أبكم معاكى

أبكم معاكى
و رغم صمتى بتشتكى
و أنا لو هاسيب الحبل للسانى
أكيد
يطلع كلام ما بيِنْحِكى
باتنفسك مع كل شهقة
و ف الزفير
يطلع لهيب الإشتياق
باتْلَمّسك
ف الفجر و الليل و السما
و أكتب بروحى ملحَمة
ما بتعترِفش لا باللقا
و لا بالفراق
باعبد إله الكون ف نجوى
و بابقى أقوى
لما بالمح
طيف خيالك ف المكان
و الروح إذا
حست بروحك ف الفضا
بتكفينى سلوى
تملا كل الكون أمان
أنا أصلى من قبل الزمان
مستنى لو آن الأوان
ماعرفش أيه معنى الزمن
و لا معنى حب بدون حنان
و لا أى دين ينفع يكون
إلا بنبى و ذكر و أدان

و خشوع ورعشة ف البدن

و شعور يسيطر ع الكيان

و فروض ولاء متسرسبة

و رجاء بفضل الله يبان
و أنا فيكى باعبد ربنا
و مشاعرى ترنيمة إيمان