(1)
الخير كتير ف الهوى ربك وهب بسخاء
طاب الهوى ف إستوى... و الأصل إنه عطاء
و اللي بيحرم غيره من رزقه
هايموت ف يوم منكسر من لوعة إستجداء
و أنا باعترف للرب بنعيمه
ملسوع أنا فِ العشق من ناره
ماقدرش يوم أصطبر على إحتمال ضَيْمه
باعلن براءتى أنا من لعنة البُخلاء
(2)
أنا أصلى عايش قلبى ده مضياف
فاتح بيبان على شجرة الصفصاف
أصل الكريم طبعه كده
يكرم ضيوفه و مِ الفَلَس ما يخاف
(3)
شاعر و غاوى غزل ،،، أصل الغزل مزاجات
ولَّا إنت غاوية الكسل ،،، مستصعبة الهمسات
أنا أصلى عامِل عمل ،،، للمغرمين بِيَّا
لو طال معانا الأجل ،،، هانسيب كنوز كلمات
(4)
(4)
مين قال دا دور و طابور و لا مغرمين بالدور
ده العشق مش بالملامح حتى ف بنات الحور
القلب زى النهار له شمس واحدة تلاغيه
حتى القمر واحد و بييــــجى ليلُه يزور
هوه إنعكاس ضيها و ف أصله معتم نور
العشق مش وجبة دسمة العشق أصله ،،، شعور
(5)
قلبك حدف بالشوق منديل و ورداية
لقيتنى دايب دوب و العشق ده غواية
كان قصد قلبك أيه رسينى على مرسى
شبك الشبك قلبى بعيون و ضحكاية
(6)
قلبى اللي طول عمره غبى .. بيحِس ما بيفهَمشْ
عايش براءتى مذهبى .. و العِشق ما بيرحَمش
حبيس كتابى و مكتبى ... و الأمر ما بيسلمش
فجأة الهوى جه لولبى .. قلبى وقَع ولا قَامْش
(7)
أيه الجمال ف قلب من غير عقل؟
بيهون على قلب البنات و كأنه مالهوش أهل
كان عايش العِشق بهبَل و الشوق طِلِع موش سهل
أنا شايف اللي يعيش غبى .. كده يستحق القتل
(8)
نور الصباح بيبدر ع الخلايق خير
و الرزق نازل من المولى يوماتى كتير
ياللى بتتصارع شوية عقل من فضلك
ربك بيبعت رزقه للنملة و كمان للطير
(9)
ياللى بتروى الورد ليك أجرين
أجر السقاية و أجر إنك تسُر العين
و اللى يعَبى فى
مسك مش زى اللى ينفُخ كِير
شتَّان مابينهم و إسأل مجاورين الاثنين
(10)
أنا مين فى وسط الخلايق مهما أكون يعنى
أنا صوت فى صحرا مافيش و لا حد يسمعنى
بس الفؤاد مهموم و حط فوق همه هموم الناس
رغم إنى تايه زيهم لكن فؤادى بهمهم معنى
(11)
بكفوف حنانى سقيته طلب يدوق تانى
وهبته كل الحنان و إديته ما إدانى
جرَّحنى بين الصحاب ما عرفت أرد عليه
لما الحبيب يظلمك مين ينصفك تانى؟
(12)
يا موج يا عالى مين يقدر عليك غير حوت
بِتِرمى الخوف على شطوطك بعِلْو الصوت
ما تتغرش بفورانك و دورانك يا عم الموج
لأنك برضه يا صاحبى على حبة رمال بتموت
(13)
يا ورق الورد يا مزيِّن قُصور و جِنان
بتتنقل ما بين حبيبين و إنت بفرحهم فرحان
بيتنسم عبيرك حور لكن ما تنسى يا عايق
مصيرك برضه آخر اليوم تبات دبلان
(14)
طارت طيور الهوى سكنت فروع الدوح
تركت ما بين مهجتى قلبى الحزين مجروح
وقته ما بين وحدته و ما بين دموع النوح
يا قلبى سيبك بقى ياروح مابعدك روح
(15)
الرمل قال للجبل مالك كده راسى
و أنا بس حبة هوا بيطيَّروا راسى
قاللوا ياريت كنت زيك ويا الهوا طاير
و أفوت صخور من حجر كتمالى أنفاسى
(16)
قلبك حدف بالشوق منديل و ورداية
لقيتنى دايب دوب و العشق ده غواية
كان قصد قلبك أيه رسينى على مرسى
و أنا قلبى بات مشبوك بعيون و ضحكاية
(17)
دا حب ولا الجميل بيحب يتسلَّى
شبك قلوب الناس و بحلمهم ولَّى
سنار غرامه شبك و فاتنا فى المينا
نبعت رسايل شوق و القلب لم خلَّى
(18)
بالله عليك يا جدع ما تحرم اللى إنحرم
خليك كريم زيِّنا و لا تظلم اللى إنظلم
دانت المُنى و الغُنى يا ضلة فوق عمرنا
و اللى بيكرم حبيب عند الإله ينكرم
(19)
لما العيون فجأةً لمحت عيونك داب
قلبى اللى عاشق سَكَر فى لَمِّةْ الأحباب
وأما الإيدين بحنين لَمَسوا مواجِعْهُم
فى إيديك وِصَال عبقرى هانعيشوا ليه أغراب؟
(20)
ساعات بالمحنى ف وسط الناس واحد منهم
و ساعات بالقانى بيهرب من ظلم عيونهم
و أعلن عصيانى و أقول أنا هابقى واحد تانى
و أمنى النفس ببكره اللي هايبقى أمانى
و بقلة حيلة تفوق أحلامى و أقول دول ناسى
... إزاى أنا هابعد
يوم عنهم
و ساعات و بدون ما باحس باضحى بأجمل أيامى عشانهم
و ساعات مِ التانية أنا باركن على كفى دماغى
و أغرق إحساس
و باقول أنا ليه بجفاء باحكم؟ و بأى أساس
الناس دول أنا .. و أنا برضه الناس
و إن روحت بعيد و ﻷى مكان راح أقول فينهم؟
ما أنا فى اﻵخر .... روحت أنا أو جيت واحد منهم
(21)
إفتح ببان قلبك و ضم الناس
أو طل م الشباك .. قمر وناس
و إكتب كلامك ع الوشوش
و إفضل بشوش .. عبر عن اﻹحساس
و إشرب من الخمر الحلال ،، و إملالي كاس
سكرنى عشق ﻷهلى و لناسي
أنا مهما هاشرب ،،، برضه موش ناسي
أصل البلد دى ساكنة أم الراس
