سبت مصيري بين يَدِّك
كما المحروم
و موش خايف و لا قلقان
ﻷن حنان قليب مليان
بعطف و شفقة ع الغلبان
أكيد هايشوفني بيهم يوم
و سبت الأمر للمولى
و متأكد مافيش أحلى
من العشق اللي عاش مكتوم
و فجأة بتتفتح طاقة
تقولُّه إتهادى برواقة
مابين مشتاق و مشتاقة
و صَرْبعتك ماليها لزوم
آمنت بحظى ويَّاكى
آمنت إن الهوى ... مقسوم
قَسَــــــمْ
قسما بالسهد اللي مكحل نظرة عينى
و يمين بالوجد اللي ف قلبى و اللي كاوينى
و الرعشة اللي ف صوتى براهين
و مشاعرى بتحلف ألف يمين
إنك قلبى ..
و إنك روحى ... و إنك عينى
و تغيبى .. تغيب الضحكة أوام
و الحِلْ اللي بياخدك منى
أنا شايفه حرام
و الجنََّة وصالِك لما النار
متقادة بشوقى على حنينى
ما بلاش بقى تقسي على حبيبك
رقى و لينى
قسما بكلام عمرى ما قولتوش
إن الدواوين المطبوعة .. من حبى رتوش
و إن أنا لو فزت بحبك يوم
ما تساعى اﻷوراق دواويني
عِشْقِكْ
سَفَرْ
عِشقِك سفر
و البُعد عنك
لو ساعات غلطة
و ساعات يكون
بعض الغلط لا يُغتَفَر
و أنا عشقي رحلة
و البراح ممدود
و الدنيا واسعة
و شوقي ماله حدود
و إنتى اللي شمسك
ساكنة عين القمر
و أنا أعمل أيه؟
عشقك سفر
قَلْبَكْ
وَطَـــــــنْ
تصدق لو مافيش فى الكون
سوى قلبك وطن
ما هاحس بالغربة
و لا هاشعر ف يوم بفراغ
و ﻻ هابقى ف يوم روميو
و لا ممكن أكون زوربا
أنا بيك إكتفيت م الناس
و م الدنيا و م الاحباب
ومالي عليا ايامى و أحلامي
و لما تهل قدامى
بالاقى الشوق بقربك داب
و صورتك للسما قبة
و ﻻ مرة هاكون وياك
و قلبي يحس بالغربة
أَكْـرَمْلِى
إنى أفُوتَــك
غمزة بعيون الصحاب
ساعة التلاقى
خلصوا الصبر اللي باقى
و لاموا بعيونهم و بان
حتى الشماتة
و فسروا تعابير عيونى
و ترجموا كل إلتفاتة
و كانوا بيعدوا النفس مع دق قلبي
و كات عيونهم غايصة
جوة المستخبي
دم قصتنا مغرق رمش عينهم
و بلسانهم
قطعونا بشكل راقي
و كرروها ... كل ما يكون التلاقي
و إنت .....
ليه فايتتى وسط حيرة
ليه بتقبل نبقي سيرة
ليه و لا فارق معاك
الناس و لومهم
بس لو كان الكلام فى حقى جارح
ليه ف لحظة تعوم بعومهم
الغريبة أنا كل مرة لما أفكر
بالقى إنك موش مقدر
و الحياة ف عرفك تسالي
و إن سألتك ....
ينكشف أمرك قبالي
غلطتى ... و بادفع تمنها
غلطة بعت كتير عشانها
أصل إخلاص المشاعر ...
الحقيقة .. راح زمانها
و صار وجوبى أصلح الغلطة القديمة
روحي مهما عملت هانت
عمرها ما ترجع سليمة
بس أكرملي إنى أفوتك
مستحيل أغرق ف صوتك
مستحيل ...
هاغرق ف صوتك
كِبْـــــرِيَاء
مستكترة تعترفى إنك
لسة بتحبيني
و معاهدة نفسك ..
إن يوم ما تليني
و معاندة حتى العند ف مشاعْرِك
و الشوق ف قلبك
و الهوى ف شِعْرك
ساعة ما أشوفك
باسمعك بوضوح
بتقولى نِفسي عنيك تخَبِّينى
الأمر أسهل لو تصارحينى
وِ تقولي إنك ....
