كلمتين
طب كلمتين!!
طب حتى وِش بيبتسم من فين لفين!!
طب حتى همسة و تنقلب بالمرة غمزة
تقوللى حاسس طول غيابك بالحنين!
طب مرة حسسني بوجودك
لو بتخجل من ردودك
وﻻ مكسوف م العنين!
طب بس عرَّفنى إنت فين
ما تخلِّينيش أفضل كِده
أخبارى موش متأكِّدة
أسأل و أدُوُر على دَا وِدا
و أنا كل طمعى ف كلمتين
طب رِق ... لِين
إرحم حبيب
عاش منتظر يوم يلتقيك
عاشق ملامحك ع المدى
بيحِس بيك
بجوارحه بالشوق معترف
فاكر هواه سره الدفين
ساكت عن المفضوح ف نن عنيه
طب يِعمل أيه .. مجبول عليه
و لاهوش بيطمع غير ف همسة صغيرة
من حين لحين
أو حتى وكزة بالشمال أو باليمين
أو حتى مرَّة مراسلاته
تبقى .. سين (Seen)
لمين باقول باحبك
(1)
موش باقول كلمة باحبك
ل اللي قلبى ما حبهوش
حتى لو راح ينصدم
أو كان ف عرفه بينظلم
يكفيني إنى ما باخدعوش
ماباحبش الحرف المزَوَّق
و اللي متخفى برُتوش
و اللي موش طالع بنبض القلب حَىّْ
مالوهش زَيّْ ....
ما بافهموش
موش باقول كلمة باحبك
ل اللي قلبي ماحبهوس
(2)
قولتها لقلوب خانتنى
و قولتها لقلوب باعتنى
و ياما كان ...
يطلع خيالي على فاشوش
و قولتها لقلوب حجر عامية البصر
ما بيرحموش
و قولتها لقلوب ماتعرفش العواطف
حتى أقوى من المواقف
و الشعور ده ما تفهموش
بس قلبى ....
كان عامِيه حبه الكبير
لو عِشِق يفضل أسير
كل عيب ف حبيبه دايما
ما يشوفوش
(3)
قولتها لقلوب رقيقة
و قولتها لعيون بريئة
فى الحقيقة ....
مهما شافوا ما يكذبوش
قولتها لقلوب حرير
كان قلبى بجناحهم يطير
كات كل أسرارهم حروفها
على الوشوش
فرقتنا سنين و صالحتنا الليالى
و سكنوا بالى
القلوب دى ... مهما غابوا ما يتنسوش
دول و غيرهم علمونى
إنى عمرى ما أقول باحبك
ل اللي قلبى ... ما حبهوش
السر الكبير
باعترفلك تانى بالسر الكبير
أيوه باهرب من كلام
لازم ضرورى هاتقوليه
الوداع، باي باي
و أشوف وشك بخير
لما عينى تبص ف عيونك
و يهرب دمعها
و أبقى نفسي إنى أحتويكى
و موش كتير
و الكلام يهرب من الموقف بحاله
و من جماله
الشوق ما بين شعرك يطير
ينزل حرير
يمسح على عيونك بطرف الإبتسام
يزرع غرام ...
يطرح على خدودك عبير
أيوه باهرب من وداعك
لما اسيبك قلبى ها يحس إنه باعك
و أما أشوفك
بابقى نفسي يطول سماعك
و أبقى ليكى يادوب .. سمير
و أعترفلك تانى بالسر الخطير
باعشقك و العشق كنزى
اللي رافض أى بير
باعشقك و أنا بس نفسى
نفسي أشوف وشك بخير
ما باقيش كتير
ما باقيش كتير و هايخطفك منى السفر
و السر راح يفضل فى بير
و الحلم ﻻخضر
لما كنت باروح معاه آخر المدى
فجأة إبتدى
يمسح من القصة اﻷميرة و اﻷمير
و ده موش يسير
بس الحقيقة
عيونى هاتصاحبك هناك زى الملاك
و كأنى طير
حارس على عيونك يغير
ما باقيش كتير
شهرين و هاتفوتى الحبايب ...
مجروحين
ما بيسألوش غير ع اللي غايب
قلبى دايب ...