إفتح ببان قلبك .. و ضم الناس
(22)
طب ليه بنكابر و نعاند و نزود بالعند جروحنا؟
مع إننا من جوة يقيننا بنعاند مشاعرنا و روحنا
حيرت الحيرة يا إنسان ... و غرابة أمرك جابلى جنان
سهرت معايا نجوم الليل و البدر الساكن ف سطوحنا
(23)
كل حاجة فيكي عيني بكل حب مصدقاها
كل كلمة بتقوليها بطعم تاني مغرقاها
إنت غير الناس بحالها حاجة محتفظة بجمالها
و اللي حظه ينول وصالها يا هنا قلبه بلقاها
(24)
عارف لما تحس بضيقه و تقلب خنقة؟
لما بتفضح إنت الكدبة و تبقى ف زنقة؟
عارف لما بتنكر إنك عارف
و أما بتسأل روحك .... برضه تجاوب ﻷه؟
لما بيبقى السجن بيسكن داخل روحك جوة الشقة
و أما بيبقى الحلو تمللي بطعم المُر
و أما سنينك تجرى تكُر
و أما بتبقي طليق وﻻ حاسس إنك حُر
و أما بتسأل روحك تانى و تيجى إجابتك .. ﻷ موش فارقة
و أما الناس بتلون عمرك بطلاء فاتح
و إنت تبات تتمعشق وحدك ف سنين زرقة
عارف؟ ،،،، طب لو
عارف مرة حاولت تغير حالك
وﻻ تحاسب روحك إنت على اللي إتكوم من أحمالك
و اللي وعدت الروح بمجيه ف يوم وﻻ جالك
إوعى يا صاحبى تلوم الدنيا و تتسي الجانى
إوعى تقول الحظ وعدنى لكن وﻻ جانى
صارح روحك و إنسي جروحك
إوعي تكون ف الحكم أناني، حاسب دايما على أقوالك
حتى إن كان فى اﻷمر مشقة، صارح روحك .... تتسي الخنقة
(25)
لم أعد ذاك الفتى
باكرهها موت الكَلْفَتَة
ما عدت أحزن ع اللي فات
و ﻻ إتفاجئت بما أتي
(26)
ليه السلام منك هجوم؟
نظرة عنيكي سهام ما باشوفش منها النوم
و اللمسة من إيدك غرق و يا ريتني باعرف أعوم
حتي السكوت باسمعله صوت يا يكون عتاب أو لوم
تعبان في حبك بس نفسي يدوم
و سؤالي برضه ب أكرره
ليه السلام منك هجوم؟!!!
(27)
الحُـــب واعِر ... تَعَبْنِى
و لأَنِى شاعِر .... غَلَبنى
يا سهم طالع مِقَدَّر
هَـــلِّل و كَــبَّر و صابنى
(28)
الثورة موش صورة ف ميدان و هتاف
الثورة لما تشيل وطن فوق الكتاف
(29)
نظرة حسد ف عيون عزول
تصرخ تقول إنى باحبك باﻷصول
طب ليه عيونى بتنكسف
مع إنى أبدا موش خجول
يا حب ليه شرحك يطوووول
(30)
بافتح الشباك و أشوف صورتك بتبعتلى السلام
و النور على كل البيوت حاضن ندى
يا اللي إبتسامتك جددت عمرى
و صارت فرحة للأيام .. عَصرِك بدا
لحن الطيور على شجر الربيع كان للكلام منك صدى
همسك موسيقى و وشوشة عصافير
و النور يغِير من ضَيّْ وجهِك يا بشارة خير
يا عشق ساكن أفئدة ..
النور على كل البيوت حاضن ندى
(31)
باحتار كتير قبل ما إيدى أمِدها
و أكتب على شاشة موبايلى كام رقم
يسألنى أطلب؟ و الثوانى أعِدَّها
أنا بابقى متردد كتير و أسكُت ألم
و أقول أخاف أطلبها ما تردش عَليَّا
و أشعر ساعِتها بالأزِيَّة
خلينى أعيش عندى أمل
لو هانحرم من صوتها ده أهوَن عًلَيَّا
و أخدع ف روحى بوهم بيصَبَّر جروحى
ما انا قلبى من ظلم الهوى ياما شاف أسِيَّة
(32)
سؤالك صعب بس صعوبته فى سهولته
و باستشهد أنا تانى .. بكلام قولته
مافيش فيكى عاجبنى ..... شيئ
لكن كلك . ... مافيش زيك
و أنا جنبك ... حبيب لقى فيكى محبوبته
و أنثى عندها الواحد يحس بجد ... برجولته
سؤالك صعب .. بس صعوبته فى سهولته
(33)
طلب هدنة ... و قال للعند قوم خدنا
و سافر خلف أوهامه و عشاقه وراه هاموا
و راجع بعد ما إتأكد يزيد الدمع ف خدودنا
طلب هدنة
(34)
قالتلها اﻷيام ... أبداً مالوش فى الكدب
أصدق من المطر الهطول
مع أى قول ... تأكيد يقول ..
صاحبِك أكيد بيحب
(35)
بعتِّلها الحنين مرسال
شرحتلها إن حالى حال
قالتلى بدهشة ..
ﻷ .. مين قال؟!!!!
(36)
صوتك واحشنى
ما تبخليش على روحى بحياتها
يكفى اللي فاتها
دا كل شيئ فيكى ... بيدهشنى
(37)
روحى و روحك فى الدﻻل نجمة و هلال
إن حط مركب عشقهم أو مرة شال
ينزل لقاهم بالغرام ...
فوق الزمن شلال
(38)
روحك و روحى
زى حرفين ف إنسجام عايشين سلام
بعد أما عانوا من اﻷنا
بقوا كاف سند ع اللام
(39)
روحك .... و روحى زى كونشيرتو
مابين الناى و ترتيل الكمان
كل الآلات نشوانة مكسوفة ..
تطلب كمان
(40)
إلبسها خيش و إفتح ببان قلبك و عيش
أصل الزمن .. لحظات، ساعات تفوت
و حاجات تموت .. و حقيقة راسخة ف الثبوت
اللي يروح ما يجيش .. إفتح ببان قلبك و عيش
(41)
مين اللي قال ... الحب لوغاريتم الحياة
مين طلبه تاه ... ﻻ ﻻ و ﻻ
الحب أبسط من كده .. الحب جاه
الحب رزق من السما .. منة إله
الحب نور .. و حكاية طاوياها السطور
عايش على مر العصور كل البشر تفهم لغاه
الحب أقرب من مداه
الحب أسهل من صباح الخير على كل الشفاه
الحب موش إحساس مشين دا الحب دين ...