لسة بتحبيني
مُـــــكَابْرَة
و كنت باقول لنفسي ساعات
و أيه يعني
أنادى عليه ما يسمعنى
غيابه لما يوجعنى
و كل كلام باقوله ناسيه
و هوه لوحده بيه معني
لقيتنى بادوب إذا إتكلم
و أتوه لساعات إذا سلم
و جُوَّه ف حُضني شوق بحنين
للهفة عليه بيدفعني
و قال كنت أما أنادى عليه
و ما يردش
أقول عادى ..... و أيه يعني
باشوفِك أنا
ساعات باشوف صورتك أنا
و أنده عليكى
يرد صوت مبحوح بنوح
جوايا راسم منحنى
و ساعات بانام
و أصحى على لمسة إيدين
و أفرك عينين ... و أبص و ألقاهم أنا
و أشوفني جوة النني من جوة
باصرخ بقوة ...
و أقول عليكي إنك مُنَى
و إنك أمل ...
و جرح عمره ما يندَمَل
و إنك قمر ...
و مالوش مثيل ضي و سنا
و ساعات باشوف صورتك
..... أنا
روحـــــى
روحى اللي بيك بِتْهِيم و تسرح فِ الفضا
ما يكَفِّيهَاش العمر كُلُّه فَضْفَضَة
يا وِرْد عِشْت أردِّدُه فى ذِكْر صوفى
خَدْ ذنوب الروح و راح يِقْتِل ف خوفي
نظرة منَّك أو علامة بالرضا
تِحْيِيِني تاني تْصَحِّى عمرى اللي إنقَضَى
و تهيم بروحى ...
و تانى تسرح ف الفضا
روحى ... اللي عاهدت نفسها
ما تشوف سواك
و ﻻ رابطة قوة عشقها بشروط لقاك
ع البعد هامت بيك و سافرت للمدى
لما إبتدى عهد الهوى راحت وراك
موش هاقُــول
معبر أنا ... بين ضفتين
و الناس بِتِوْرِد كل يوم
بينى و بينهم خطوتين
بس إنتى غيرهم ع العموم
و آثار خُطاكى معَلِّمِين
و الأصلى بس ... غَلَاه يدوم
طب ما تقوليش و أنا موش هاقول
أصل اللي بيننا بجد يعصى علي العقول
و لا يوم طلبت ف يوم أحوز
و لا مرة قررت إنى أنول
ع البعد روحك ليها أكتر من مدار
و أنا كل أملي إن أبقي جار
يكفينى فوق شطك أكون حبة محار
الشرح أصلا راح يطول خليه كده
بس إنت كونى م الوعود متأكدة
أصل المشاعر ع الدوام متجددة
و اللي بصحيح ... و ﻻ يوم يزول
خليه ف سرك ما تقوليش
و أنا مهما يحصل ... موش هاقول
وَعْد و إلْتِزام
مزنوق بوعد و إلتزام
مع إن ظلم الناس حرام
بس أمَّا تبقى الظالم المظلوم
و كمان بتقتل حِلم مِ الأحلام
هاتقول لمين إرحم بقى
و تقول لمين ظُلمك بِجَدْ حرام؟
مزنوق بكلمة و كلمتى عقدين
و أمانة لازم أوفى بيها و دين
و هاجور عليا و قلبى يتألِّم
و أبات معلِّم دمعى ع الخدين
و ما بدهاش يا قلبى شيل حملك
و إكتم هواك اللي بدى ف ضِلَّك
ممنوع عليك تصرخ لها بحرفين
ما أنا أصلى فعلاً فِ المحبة خام
مزنوق بوعدى ..
و قلبى ضاق بالإلتزام
لمعة حنين
لمعة حنين
بتبص من عينك ساعات
أما الهوى مهما تداريه
بالاقيه نادانى و يعترف
و أنا بالمحه ف نظرات
***
هاتصدقينى لما أقولك
إن ف عيونك كلام
كل الحروف تعجز تقوله
و إن معنى العشق ف عيونك
بيعلن عن وصوله
لقِمِّة الإحساس بقلبى
و اللي فيه
بس اللسان
خايف يشمِّت فيه عزوله
***
يا حبيبتى ...