فايته لرموشك أسير
ما باقيش كتير
روحى اللي بيكى إتعلقت
و بمية العشق النبيل إتغرقت
و إتقسمت و إتفرقت
على كل حتة أنا يوم قابلتك فيها
أو سيبتي العبير
باكي على فراقك بكى
مر و مرير
على كل حال ..
الوقت بيفوت بالعجل
و هاقول لقلبى اللي إحتَمَل
ما باقيش كتير
ما تحاسبينيش
ما تحاسبينيش ......
على إنفعال روحى بوجودك فى المكان
دا مهما كان ....أنا عبد مجبول ع الحنان
و إن طال ينول ملوْ المحيط
من بحر حبك برضه هايقولك كمان
ما تحاسبينيش على شوق بدى
ساعة ما شوفتك ع المدى
يا كحل عين القلب و جزيرة أمان
ساعة ما اشوفك
ليه باحس برغبة فى كسر الساعات
و اتمنى لو يقف الزمان
ما تحاسبينيش على قلب حبك
خالف الكل ف هواه
و إتمنى لو يكسب رهان
مدى إيديكى و طبطبى ع الروح
و هدَّى م الجروح
أنا نفسى أقول ... آن الأوان
مكتوب على جبيني
مكتوب على جبيني إنى عاشقك
و الجبين ... صفحة قدر محتوم
على شط بحر العمر مركب دفته
بتعاند التيار و بتشق الغيوم
و أنا من زمان باحلم بعش يضمنا
مافيهوش من الدنيا إﻻ عشق
مناه يدوم
و أمان بيرتاح عندنا بعد التعب
عمال بيكبر كل يوم
أنا كل حظ الدنيا ف غيابك شقى
و لو إنتى حظى،،
أنا هارضى بالمقسوم
مكتوب على قبة سمايا محبتك
مالى بقى بعيون ماليها اللوم؟
يكفينى نظرة .....
تقوللى أيوه باعشقك
هافرح ل لما يجافى عينى النوم
و أصبر على رزقى اللي كاتبه ربنا
حتى الغياب هاعتبره ندر بصوم
مكتوب على جبينى إنى عاشقك
و الجبين .. مكتُوبُه صار محسوم
متغربة عيونى ف هواك
و تسافر اﻷحلام بعيد
و أفضل هنا .. و الروح هناك
و الكرَّة تبدأ من جديد
مجمل حياتى إنى ف سفر
رحَّال وراك ..
و عشقى ليك .... ده أكيد
ماعرفش مالي
(1)
رغم ان حبك فى العيون مكتوب
و متستِّف لفايف
رغم إنه مرسوم ع الجبين
و منقوش ع الشفايف
لسة قلبك قافل الأبواب
و عامل بالخداع
قال يعنى موش شايف
و أنا كل حاجة ف دنيتى
شاورت عليكى
و كل يوم بيفوت
و أنا ف بُعدك باموت
بيفوتنى خايف
(2)
محتاج و لو لمسة إيديكى
مستحيل أصبر كده
عايش على أمل اللقا
لو إنت موش متأكده
طب أيه بقى؟
حسى بمشاعر روح
بتتعلق بطيفك
بالوريد اللي يغذى القلب
حاضن حد سيفك
إوعى يوم يبقى اليقين ف عيونى
متعلق بزيفك
و حتى لوْ ...
ماقدرش أخبى الحب أو ألغى إنشغالى
و الحقيقة واضحة جداً للعيون .. و فاضحنى حالى
موش باحبك موت و بس
لأ صحيح.. ماعرفش مالى
إوصفيلى حالي
كلمينى عنى عندك
و أوصفيلى أنا حالى أيه؟
لسة لاعب بيكى عِندِك
ولا قلبك ثار عليه؟
حَسْ بالشوق اللي بيا
و لا قلبى و اللِّي فِيه
مَدْ إيدُه لمَسْ مشاعرى
و لا داق حُضنْ الحنين
عاش حالات إحساس بشعرى
أو سمع آهة أنين
كلمينى تانى عنى
و إوصفينى أنا تُهت فين؟
طمنينى أنا كُلِّى دايب
مَنِّى قلبى بكلمتين
بس إوعى تخدعينى
دى الحياة أصلاً يومين
حبك شهيق
(1)
حبك شهيق .. داخل يآنس لوعة اﻷشواق
خارج زفير .. شايل رسايل مليانين برجاء
ما تطوليش غيبتك ﻻ أموت عطشان
مقطوع نفس حبى و مالوش علاج الداء
و أنا مهما طال العمر محروم م اللقا
موش شايف اﻷيام ف بعدك م الزمن
عمرى الحقيقي لما أشوفك كل يوم
و أنا موش بإيدى أفرض قدر
و الله يفعل ما يشاء
(2)
حبك كما النبض اللي بيدق بأمل
و ما يكتمل ..