لما القلوب تصبح حياة
(42)
روحى فراشة محلقة حوالين لهيب شوقى
قسمة و نصيب متفرقة يا نفسي يوم روقي
(43)
هو إنتى لما تغيبى بيغيب الكلام؟
موش عارف أكتب حرف ف غيابك
حتى الحروف عايشين كما اﻷيتام
سهران كمان الشعر على بابك
(44)
باحب القهوة طليانى .. كابوتشينو
و لو هافطر .. يكون جبنة برغيف فينو
و لو كام حتة م الكوكيز
من النوع اللي عارفينه
و عيش يا عم دور باشا
و قابل بكرة ببشاشة
و نام و إحلم بإنك نجم ع الشاشة
و حواليك البنات و إنت الفلانتينو
و حِب القهوة طليانى ... كابوتشينو
(45)
مُرْ ع الأحزان و سيبك
موش هاتاخد غير نصيبك
و اللي مكتوبلك هايحصل
و إن حصل .. ولا شيئ يعيبك
بس ضحكك راح يخلى الدنيا سهلة
و الحياة هاتشوفها أحلى
و العيون هاتحب صورتك
تعشقك من نص وَهْلَة
(46)
نختلف أو نتفق .... لكنه نجم
فى الكلام كان مدرسة ... من أغلى حجْم
دمعتى تسبق أسايا و الأسى ملو الحنايا
ألف رحمه عليك ..... يا نجم
(47)
عَلَمْنا مِش مترين قُماش
عشانه مُتْنا و هو عاش
يا كلاب على آخر الزمن
بايعين شرفكم .. و ببلاش
(48)
أَغَمَّض عينى و أسرَح فى فضا المَلَكوت
و أطير مع حلمى أسرع مِ الضِيا و الصوت
و باهرب من حياة قاسية قساوة الناس
كأنها كاس ما مِنه مناص سوى بالموت
(49)
الدنيا معكوسة .... و الحُكم صار كوسة
كان قبل كِدة واسطة ... مايونيز على الباستا
دِلوَقت شوف يا أسطى الوضع بقى حوسة !!
(50)
آه يا وطن .... أسوأ ما فيك عشق العَطَنْ
الناس تموت لاجل النهار و إنت اللي هارب مِ الزمن
عاشق ظلام الأوليا و المدَّاحين الأغبيا
بيشعللوا نار الفِتَنْ
لو مِش هاتِلْحَق يوم نهار ... إشرب بقى دم المِحَن
(51)
فيه بلاد الذل فيها للفقير
الأزمة مِش نقص الموارد
طقس حر و طقس بارد
الحكاية كلها ... أزمة ضمير
(52)
نظرة ألم فى عيون بريئة
الشوق لبكرة بالمشيئة
عُمرُه ما يخلِينا نهرب
مرة واحدة من الحقيقة
و البشر يبقوا ف خطر
لو هربوا يوم م الإنسانية
اللي هِيَّا ... طاقة النور المضيئة
(53)
الدنيا لفت لفتين داخت ،،،
سَكَرِت و دارت بنا و إتحولت لميدان ،،،
الدنيا عايشة سنين و لا شاخت ،،،
عايقة و فاردة شعرها فدان
(54)
بتصدقيهم ليه و تيجى تسألى؟
و تكلمينى كأن كذبتهم أكيد؟
ماهى حاجة واحدة هاتختاريها
يا تِعقَلِى ... يا تبعتيلى كل حاجتى بالبريد
(55)
بتضيعى عمرك مابين الأسئلة
و تغفلى أول سؤال طب هِيَّا فين المُعْضِلة؟؟
حُب و باحِبِكْ و اللى فات ما يخُصِّكِيش
ما تْجُرِّينيش لطريق نهايته ... مَهْزَلَة
كل اللى قبلك مات خلاص ما تكبريش المسألة
(56)
عيــــــــون الناس زنازينى بلا ســـــــاحة
أهيم وحدى و ألقى فى البـــــــراح راحة
أناجى الخالق القابض على الملــــــكوت
تِرُد الكائنات جمعاً بفضل المولى سَبَّاحة
(57)
أنا إنسان
و مش ناسك فى محراب العفاف أبداً
لكن فنان .. باشوف الأية فى خلقه أقول الله
و أشوف الحسن فى الصنعة بتطلع آه
و يعجبنى الكمال فى الخلق
و أسبَّح ربى مَلو الحَلق
و قلبى بالإيمان ينشَق
و لا يملى الفؤاد إلاَّه
و قلبى يميل لعصفورة
و عِطر صبية أمورة
و أدوب لو حتى فى الصورة
لقلب يضُخ فِيَّا حياة
ما أنا إنسان
(58)
و لحظة فى سكون الكون
أكون فى حــضرتك مفتون
أشاهد قٌـــدرِتك آيـــــــات
بكاف سـابقة لحرف النون
(59)
نعيم الدُنيا أيـــه غير كَفْ بيطبطب؟
و حُضن يضُــــم أحبابه ما بِيْشّطَّبْ
و نَفْس تســـامح الغلطان إذا يِغلَط
و قلب سليم على الحِنِّيَة مِتسَتَبْ
(60)
أنا الرايـــــــح بأوراقى و إنتَ الجَيّْ
ضلام بيسـلَّــــم الدنيا لوجه الضَيّْ
و طَبْع الدنيا دوَّارة و ليــــــل و نهار
و يٍفْضَل أسوأ العايشين ميِّت حَيّْ
(61)
إلهى باسْمَــــــعَكْ حتى بدون أصوات
و أشوف الحِكمة مَطْبوعة بسر الذات
و أتْفَهْ حَاجــــة من خَلْقَك دليل قُدْرَة
و لَوْ فَكَّـــــرْنَا راح تنــــطَقْ لِـنا الآيات
(62)
أنا و إنــتَ بلا مأوى لكــــن عايـــشين
و غيرنا فْ حُضْن أحبابهُم لكـن تايهين
تآمِـــــنلِى و آآمِـــــنلَك نخاف من أيه؟
ده أول شَــــــــرْ فِ الدنيا بَنى آدمِين!!
(63)
بقر جاموس أو قول غنم
فاكرين أبو الهول ده صنم
إحمينا يارب العباد من شر جاهل مُدَّعى
لو قال على نفسُه .... فَهَمْ
(64)
غيمة و سكنت فوق سماك
هاتفوت و ياما غــــيرها فات
كم مــــــــــرة ربــــك إبتلاك
مين عاش بقى .. و مين اللى مـات؟!!!!