مش مهم كلام ما بيننا
يكفى إن الكون فى قربك
يبقى جنَّة
مش مهم أسمع هواكى
و نفسي أشوفه فى العنين
عصفور و غنَّى
***
حمرة الخجل
اللي كاسية كل خدِّك
دفء وِدِّك
نظرة العين
اللي شايلة الأمنيات
تِدَّارَى فى لمعة حنين
بتبص من عينك ساعات
إنتِ هِيَّـــــا
عارفة إن صوتك
كله إحساس بالحياة
و إن الخيال لما أسمعك
ويايا واصل منتهاه
و إنك و مهما حاولتى بذكائك
تدورى بالكلام
لطريق مافيش فيه الغرام
يحصل زحام
و تردنا كل الطرق
و لنفس ذات الإتجاه
اللي الهوى فيه أمر واقع
و الهوى فيه الحياه
باكتب الكلمات
و عاوزك تسمعيها
و تعجبك لما أقراهالك
بس نفسى كمان تعيها
***
الهوى موش فى السنين دى
شيئ يسير
و المشاعر تختفى
لو ما إلتقتش اللي يراعيها
و لو ف يوم
طبطبنا ع الروح بالحنان
نلقى السعادة تِتوِلِد
لو بس بقلوبنا نساعيها
عارفة كان نفسى الكلام
يطْوَل شوية
و يبقى أهْدَى
و يبقى بسلاسة و رويَّة
أصلى بكلامك .... بجد
لقيت لروحى خلاص هويَّة
و اللي عشت أحلم بطيفها
إكتشفت إن إنتِ هيَّا
غَمَّضِى عيُونِك شُوفينى
يا اللي أحلاكى صباحِك
يا اللي يومك بادى ضاحِك
يا نغم دندنته على وتر النهار
و ملاه خضار
يا اللي نور الصبح
حِتَّة من وِشاحِك
غمضى عيون شوفينى
فين خيال عشقك و فينى
غمضى عيونك و سافرى
معايا أبعد من كده
ما تخافيش أبداً و كونى
ع
القليل متأكدة
إن لو هاتْمِدى إيدك هاتلاقينى
غمَّضى عيونك شُوفِينى
لسة ما شُوفتكِيش
مع إنى لسة ما شوفتكيش
و ماباشتكيش
و لا ليا فى صنف الحشيش
بس اللي حاسس بيه تجاهك
شوق و حب
و لهفة ناوية ما تنتهيش
و إن حد مرة سألنى عنك
موش هاقول غيرك ماليش
بس كل جوارحى هاتجاوب عليه
و من الكلام هايحس إنى
طلعلى ريش
و باطير فى آخر حتة باينة من السما
و عواطفى تبقى مُجَسَّمة
و كلامى ينسج شعر يبقى ما يتنسيش
و ما باشتكيش
مع إنى لسة ما شوفتكيش
مُوشْ سلــــيم
بانطق بحق
و أقول كلام زى النيسم
إنك أرق
و تانى و الله العظيم
من ورقة الورد الندِى
من نور بيجرى سرمدى
و سايبلى جوة القلب شَق
مغرق الروح ف النعيم
مع إنه معكوس ف الدموع
لمعة أسى
رجع الوجع بيكون أليم
و بيسألونى أقول سقيم
منصاب ب (لأ)
و من ساعتها القلب نبضه
موش سليم
إِوْعِـــــي
إوعى مرة تحسسينى
بإنى موجة من النسيم
هلت على غير إنتظار
تفتحيلها ضلفة الشباك
و تحضن ف الستاير
كان ف ليل أو كان نهار
تضحكى من جوة قلبك
تحضنيها .. تفردى الدراعات كمان
بس حضنك ليها عمره ما يبقى دار
بتسيبيها تشيل ف شعرك،
ترفع الفستان برقة
و لا تتخلل هدومك لما نور شمسك يغار
حبة حبة تروح لحالها،
موش بيشفع ليها حاجة من جمالها
عمر شعرك ما سألها
رايحة فين آخر المسار
إوعى مرة تحسسينى ...
إنى طيف عابر و زار
***
حسسينى بإنى غيرهم
و إنى موش موجة نسيم
شالت الشعر الحرير،
على حد قول عبد الحليم
حسسينى ......
بإنى إستثنائى جداً
و إنى صوت الحب يِدَّن
و إن بقى للعمر مداً
يبقى بس عشان أهيم
ويَّا قلبك فى الحكاية
اللي بيشيلها النسيم
لحن و غُنى
مين ف كل الكون يحبك
زيِّي أنا؟
زَيْيِّ أنــــا
عمرى ما إتخيَّلت حبى
حب عادى، حب بيفكر و هادى
تسمعى عنه تشوفيه فى أى حتة
شيئ روتينى و إعتيادى
***
حبى أنا، طوفان بيجتاحنى أنا
يغمر العمر بمشاعر،
يشرح الثانية ف سنة
حب يسقى القلب لوعة
يطرح الأحلام بروعة
لاجل ما يدوق اللي أحبه
كاس هَنَا
حبى أنا .. طايش مغامر
توصفه بمجنون ...... مقامر
بس قلبى .. قلبى بيه مسكون و عامر
تعصره ينقَّط مُنى
مين ف كل الكون
يحبك زيِّي أنا
قصائد فيسبوكِّيَة
(1)
طب هاتصدق ..