معنى لحياتى بدون هواكي
ما تحرميش عاشق
من الحلم الجميل و مالوش بديل
ياللي غرامك كان هدية من السماء
حبك شهيق العمر لما بيبتدى
بادعى بأمل
يا رب ما يكونله إنتهاء
تانى السفر
بيطل من بين الليالي كما القدر
و يقول خلاص حان الرحيل
يفرض عليا المستحيل
طب كان يقوللى ... أو ينبه ع القليل
عارفانى عاشق صحبتك بالمختصر
تانى السفر؟
هاتطاوعك الأيام و ترحل من جديد
و الليل هايسكن فيه شجن و سهاد عنيد
حبى الوليد
ما لحقش يمشى ف سكته و يفوق لحاله
و لا يزرع عشقه كل الكون بحاله
بيدوق ف بعدك جمر يجرى ف الوريد
و يسيب أثر ... تانى السفر؟
أيه اللي فيكى مختًلِفْ؟
(1)
صمتك مجنن قلبي
و بيطرح سؤال
محتاج إجابة تطفى نارى
تكون علي رأي اللي قال
بهدوء شديد
و بدون تشنج و إنفعال
أيه اللي فيكى مختلف؟
مافيكيش جديد .....أنا معترف
طب ليه كيانى و حالى
بقى غير أي حال؟
(2)
بُعْدِك محال
النوم يضيع و الشوق جبال
قربك كمان .. بقى حاجة فوق اﻹحتمال
ماقدرش أشوفك
و أمنع الشوق اللي طال
و أقعد أحسس ع الكلام
و أنا ما إدعيتش ف يوم كمال
و أعمل حساب لعيون كتير
راصدانى حتى ف الخيال
أنا ضد تصنيف الهوى
بين الحرام و بين الحلال
(3)
أنا كل حتة ف جتتي عاشقاكى موت
و باموت ف لحظات السكوت
و باقول كلام يوصل لقلبك
بالعيون مكتوب و موش محتاج لصوت
و ب أكِز ع الوقت بسناني
نفسي لو بطَّل يفوت
و أرجع و أقولك من جديد
و بدون فصال
صمتك مجنن قلبي و بيطرح سؤال
أيه اللي فيكى مختلف؟
و شبكنى من بين الرجال؟
عاجِزْ عن التعبير
كل الكلام عاجز عن التعبير
بيقِل عن وصف الحقيقة و ناقصُه لسة حاجات كتير
بامسك إيديكى يادوب ...و بابقى خلاص باطير
و بابص فى عيونك و أتوه
دا أنا حتى من نفسي باغير
يبقى أما خدي ف مرة يلمس خدك الوردى
ما تكونش لحظة خلاص و هاتعدى
غارقان فى دنيا من الحرير
نشوان فى موجة من العبير
عارف ... مانيش أول حبيب
و أتمنى إنى أبقى الأخير
سامحينى على حرفى الشقى .. و إتحققى
كل الكلام عاجز عن التعبير
بيِعْشَقْ ضِحكِتى
قولي لكل الناس بيعشق ضحكتي
و يدوب فى نظرة عين
و بيوهِب العمر اللي باقى يكون
يادوب لمحبتى
قولي إنه شايف فيا كل الناس
و مغرق الدنيا بندى و إحساس
و عيونه شايفاني النهار
حارساني ساكنة ف سكتي
قولي الحقيقة و عرفيهم قد أيه
اللهفة ماليه عنيه
و ما تخجليش تحكي غناوى الهمس
أو غزل اﻹيدين و الدغدغة و اللمس
قولي إن حبك دنيته
قولي إن حبك دنيته
و إن أنتي ليلُه وبرضه ويلُه و فرحته
و كمان حروف إسمه و كل هويته
قولي لهم بس بكلام مفهوم
قولي و سيبك م العتاب و اللوم
قولى إنك إنتى قضيتى
و هديتي ...