(65)
الفيل خفيف الحِمل عام
لأنه فِ حياته ما شالش الهَمْ
أما إبن آدم عاشق الآلام
من تُقل حِمله غاص لعُمق اليَمْ
(66)
لفيت ما بين البشر ما لقيـت حنان ولا وِدْ
و يْـــــــهِد فيَّا القَدَر و كأنِّه فَـــــرْض و وِرْدْ
هَجَرْت كل الــناس و هْرِبت من حــــــالى
بين البَشر أنا اْخاف .. آمِن فى حُضن القِرد
(67)
و آآه من سِــــحْرِها عيُونِك
و مِنْ قَدِّكْ و مٍـــن لـــــوُنِك
وِ مِنْ لَمْسِة إيدين تايهِين
وِ قَلْب بحُبُه مَجـــــــنُونِك
(68)
و باكره فى الهوى إنى
أبات بالحلم متحنى
و عايش أحلى وهم كبير
و القانى يخيب ظنى
(69)
جوة العيون سحرك واخدنى للمدى
فى عنيكى بتسافر عيونى و ليه بِترجع مُجهَدَة
و أنا أصلى متعود كتير ع الهَدهَدة
ياللي هواكى يدور ف جسمى مِ الفؤَاد
بين العروق و الأوردة
(70)
طبيعية و مالية القلب حنية
و نظرة بين عيونك دول أكيد من ربنا هدِيَّة
يا مالكة عَلَيَّا وجدانى و ساحرانى و آسرانى
و كل ما فيكى يعجبنى عشان إنتى .... طبيعية
(71)
و صابنى السهم من بدرى و قلبك لسة لم يدرى
و نظراتك سهام صايبة قلوب بمحبتك دايبة
شوية رحمة يا عُمرى صُبُرْت كتير و طال صبرى
(72)
ماليش فى العِشق لو هادى و لو كل الكلام عادى
أنا الطوفان فى أشواقى و أنا الرغبة اللي بتنادى
و أنا الطامح و أنا الجامح و أنا اللي ف حبه ما يسامح
و لو هِدْيِّت مشاعرى ف يوم هايفرح فِيَّا حُسَّادى
(73)
عِشت السنين باستَعْطِفِك مِش لاقى أوصاف تِوصِفك
و أنا اللي بين الخلق كان بيبوح بعِشقُه و يِنْصِفِك
بتحسسينى ليه بإنْ .. الذنب ذنبى إنى باحِنْ
و بتقوليلى حاجات تِجِن كإن حبى مْكِتِّفِك
و لا مرَّة واحدة تقَدَّرى سامحينى مِش عايز أعرَفِك
و هاتِخسَرى
(74)
و نظرة سارحة فى الفضا باكية على عمر إنقضى
و رغرغة عين بالدموع
بتقول خسارة مافيش رجوع لأى وقت جميل مضى
ما تآخذونيش ،،، دى بس لحظة فضفضة
(75)
حتى وسط الضحكة لسة ماليكى حزن
راح أقولك أيه؟
ما الدُنيا قاسية و بِتلاقِينا بخوف فِ حُضن
لما تِبقى الغُربة عادة و الكلام مُر بزيادة
و اللي فاكرينهم حبايب، بيلاقونا بوِد غايب
و العذاب شاربينه سادة
هُمَّ نفس الناس يا قلبى اللي كان شوقهم عِبادة
(76)
باحِسْ بضَعْفِى ويَّاكِى
و أحس بقِوِتى بحُبِك
و لسة الشوق و لسَّاكى
بتكوينى و أنا ف قُرْبِك
و لما تغِيبى رُحماكى
ما ليش ملجأ سوى ربك
(77)
و بيمر الزمن بينا و تبقى الثانية يوم و سنين
و لا بنرسى على مينا ونفضل بالخطى تايهين
ساعات فيها نشوف الفرح لما شهور ما طاب الجرح
بدموعنا كتبنا كتير أسامينا و غلفنا الألم بحنين
و حاولنا كتير ننسى و آدينا ورا أمل اللقا ماشيين
(78)
أنا و الوطن ضحك و شجن و كوميديا و دراما
و هيستيريا و حاجات ياما
لابسانى فى كل البدن مالكانى على مر الزمن
أنا و الوطن
ما فكرتش ف يوم أحسب خُطايا
و لا قُلت أعد على وطنى الخَطايا
و أنا ف حبه بذلت كتير من الغالى
و هوه عليَّا كيف حجر الرحايا
و أنا المطحون .. و عشقى ليه يزيد بجنون
و لا بينى و بينه حساب و لا بينى و بينه ديون
و لو أملك حساب روحى هاطلّعْنى أنا المديون
(79)
باحِسْ بضَعْفِى ويَّاكِى و أحس بقِوِتى بحُبِك
و لسة الشوق و لسَّاكى بتكوينى و أنا ف قُرْبِك
و لما تغِيبى رُحماكى ما ليش ملجأ سوى ربك
(80)
أنا و الوطن
ضحك و شجن و كوميديا و دراما
و هيستيريا و حاجات ياما
لابسانى فى كل البدن
مالكانى على مر الزمن
أنا و الوطن
ما فكرتش ف يوم أحسب خُطايا
و لا قُلت أعد على وطنى الخَطَايا
و أنا ف حبه بذلت كتير من الغالى
و هوه عليَّا كيف حجر الرحايا
و أنا المطحون .. و عشقى ليه يزيد بجنون
و لا بينى و بينه حساب و لا داين و لا مديون
و لو أملك حساب روحى
هاطلّعْنى أكيد المديون
(81)
و بيمر الزمن بينا و تبقى الثانية يوم و سنين
و لا بنرسى على مينا ونفضل بالخطى تايهين
ساعات فيها نشوف فرحة و أيام لم يطيب الجرح
و بدموعنا كتبنا كتير أسامينا و غلفنا الألم بحنين
و حاولنا كتير ننسى و آدينا ... ورا أمل اللقا ماشيين
(82)
أنا و الوطن علاقة مش مظبوطة
مش مفهومة مش مشروطة مش مستوية مش مغلوطة
و لا مرسومة و لا محسومة ولا مخطوطة
مش مسلوبة مش مخروطة بدون تقَّعُّر فى الكلام
علاقة مش مظبوطة
يكرهنى .... أحبه،
يظلمنى عمرى ف يوم ما أسِبُّه
يرمينى لكلاب السكك تنهش ف لحمى
أكتب ديوان فى عطف قلبه
و ف رقته و حنيته،
و لو قفل فى وشى بابه و صدنى
أقول دا كان يقصد يواربه
أعمل أيه مجنون بحبه
(83)
و لما الدنيا مش مضمونة يا إنسان؟
على أيه الصراع فيها، و ليه بالغالى شاريها؟
و إنت مهما طال عمرك
مفارقها ... و فايتها ... مخليها!!!
و لا هِيَّا ها تبكى عليك و لا فراقك بيعنيها!!