إن ساعات بيكون للنكزة، طعم اللذة
و إن الغمزة، ساعات بتجاوب مليون همزة
و إن ساعان نظرات بعيونك
تكتب أحلى كلام يتحس،
و بحروف بارزة
و إن الناس ف حياتها بتبقى
بأصغر لفتة أكيد معتزة
إوعى ف يوم تتردد و إنكز
شالله يوماتى بألفين نكزة
طول ما مشاعرك لسة بريئة
إعرف إن النكزة ... معزة
(2)
و كان لما بيعمل Poke
قلبى يزُك ... يتْعَكِّزْ على الدقَّات
و ﻻ بيرْغِي و لا بيْلُك
بس تشُك ... إنه مخاوى جنِـيَّات
آه مِ البِنْـــت
آه م البنت لما تحِنْ
و أما العشق ليها يعِنْ
و أما بتفرد الجناحات لمحبوبها
و ترقص كيف حمام البِنْ
تتخايل و تتمايل
و كل يومين لها ستايل
تخلى العقل منى يجِنْ
آه م البنت لما تحِنْ
؛؛؛
و آه م البنت لما تغير
تلات إربع دماغها يطير
تطيح فى الكل ما تخلى
عشان واحد يادوب قاللي
و تصبح آلة للتدمير
و تتصرف بﻻ تفكير
و لو هديت تشوفها حرير
و أنعم م الفراش و الطير
آهين م البنت لما تغير
؛؛؛
و آه م البنت لما تميل
و تنقش وردة ع المنديل
و تتشطر و تتعطر
و تسهر للقمر بالليل
و من عينها الهوى ينطق
و من فيها العسل بيسيل
و تعرف إنها مالت
ما تستناش لميلها دليل
و آه م البنت لما تميل
؛؛؛
و آه م البنت لو تعشق
و فارس ف الفؤاد يرشق
تحارب ﻻجله كل الكون
وﻻ بترحم و ﻻ بتشفق
و ﻻ بتتخلى عنه ف يوم
و فى بحر الهوى تغرق
تسابق ناحيته الخطوات
و لو حتى النسيم تسبق
و آه م البنت لو تعشق
فـــــوقِك
طب أعمل أيه؟
و أنا روحى طايرة مرفرفة فوقك
حتى الجناح عاملاه
بشوية من شوقك
ما لقيتش معنى يليق
و يرد على ذوقك
إلا إعتراف بالهوى
و هالِفُّه على طوقك
شايفك براح ... روحى بترمح فيه
و العشق تيه
و لا فى يوم همِّنى
ولا قلت لأ هاداريه
أنا ليكى وحدك فى الهوى
و وهبت روحى حق
ضُميها لحقوقك
و سيبيها طايرة مرفرفة
و محلَّقة فوقك
بلاش حِصــــار
متخيلاها هاتعترف؟
و تبوح بأجْمَلْ سرَّها؟
و إنى بقيت ملهوف عليها
أو وقَعْت ف أسرها؟
تفتكرى هاتقولك كمان
إن السؤال مليان جنان؟
و إن الخيال خلاها تنسى أمرها
مع إننا و لا يوم بيجمعنا مكان
بس إنتِ شاغلِك أمرها
كان أولى تيجى
و تسألينى بدون خجل
و أنا لو حصَل؟
ما قدرش أقول غير اللي كان
و إن اللي ف دماغِك جنان
و لا عمرى رُحت لبرَّها
***
إنتى ف سمايا
الشمس بتزور النهار
و بتنعكس ...
على كل أوراق الشجر
تملاه خضار
كل النجوم بتزورنى فى الليل الطويل
حتى القمر لو مرة زار
بيجينى ملفوف بالحنين
و يبوح بشكوى و يختفى
قبل النهار
و إنتى اللى وحدك فى السما
يا حبيبتى مالهاش أى جار
إطمنى و عيشى الحياة
و بلاش حصار
ف عنيكى كـــــون
عنيكى دنيا و كون
و بحر و نهر شوق
و هواكى شيئ فى الدم
جارى فى العروق
عندك حضور
و الشمس ف جبينك بتملا الدنيا نور
أما النَفَسْ منك يا أجمل حاجة عندى
كل يوم باتنشقه ...