و ف عتمة الليل الطويل
أنا شايف النور من عيونك .. شمعتي
قولي لكل الناس ... بيعشق ضحكتى
ما بِترُدِّيش
(1)
طلبتك ،،،،،،
بس كالعادة ما بترديش
و كان نفسي سماع صوتك ... ما بتحنيش
و ياما كتير وعدتيني .... و ما بتوفيش
طلبتك ... و الطلب ملهوف
و داب ع الشفتين شوقى
و ضاع من حلقي طعم حروف
حاولت أكتم مشاعري كتير
و أنا اللي لساني ما يخبيش
ضربت النمرة كام مرة ...
ما بترديش
(2)
غريب حالك إذا غبتى
باحس إنك ماهوش إنتى
بتتبدل مشاعرك خوف
و فى لسانك كلام مكتوف
و حاسة إنك خلاص ضِعتى إذا لِنتى
و لما عنيا بتشوفك يضيع خوفك
و بيموت الأسى كله
يفوت ضله على كسوفك
يهون كل العذاب و يروح
و إنتى الروح ولا هُنتى
و غير حبك لقلبى مافيش
و لما أطلب على رقمك ... ما بترديش
ريحتك فى المكان
هاتصدقي لو قولتلك ...
باشم ريحتك ف المكان
و باحس بيكى نسيم و باشعر باﻷمان
و باشوف ملامحك فى الوشوش
ف عيون صحاب مابيكدبوش
حتى الخطاوى
تبقي و ﻻ صوت الكمان
... جوة الودان
تطربني موجة شعر في بحور النسيم
و تهزنى و باقول كمان ......
و باشم ريحتك فى المكان
و انده عليكى
يرد على صوتى الصدى
و المح فرح كحَّل عيون طيفك
إذا مرة بدى
يا نجمة فى ليل المنى بتفيض سنا ...
بيها الفؤاد راجع صوابه و إهتدى
لملم شتات العمر مشتاق للحنان
راجع و كل ما فيه يقول آن الأوان
هاتصدقى لو قولتلك ...
مشتاق لريحتك فى المكان
إزرعنى أرض
(1)
إزرعني أرض ... و أسكني دار
و إضحك فى وشي .. كما النهار
سافر بحلمك فى الخيال
و إفرد ستايرك ع الدﻻل
و بجيم و دال، خليني جنبك بس جار
إزرعني أرض ... و أسكني دار
(2)
طبطب عليا بكف نور
إغسلني بعنيك م البحور
إحضني لما نكون سوا
إرقيني تمتم بالهوى، و إن طَلْ بُعدَك أو نَوى
إقفل على اﻷشواق بسور
دا البُعْد نار
إزرعني أرض ،،، و إسكُنِّي دار
(3)
إرسمنى نجمة فى السما
خايف و لاذ بيك و إحتمى
ضلى و صدى صوتي
ستري و ورق توتي
فى البحر كون حوتي
نكتب سوا ملحمة
و أنا أكللك بالغار
إزرعني أرض ،،، و إسكُنِّي دار
بِتِكْذِبِى
بتِكذِبى...
و لَوْ ماهوش فارق صحيح ... قوليلى ليه تِتعَذِّبى؟
و تعيشى تِبكى ع اللي فات و بحِبر ألمك تِكتِبى؟
بسهولة ممكن تنكرى أو تِغضَبى
و تردى رد ماهوش تمام
فَ بلاش كمان تِتعصَّبى
إتعلمى شوية سماح إتصنَّعِي طبع الملاح
دى الطبطبة في ساعات كتير
بتِبقى بلسم ع الجراح ... و دا مطلبى
يمكن تشوفى إنى غبى
بس الغرام ضد الخصام
طول عمره كان ده مذهبى
يمكن صعيب ,,,, أو حتى عيب
بس إنتى مرة جرَّبى
العِشقْ تِرياق الهُموُم
(1)
العشق ترياق للهموم
و أنا فيه ما كنتش يوم كتوم
بيبان عليا العشق و بيصرخ غرام
من غير كلام باين هوايا على الهدوم
فاضحانى نظرة عينى على طيف الحبيب
و إن يوم يغيب ،، و لا شيئ يطيب
حتى النسيم لو مر من غير عطره فيه
ما هاحس بيه ..