عاشرها بس بالحسنى
و قد ما تمنحك هِيَّا ... أمانة يا مؤمن إديها
(84)
لو الثورة هاترسم ضحكة ف عيونك
يمين بالله لاجيلك أول الثوار
و لو بالثورة يجرى الدمع ف عيونك
و يتغير كده لونك
أنا أكبر فلول العصر لو ينفع
و أشوف ف عنيكى تانى نهار
(85)
إحفظ لسانك يصونك ياما الغرور بيضِّلْ
و لا يوم هاتحميك حصونك حتى الحديد بيفِّل
و الدنيا على ده وِدا يا تعِزْ يوم يا تزِّلْ
وإصحى لِكَيْد العِدا حاسِب لا قَدَمَك تِزِّل
(86)
مصر فعلا كات فؤاده و ألف عتريس كان خاطفها
و يعاملها زى دادة و لا مومس لو لاطفها
حرموا عليها السعادة
حتى تراتيل العبادة ... و الأكادة
إتجرأوا ......... و قالوا بكيفها
(87)
آه يا وطن
فِ الزحمة تاه
كان شعبه داب
فِ العِشق حتى منتهاه
حكموه طغاه
صرخ بأعلى الصوت بلا
إتترجِمِت فى الفرز ... آه
الشعب لملم هِدمِتينه و قال مُحال
أحنى الجِباه
ملعون أبو الوطن اللى فيه
تِبقى كما تِبقى ف سِواه
كافر بحبك يا وطن
مليان طُغاه
(88)
ولا حَدْ فينا بَلا هّمْ
حتى الملوك و الأكاسر
و ما دُمنا فِ عْرُوقنَا دَمْ
هانكون يا كَسْبَان يا خَاسِر
(89)
أُسكُت يا صوت الحق مُووت
صوتَك عِلِى ما كسبش شيئ
يمكن هاتكسب بالسكوت
أسكُت و مووت ... الكذب عذب الصوت كيوت
مالى الودان ... مليان طَرَبْ بيتنا إتخَرب ...
مع إنه كان زينة البيوت
إسكت يا صوت الحق .. ماهى ماشية الحياة بالزَّق
و آهى أزمنة و بتفوت
(90)
يابن آدم أيش تكون فى دُنيا عوجة
الزمن شطين و عمرك بس موجة
الغرور خلَّاك تحس إنك إله
و اللى تِعْزِف عنه نفسك مهما كان
تانى يوم يبقاله حْوُجَة
(91)
أنا ما اركعش غير لله
و لو كل البشر وافقوا أنا باصرخ بقولة ...... لا
أنا رافض طيور العتمة و الخفافيش
و باستنى الأمل مايجيش ما يشغلنيش .....
أنا أملى الكبير ف الله
لأنه ما لوهش فى التهويش و لا التكويش
و لا سرقة أمل غيره .. لإنه إله
أنا ما اركعش غير لله
(92)
يا نموت واقفين ... يا نعيش راكعين
إختاروا و بس ما بين الإتنين
و لا فيش ثالث .. فتَّح مُخَّك
إوعى تصدق ما بين البين
(93)
الحق إسم الله و ساكن فى الضمير
و بينتصر و إن عاش سنين مسجون أسير
(94)
الأمل لو كان وميض
يهزم الشر البغيض
(95)
حُسن النوايا .... ماهوش كفاية
لما تِحرِمنى ... و تسرق من غدايا
(96)
أجمل ما فيكى يا بلدنا الناس
نكتة و ضحكة و السهر وَنَّاس
و الجيرة صُحبة و البشر خِلَّان
و الغنوة حلوة و الوتر حَسَّاس
(97)
البوم نَعَقْ فوق الشجر
لما النسور هجرت ديارها
و الحِلم قرَّب يحتضر
لما العيون فقدت بصرها
(98)
ما يغرنيش حتى و لو حجبوا السما و النور
هايكونوا أيه غير غيمة و تعدى ... تغور
ساعة النسور ويَّا الصقور ما ترف بجناحها
تلاقى أسراب الحمام وقفت طابور
(99)
زَرَعْتَ شَجرِة عنب و رَويتها من عِيْنِى
كِبْرِت و كان ضلها فِى الحَرْ مِساعينى
و حبيبى قَمَر المِسَا عَينى بِتسهَر لِيه
هَجَرْنى بَس الحَنين دَمعُه كسَا عينى
(100)
جميل و الحُسن من قُبْلى
و كام واحِد شَهَد قَبْلِى
و مَيْتَا يا بُوُوى هَانِتْقَابِل
و أَدَاوى حَنِيْنِى بِال قُبَلِ
(101)
مصر البلد لها دين و مِش كافرة
و حتى لو جه يوم خرجِت لنا سافرة
موضة يفوت وقتها و تفوتنا و مْسافرة
بس اللى جوة القلب دين الدين
و التقوى بين الناس من غير دقون وافرة
ولا محتاجين الملالى ولا آيات الله
و الرب وحده اللى عالم سمع النِدا فى سماه
الدين معاملة يا صاحبى لا دقن ولا جِلباب
حتى الحِجاب يِفْضَحَك لو صِدْق موش جُوَّاه
(102)
الآه وجع و الجدع عطشان لحرية
و اللى ف يوم إتمنع صوته صرخ فيَّا
هاتشوفى منى البدع فى العشق يا صبية
محروم و فجرى طِلِع و مصيري بإيدَيَّا
(103)
و بتفوتنى
و أهون على قلبِك القاسى و تنسى هوايَّا بالمرة
و اكدِّب برضه إحساسى و أقول دى خلاص آخر مرة
و لا يمكنِّى أفرَّط فيك و لا أبيع فيك و لا ذرَّة
و لو مرة باكشَّر فيك .. بيبقى كلااااام .. و من برة
(104)
يا أهل الهوي يا مجروحين يا عاشقين قبلي
ما فيش طريقة اللي بيها أغير اللي إنكتبلي؟
أصل الحقيقة غريبة و مين فينا بيقبلها
لا خلو بالي هويته و لا إنشغال البال طابلي
(105)
أنا بس باحاول و المحاولة شرف ....
يمكن تزيل من نفسى حالة قرف ....
أصل مش قادر أكبر دماغى .... عنيد! ....
و أصل تكبير الدماغ فى الزمن ده ترف ....
(106)
كان حلمى إنى فى بلدى أبقى حر و بس
ما حد يقدر يقوللى اسكت يا واد أو هس
اخرس لنقطع لسانك انت ليه لتات
مع إن معظم كلامى هداية لللى يحس
(107)
كل يوم بين البشر نزرع سدود
تطرح فراق تطرح ألم تطرح حدود
و يغيب عن العين الحبايب بالسنين
تشتاق قلوبنا لللقا لما نعود
(108)
صحى عمرى على نور اللى حبيته
شبيت شبابى على قلبى اللى كان بيته
و نطقت أول حروفى و جمعتهم كلمات
و رحت أكتب ديوان عاشق من رقته نسيته
(109)
فيكى ليه مالناش ثمن
رغم اننا ساعة المحن
احنا الصبايا و الولاد
تلاقينا بين صخر الرحايا بنطحن
(110)
نفسِك فى شيئ ....