يملا الكيان بعبير زهور
و اللمسة من إيدك بتترك فى الكفوف
مروِد عطور
نفسى اللي ساكنانى بتفرح لو تهلى
و أما تبقي الشمس فى نهارى
باشوفك برضه ضلى
و الأميرة اللى بتسكن
فى الحواديت القصور
و السحر سور
ف عنيكى دنيا و كون
و آلاف البحور
كابــــــوس
بترجعينى ليه لكل اللي إتنسى؟
و اللي خَضَار العمر كان بِيِهْ إكتَسَى
أيام ما كان الحب عُذرى
و القلوب فِ المدرسة
و اللي النهاردة
لْحَدْ قبل ماشوف عيونك
كنت بافتِكرُه بأسَى
يا شَطْ أحلام السنين
يا واحة القلب الحزين
حُضنك قَدَرْ ،،
و أنا مركبى عندِك رَسَى
يا أحلى جايزة كسِبْتَها
حُزنى إنتهى
لما إبتديتى تعوضينى عن الأسى
،،،
و حياة غلاوتِك ...
إوعى كل الحلم ده يطلع كابوس
كل البلاوى يا حبيبتى بْتُحتَمَل
فيما عدا كسر النفوس
كُل المحن فِ العمر عَدِّت
و إنتهت
يمكن كمان عليها أدوس
إلا الألم فى القلب
ماعرفلوش دوا
و اللي كَوَى
قلبى إنه عمره
ما إستفدش من الدروس
ف ما تِخدعيش قلبى الحرير
و ما تصدِميش حبى الكبير
و الحِلم ده ،،، يِطلَع كابوس
شايفك يقين
مِش باكتَفى أنا بالسلام، ولا بالكلام
و لا بالعيون توصف تعابير الهيام
و لا بالآهات لما بتتنهِّد ساعات
و تقول بيوجعها الغرام
أنا أحب أعيش الحب حالة
و إستحالة ...
تكونى قدَّامى و أفكر فى الملام
،،
أنا حُضنى بيتك لما حُضنك دنيتى
و عنيكى فيها توسلات العاشقين
بتصُدنى و تشدنى، و تقوللي لأ و هيَّ آه
متغمِّسة بطعم الحنين
بتحاولى منى تدارى شوقك
تفضحك رعشة إيدين
و صوابعك اللي لوحدها
نامت ما بين كفى الأمين
،،
شايفك يقين
أنا عندى أصل الحب دين
من غير نبى
من غير حلال من غير حرام
و لا وحى ف كتاب نحفظه
نازل مع الروح الأمين
كل التعاليم كلمتين
الحُب دين
يساعدنا نتصالح مع الناس كلها
و يخللي صخر الغير يلين
تصـــــريح
مِش مُكتَفى
فى العِشق بالتلميح
و لا بالكلام لو مرة عاز توضيح
أنا مِ البداية قلتلِك، أنا مِش مُريح
عاشقك و باعلن عِشقى للدنيا
و باقضى ليلى بطوله فى التباريح
ما يكفينيش منك كلام عايم
بيفوتنى وحدى ف السما هايم
و ما يرضنيش منك سوى التصريح
قلبى الجريح
ما يطببوش نظرة و همسة حنينة
و الحُكم واقف من زمان ع البَيِّنة
و البيِّنة
تصريح ماهِش تلميح
جزيرة إستوائية
بنيت حبى على دراعى
فى بحره اللي سَرَحْ بِيَّا
فقدت الدفة و شراعى
و كنتِ إنتِ ...