و انا هاعمل أيه ف طبعى العجيب؟
ما أقبلش فيه و ف عشقى لوم
د العشق ترياق الهموم
(2)
ترقص حروفى
أما الحبيب بيكون قريب
و الشوق يبان فى العين رهيب
و مانعنى عنه العُرف
و الناس و القدر
حارمانى منه القسمة
و ساعات النصيب
و رابطنى بيه رابط يدوم
و على العموم ،،،
العشق ترياق الهموم
نفسى أتكلم عنك دايماً
عارفة ...
نفسي أتكلم عنك دايما
و أملا الدنيا بحالها كلام
و أحكى حكاوى و أغنى و أدندن
و أسكن قصرك فى اﻷحلام
و أوصف أحلى شعور حسيته
و أجمل لمسة إيد ف الدنيا
وقع كلامك صمتك صوتك
حتى عتابك لو يعاتبتي
من غير لَكْ .. أنا باصفى ف ثانية
نبض القلب اللي صبح عايش
بعد ما كان صخر و ألمونيا
نفسي أتكلم عن أخلاقي
اللي بقت بالهوى حاجة تانية
نفسي أتكلم عنك لما
بالقى ودان شكلها مهتمة
و أبعد عن حاسد مشاعرنا
و اللايم و اللي ما يتسمى
أصل كلامى معاكى و عنك
شيئ بيخلي الهوى يتنمي
يغسل روحى بنور و سلام
نفسي أتكلم عنك دايما
و أملا الدنيا بحالها كلام
مين بيجرح مين؟
(1)
قوليلى مين بيجرح مين؟
و مين ورا طيشه قُلت أمين؟
و مين متوحد النظرة
و مين موش واضح الفكرة
و مين خادعاه غشاوة العين؟
و مين متعسف الأفكار
و طبعه شرار، و عاش مغرور
و قال بالحب أنا أدرى
و مين تايه مع التايهين؟
قوليلى ... مين بيجرح مين؟
(2)
أمين على سر كان بيننا
و ع اللي ما كان و ع الأحزان
و فايت قربك الجنة
و أخلاقى اللي بعترتيها بالأوصاف
بقت أغنية تتغنى
بتمنعنى إنى أجيب سيرتك
و أقول يا رب تتهنَّى
و لا عاوز أسف منك
و لا للقانا عاد معنى
و لا ليه حتى أنا باشتاق
ولا ملهوف و باتمنى
و لا عندى إتهام ليكى
و لا ع الحق باتجنى
(3)
و انا و إنتى فى فعل الماضى قصتنا
و موش هانكون ..
خلاص كُنا
و من غير دمع
موش هانهون ...
خلاص هُنَّا
أنا و إنتِ دوانا البين
و موش عاوز كمان أعرف
مين الجانى
و مين فينا بيجرح مين؟
باشتاقلِك
و باشتاقلِك
و أكون حالف خلاص هانسى
و هاتعلِّم ف يوم اقسى
و أسيبك ل اللي يستاهلِك
و باسرح بس مع حالى
ألاقى لُغاكى يحلالى، و أشتاقلِك
أمانة عليكى ما تخلينى أتعذِّب
لا أنا خاين و لا عمرى ف يوم باكذِب
و حبك عندى شيئ ثابت
بدون ما امضى بدون ما اكتِب
و كل جوارحى تشهدلِك
بإنك و إنتِ وَيَّايا
كتير و الله باشتاقلِك
حبك بلا ترجمة
حبك مالوش ف الترجمة
يا قصة غامضة و مبهمة
يا قبلة العاشقين ليوم الدين
الدهر ليه حالف يمين
و القاضى رافض شكوتي
زَوِّد عذابى و بلوتى
و ﻻ بص يوم فى المظلمة
من يوم ما قابلتك و انا
باشكي العذاب مر الضنى
و بادُور بقالى كام سنة
ما لقيتلي أبداً محكمة
حبك مالوش ف الترجمة