و الشيئ متاح
و العُمر زى البحر قُدَّامِك براح
و الدنيا فاتحالِك دراعها بتِنْدَهِك
و الشيئ ده أصله من البداية مباح
و إنتى اللي غاوية الإنتظار
إنتى اللي عاشقة للجراح
أنا وقتى قرب ينتهى
و مافيش أكيد بعد النهاية سماح
(111)
أحب الست لو هادية
و لو راضية
و لو فاردة إبتسامة ع العيون نادية
و لو قابلة القضا المقسوم
تقوم م النوم و تسأل ع الحبايب بس
لاجل يادوب تكون بادية
باحب الست لو هادية
(112)
ياما حاجات ما بتتشريش بالمــــــال
و جروح ما عمـــــــر الوقت يداويها
راح تعمل أيه فى البخت لو يوم مال
و طعنة الخِل و الأحباب و بلاويها
(113)
معقول يكون كل ذنبى إنى حبيتك
و حرمت روحى الفرح لأنى بدَّيتك
يا دايسة ع اللي عِشِق فرحانة بالأراجوز
عامية يجوز
و لو إن عمرى ف مرة ما نسيتك
(114)
على حد علمى إن الوطن غالى
عشانه ناس ما كانوش رخاص ماتوا
شكل الوطن فى عصرنا الحالى
متباع رخيص مكشوفه حلماته
(115)
خاين لأرضك يا وطن
مين قال على التافه شهيد
خاين لشرفك يا وطن
مين قال نصالح من جديد
(116)
هاتعمل أيه إذا كان الأمـــــــل جنة
و طبع يا ناس ما بين الناس بيتغنى
يا حلو الرسم ويَّا الكسم و الصورة
على القورة هوى و طارح ما يستنَّى
(117)
تصدقى لو قولتلك ،،،،
ساعة ما أشوفك تبتسم روحى
و أخلع ثياب الهم و جروحى
و أرقص بدون إيقاع أو حركة متشافة
و أفرد مشاعرى عليكى صفصافة
و أبدأ بدون لجلجة شوية من بوحى
(118)
ما باقولش أنا باعشقك و العشق صار عادى
و فروضه مُستهلكة ل اللهو فى بلادى
أنا حبي ليكى بدأ قبل السديم ما يكون
يسعدنى أكون فى أى كون بمحبتك بادى
(119)
و عِشتْ Alone
و كان ذنبى إن قلبى حنون
و ف الدنيا مالوش غير لون
طلع مديون
عليه للحزن مليون Loan
و ف الآخر
,,,,,,,,,,,,,,,, آدينى Alone
(120)
حتى النهار .... يضحك على وجهك
و إن غِبتى عنى يتمِلِى بالغيم
و إن يوم تجورى بانسى و اسامحِك
أنا مُشْ باحس ف صحبتك بالضيم
(121)
يا نهار ضياه كان جاى بيتهَجَّى
باعت شعاع الشمس يِتْرَجَّى
بيقول صباح الفل يا بلدى
الغيبة طالت و أنا
مش لاقى و لا حِجَّة
(122)
يا شباكين عينك على الكون الرحيب
يا صوت بيوزن مركبى بميزان عجيب
يا بحر كل الموج بيسأل عنى فيه
أنا ليه فى بعدك بابقى كالطفل الغريب؟
(123)
لمسة إيديكى .... مش سلام
ولا كف يحضن كف عادى و السلام
وصلة مشاعر لما بتمر بكيانى
أنا بس باسرح بعد ما يعز الكلام
(124)
عنيكى ليه فيهم باتوه
مع إنهم جفنين و رمش و نِن عين
ضحكوا على قلبى و خدوه
و هناك فاتوه
و أنا للأسف ...... ماعرفش فين؟
(125)
أنا فيكى سفرى و غربتى و التيه
و إنت الطريق اللي عذابى ماليه
و باخاف حياتى تعَدِّى من غير ما أفهمك
و إنت الحنان اللي أكيد ... ربك فطرنى عليه
(126)
نظرات عيون
فى عرفهم لا يرحمون
و كلام كتير رايح و راجِع فِ الفَضَا
و كأنه جلسة فضفضة
مليان شجون
و القصة راحِت ولَّا جَتْ
من غير لا لجنة ولَّا بَتْ
نظرات عيون
(127)
أنا موْقِفي
و عشان كده مِش مُختَفي
صادِق وفي
و عشان مبادئ صُنتَها
بيقولوا عني ،،، مَتْحَفِي
و أنا مُكتَفي
إنى أكون ،،، أنا مَوْقِفِي
(128)
الرسالة للكسالى
بشكل نافي للجهالة
العمل هو الوسيلة
إوعى تقبل تبقى عالة
و إن آمنت بالإستحالة
إوعي تزعل لما غيرنا يصنفونا
إننا حبة حثالة
(129)
حلمى وطن
رافع رقبته لفوق شموخ
صاعد فى كل مجال صاروخ
بيحطم الأوثان بهمَّة
و عنده ذمة
كلمته تملا النافوخ
(130)
طب مين أنا؟
حلم أكبر من حقيقته؟
ولا ضيف و ماجاش ف وقته؟
و لا فكرة دماغها ناشفه؟
و لا إنسان مال ف بخته؟
(131)
طب مين أنا؟
سجين فى أعراف المكان؟
أو ضيف و جاى عبر الزمان؟
أو شخص متمرد عنيد
عايز يشوف مستقبله قبل الأوان؟
(132)
طب مين أنا؟
طفل ما يكبرش قلبه؟
أو شبح مافى حد غالبه؟
ولا نفْس سبب عذابها
حد ما بتقدر تعاتبه؟
(133)
حلمى وطن
واسع لأحلام الجميع
أب لعجوز أم لرضيع
و اللي بيزرع فيه أمل
عمره ما يمكن يوم يضيع
(134)
حلمى وطن
العمل فيه أعلى قيمة
إمكاناته مِش غنيمة
السواعد فيه عفية
و العدالة فيه سليمة
(135)
حلمى وطن
إختلاف أهله ثراء
يبقى مِ التمييز براء
أعمى مايشوفش الفروق
و بكل ذوق
بيضُم كل الناس سواء
(136)
حلمى وطن
ما بيفاضلش ما بين ولاده
عمره ما يـ أجل ميعاده
كلهم عند سواء ،،، حتى الرخاء
ما يكونش شاحح مهما زادوا
(137)
قلبى اللي طول عمره غبى
بيحِس ما بيفهَمْشْ
طول عمرى عايش و البراءة مذهبى
و العِشق ما بيرحَمش
محبوس أنا ما بين كتابى و مكتبى
و الأمر ما بيِسْلَمْشْ
دخل الهوى بطريق معرَّج لولبى
قلبى وقَع ولا قَامْش
(138)
آه يا وطن
فيك الآلام أنهار
و الجار يخاف مِ الجار
أغراب صحابك فيك
أنا كنت فاكرك شيك
أتاريك طلعت ،،،، حمار
(139)
آه يا وطن
تقرا الكتاب و تصدق الدرويش
و كل ما بتتوجع بتقول دى جات ف الريش
غلب حمارى معاك ومازلت بتعاند
و عاملى جامد و إنت كومة هيش
(140)
آه يا وطن
فيك البشر من كل نوع
ضحكك مغمس بالدموع
و الناس غلابة بيعشقوك
على دين محمد أو يسوع
و إنت اللي ماشى لمهلكك
ولا فيش رجوع
(141)
آه يا وطن
مسنود على حيط الكسل
عامل دماغ دمك عسل
فى الدنيا قاعد ع الرصيف
وسط الأمم ولا فيش خجل
يا ريت تفوق قبل النفوق
من كتر ماف جسمك علل
(142)
آه يا وطن
فاتح بيبانه للجيران
مزروع دروبه بالأمان
راضع غباء ما بينتهيش
يضحك عليه حتة جبان
و إن يوم وعى
يفهم و برضه يقول كمان
عارفنى من يومى ماليش فى أى رهان
خدتك أنا ف كومى رغم إن أنا الخسران
بلدى و بحبك موت و إذا حتى بالنبوت
هافديكى مهماً كان
(143)
ما تهزنيش كل الكنوز
و الدنيا عندى أقل شوز
باهزمها وقت مافيش مناص
ما يهزنيش لو يوم تفوز
ما أنا أصلى بإيديا الخلاص
بس أما أعوز
(144)
دخل الشيطان .. قفل البيبان
و قاللى مال قلبك وقف؟
بصيت ف عينه بكل خوف .. فجأة إرتجف
و سألنى شاعر بالأسَفْ
بقى كل دى أشواق و حب؟!!