جزيرة إستوائية
رميت أحزانى على شطِّك
و عِشت سنين مانيش واعى
أدوب فى لَمسِتك لِيَّا
و لو ضحكت عيونك بانسى أوجاعى
أنا ليكى، أنا بيكى أنا بترنيمة بارقيكى
و نفسى تكونى يوم بِيَّا
و أنا الهايم فى ليل العشق
لو صوتك وصل مرة لأسماعى
أنا فيكى تعبت كتير
و قلبى للحمام غِيَّة
و باكتب ع الشطوط إنى
بلا حبك
يكون الكون بدون داعى
و تبقى الأرض مَنْسِيَّة
منــام سـاحر
معاكي سهرت ليل مجنون
و كنتى الجيم و كنت النون
حكينا بالحنين حكايات
و بيكى كمان بقيت مسكون
أغمض عينى و أفتحها
ما فارقتنيش ملامحها
و حضنى ضاممها و متَبِّت
و حالة أنا صعب أشرحها
لكن طبعاً بقيت مفتون
و كُونى هناك ... و فين ما هاكون
أنا ساكنك و ساكنانى
دوا جنانى فى سحر عيون
***
ما قولتلكيش؟!!
مش إمبارح .. قابلتينى فـ منام ساحر
منام رائع صحيح عابر
لكن أجرأ من الحكايات
بدون تشويق منام فاجر
منام فيه جِبت مـ الآخر
غمرتينى بليل الشعر و الحِنَّة
و إيد حاضنانى .. مالهاش زَيْ فى الجنَّة
و حققتيلى فى دقيقتين
بقربك كل ما أتمنَّى
سامعنا الليل و نجم الليل
على لحنك عزف مواويل
و كروان الغرام غنى
كلام أنا كنت بيه شاعر
و مهما حاولت أوصفلك
صعيب
سهلك
بلاقى العقل مش فاكر
يا ريتنى كنت صورته
و سجلته ... لكن معذور
محال توصف منام ساحر
باكتبــــلك
باكتبلك ..... من خلف العقل
و قلبى بيسرَق أنفاسُه
أنا باكتب و أنا بره المنطق
بعد أما القلب شِرِب كاسه
فـ هواكى كرامتى و عزة نفسي
بكعب الحب بينداسوا
حتى الأشواق
و حنينى و ودى كتير قاسوا
حبيتك ... لما فـ يوم ظنيت إن فؤادى
من بعد سنين المر أخيراً
صادف حب على مقاسه
يا خسارة أنا عشت فـ وهم كتير
علشان أنا باملك قلب كبير
علشان أنا فارشه ورود و حرير
و غرورِك عمره ما فرَّق بين
دهبك لو قرَّب لنحاسُه
أنا بارسِمِك مرات .....
على وجه الفضا
طفلين و مالى وشهم
بسمة رضا
ترعة و شجرة توت و صفصافة
لحظة سماح
مع كل عمرى اللي مضى
حبات ندى نامت على خَدْ الورق
و إتدحرجت حضنت إيدين
مسكين ماهوش لاقى اللضى
راح مبتسم و مسح عنيه
ما رفضش رزقه .. لكن رضى
بالطيبة بس و بالأمل
راسمك على وجه الفضا
أصلى إكتشفت مع السنين
و مع الحنين ،،، حبك قضا
لما بابدأ كلمتين ويَّاكى
ليه ما بينتهوش؟
و أبقى متخيل ملامحك
ضحكة فوق كل الوشوش
حتى صمتك باسمعه
زى عزف الناى على شط الترع
غيرى ما يسمعوش
و أبقى راسمك
لون خضار الريف ف أيام الربيع
و إنتى قاعدة تحت ضل التوت
بوجه ملائكى ... دايماً بشوش
باعترفلك بالهوى و الشوق دليلى
ياللي ساكنة عِز ليلى
بس طيفك للأسف
ما بالمحوش
حسيت ف حبك باحتلال
و الشوق جِبال
و الناس كلامهُم زى هَم ... تلال
ما قدِرتِش أتحمِّل هوى
أو البِعاد و إحنا سوا
قُلت الدوا ... أنساكِ و أهرب مِ الخيال
تستغربى لو قلتلك ،،،
اللي إفتَكَرْته السهل ،،، كان هوه
المُحال
،،
و هْرِبت منِّك ع الورَق
ولا شيئ فَرَق
و فْضِلتى إنتى المبتدأ
و إنتى الخَبَر ،،،
و إنتى الإجابة على السؤال
ما لْقِيتش بد من الرجوع
و من الخضوع
و الإعتراف للعقل إنه مهما قال
ما فيش تكافؤ فى النزال
،،،
عاشقِك أنا
و إن كان فى قربك فيه ألم
ف فى البِعاد أنا حالى مال
تتجَبَّرى تتكبَّرى
أنا دى الحقيقة و قُلتها
و إرتَحْت لمَّا الحِمل زال
نسيانى ليكى مستحيل
و البُعد عنك شيئ مُحال