إدينى حبة و لو سلف
(145)
ماتصدقيش لو قلتك مرة إن حُبِك هان
و لا إن شوقى و لهفتى حطمهم النسيان
و لا إن حبِك قَلْ بمرور الزمان
ولا عاش لسانى إن قال ف يوم ولا كان
حبك قدر حابب أعيشه برغم مُرْ مافيه
و هاكون سفيه لو قُلت كان ياما كان
و إن قالوا عن حبك خطر أنا لسة شايفه أمان
و أرجع و أقول ما تصدقيش
لو قلتلك مرة إن حبك هان
(146)
يمين بالله
دى ضحكة ف وشى من وشِك برزق سنين
و أقول باهواكى و لا باسمع لــــ لوم لايمين
و يكفينى يا ست الحسن إن إنتى
كــــ تأشيرة دخولى لدنية العاشقين
و باحلِفلِك بصدق العشق ولا ليكى عليا يمين
(147)
مترين كستور على دخلة شِتا واقفين بالدور
أردب الغلة المتوفر و التعريشة من فوق السور
لا تقولى دى مصر بتتغيَّر و لا تتحيَّر و لا جاى دستور
دول معظم أهلى و أهلك دول عايشين ع الفول
عاشقين للنور
و لايشغل باله .. إلا ف حاله كله وماله .... كل آماله:
فى الآخر فيه مترين كستور؟
(148)
يا مصرى يا توأم أسى
ياللي الألم بيك إكتسى
الصبر موش صابر عليك
و الحزن ليه عندك رَسَى؟
(149)
سيبك من الفلسفة
فى الحكم يابن الناس
فيه ناس على الأرصفة
حافيين مالبسوا مداس
خَدوا مِ الكلام الكِفَى
ما جنوش غير الإفلاس
(150)
المتعة شيئ نسبى
و أنا صُحبتِك حَسْبِى
يا أغلى شيئ فى الكون
قلبى تِعِب .... حاسبى
(151)
أنا ... ما باخافش م الجلَّاد
برغم إنى رقم فى خانة الآحاد
لكن عمرى ... ما كانلى من البشر أسياد
و دينى سِرَّى مع ربى بلا وسطاء من الأوغاد
و مش قابل ..... يكون بينى و بين دينى
رسول من مكتب الإرشاد
(152)
الحُب ليه ويَّاكى بِكر؟
و ليه شفيف و كأنه ذِكرْ؟
و ليه عجيب معجون بِسِحر؟
أنا قلبى داب إطَّمِنى
ما يكونش عندِك أى فِكر
(153)
بتغربينى بكلمتين و إنتى الوطن
قلبى اللي كان جاهل غرام فتَّحْ ،،، فَطَن
بقى كلمة واحدة تطلَّعه لسابِع سما
و بنظرة يعمِل ملحمة ... و يدوب شَجَن
و يعيش مشاعره كلها كفروض صلاة
ماظَهَر منها و ما بَطَن باقى الزمن
(154)
صابح مفنجل عينى فيكى كما النهار
دافع ضريبة شوقى ليكى الإنتظار
أرضى الشراقى لخطوتك متأكدة
كده أو كده حبك بيملا الكون خَضَار
(155)
إفتح ببان قلبك
و عيش
و إلبسها خيش
أصل الزمن
.. لحظات
ساعات تفوت،
و حاجات تموت
و حقيقة راسخة
ف الثبوت
إن اللي راح
مهما إتْعَمَلْ
ما يجيش
إفتح ببان قلبك و عيش
(156)
ريحة البُن بتجنِّنى رغم إني
ما ليش فى الكيف و موش حريف
كما الرجَّالة من سِنى
لكن باشعر بأنها حالة
بتخلينى باتنَشَّق على قْوَالَة
كلام عكس اللي بتظُنِّى
و أعمل أيه بقى ف إنى
ريحة البُن ف المكتب ..... تجَنِّنِي
(157)
ممنوع عليا اللمس ..... و موافق
و بتهربى م الهمس .... و موافق
بس أما روح تِتْمَس .... سامحينى
و لا كنت يوم و لا أكون ... فى الروح أنا منافق
(158)
هو أنا لو روحى هامت بيك و سافرت للخلا
و العشق عشش ع البدن خلَّى اللسان مرة إنجلى
و كتب كلام عاشق بينطق فيه هواه
و الشوق كمان دارت مع الأيام رحاه
و النوم نساه ... يبقى الفؤاد بيك مُبْتَلى؟
(159)
مزروع أنا نبتة ف غيطان الغربة يا وطنى البعيد
نهرك خلاص بطل يفيض و أنا ف الهوى مشروع شهيد
حتى المطر شعرت غيومه بالخطر و اﻹنتظار ما بقاش يفيد
يا حبيبتى إنتى حدودى و بيوت الجيران
و إنت الكلام الحلو و موسيقى النشيد
مزروع أنا فوق الخدود ماعرفش أجيلك بالبريد
(160)
عارفة ...
كل الكلام اللي مابين الناس كلام،
يفضل كلام
أما اللي بينى و بينك إنت و لو ملام
و لو عتاب
و بصوت مافيهش صدى إهتمام
بيحس بيه قلبى و ودنى بتعشقه
و كأنه موال للغرام
ما تبطليش يا حبيبتى، قولى ما تسكتيش
غيرك مافيش،
و ﻻ حد عشش فى الفؤاد و منعنى أنام
أصل الكلام منك حبيبتى ماهوش كلام
طعم الحروف منك غُنى،
و أنا لو سمعتك كام سنة
هاترجى فيكى تعيدى تانى ﻷلف عام
.... كل الكلام
(161)
بان على كل إلتفاتة و حرف خارج من لسانى
إنك حبيبتى، إنك معايا، إنك عشانى
و إن أنا ف حبك أنانى
بان عليا و موش هاممنى، بس دا ملخبط كيانى
حسسينى إنك ملاحظة اللي العيون شايفاه
حسسينى بطيف عيونك بيتابعنى
أيوا أنا .... موش حد تانى
أى حد يبص على حالى هايفهم إنى عاشق
و إنى موش شايف من الدنيا إلا صورتك
و إنى واهبلك حنانى
حسى بيا يا اللي ف العمر الأمانى
مستحيل بعد اللي حاصل تبقى لسة مكذبانى
(162)
لولا (إلا) ... كان زمان الشِعْر ذِلَّة
إِفْك موش مِحتاج أدِلَّة
كُل غاوى يبقى هَاوِى ... ع الوجُوه لولاها (إلا)
كان زمـــانُه ... فِعْل شَائِن
و إتِّهــــام فى كُل مِلَّــــة
بس (إلا) ... فتحِت الباب الكِـــــــــبيِر
فرَشِت الأرضْ بحـــــرير
للكلام ما يكوُنْش عِـــــلَّة
كُل شِعْر الدُنــــيا .. يِهرَب مِن كِسُــــــوفه
و ف حُرُوفـــــه ... يدارى خُوفُه
لــــمَّا يِتشَعْلَقْ بـــــ (إلا)
(163)
إحكم على الناس كلها
...... و إطلع بريئ
إكسر حدود الإحترام
...... و إعمل جريئ
بس إن عكست الصورة مرَّة
ف لقطة حُرَّة
و شوفت بعض تصرفاتك
راح تقول إنك بذيئ
(164)
ما حدش قال على مصر إنها جنَّة
دا من حظك ... إن بجد ما قولناش
ما يمكن لو بقت ....... جنَّة
بسوء فِعْلَك ... ما تدخلهاش
(165)
عمرك ما بين الناس شريط ...
خليك حويط
سجَّل مواقف .... تشهد إنك موش عبيط
و إنك بشر .... عاش ف إنتظار يوم يتحَشَر
إنسان و متواضع .... بسيط ..
خليك حويط
(166)
أغرب من الناس ........ بعضُهُم
لما يعيشوا كأنهم ........ مِش منُّهم
و يمارسوا دور الأبريا ........ و الأوليا
علشان يادوب ........
يرموا على غيرهم ........ تُهَم
(167)
عيبى ساعات ...
إنى باشوف جوة البشر من غير شاشات
ما تروحش عينى لمغريات
و لا كم مساحيق خادعة، و لا حتى مسحات الدِعَة
و باشوفها من غير إفتئات
نفس البشر جوة البدن، صورة الضمير خلف الصفات
ده بيبقى عيبى عندهم ...... طول الساعات
(168)
قليل جدا ... إذا مرة الزمن يدى
و لو مرة الفرص هلِّت ...
بسرعة برق بتعدى
(169)
خدنى على جناحك و طير
و إرسم حروف إسمك بصوت عصافير
و بلون طرب و نغم نسيم الصبح إنسجنى
و فـ عِز ليل العتمة بعد البُعد إسرِجنى
و إضحك بعزم مافيك و عاند غربتك
بمحبتك ... قلبى تفاءل خير
(170)
يا أغلى الناس مكانى عندكم مشغول
و أنا اللى باغنى أشواقى على الأرغول
لقيت صوتى ما يطربشى، ف قلت أمشى
عليك ربك ما يحكمشى
و تِتْعَذِّب بحكم عزول
(171)
كان ف يوم .... طفل، و طفولته ما غادرتوش
كان شايلها بعيد عن الناس و الوحوش
و أما فكر بس حبة ...
شاف هدوم الناس عيوب
قام مِطَلَّع من الجراب كل الطفولة
... و عاشها طِفل ما همهوش
(172)
و كالعادة ....
بتِبْدأ رحلة العشق بمُنَى
و ما تِنْتِهِيش بعد اﻷلم بمَنَال
هايفيد بأيه يعنى الغُنَى
و البَخْت فوق نوق الحبايب مال
(173)
روحى اللي متشعلقة بوعودك الناسيين
و كأنها فوق طرف بلكونتك زهرة فى عود ياسمين
و أنا عمرى فصلين ف السنة فات الربيع فيهم
و اﻷمنيات ملو الزمن و منين أكفيهم
و ﻻ عمرى هافرح و إنت مهمومة
و ﻻ عمر عينى تروح لناس تانيين
(174)
و ترسمنى السنين برصاص
على جدران بيوت بايشة
و باستر نفسى باللي معاي
و خلقاتى ماهيش حايشة
و أرمي بروحى وسط الناس
ألاقى الناس ماهيش عايشة
صرخت و صرختى طاشت
يا ظالم ...... خاف من الطايشة
(175)
و موش معنى إنها ضحكتلى ... يبقى خلاص
دى خاينة و تعشق البصباص
و مالهاش ع الدوام صاحب، و مالهاش برضو ف اﻹخلاص
و تييجى بدون سبب و تروح، و كام ملاح ف بحرها غاص
عويصة و حلوة بنت اﻷيه، و معزور اللي جه برجليه
أكيد عاملاله تخفيض خاص
و تسألنى ... دى مين هيا، أقولك مين غير الدنيا
ما تتصدقش و لا ثانية، و موش معنى إنها ضحكتلي
يبقى خلاص
(176)
دخل الشتا
و البطانية ف إيده و الريح ع الحدود
ماسك عصاية قائد الفرقة الشقى، عبد الودود
شاور على البرد إبتدا
يعزف و كَرمِش جلدنا حتى الخدود
فجأة إنتفض ....
و بطرف آخر حتة باينة ف العصا
غز المطر جوة السحاب، هاج و إستجاب
و لا مرة لأوامره عصى، صاحبه اللدود
