الحرف يبخل بمعنى

مرَّات يضِن الكلام

و الحرف يبخل بمعنى

و لا فيش مكان يا زمان

بالصدفة مرة جَمَعنا

و لا حتى فيه مواعيد

لغرام يلَوَّعنا

حكم القدر و خلاص

سلِّمنا و أطَعنا

سامعين لُغاك يا حنين

طب مرة تسمعنا

كل الكلام إنكتب

ف مسيرة العاشقين

و أنا بس باخشى العَتَب

لو جَهْ الكلام بحنين

لفيت دروب الكلام

على كل حرف جديد

أبعت معاه السلام

و المعنى بالتحديد

و لقيتنى حاير ف توهة

و رجِعت تايه ف حيرة

و مشاعرى لو غَلِّفوها

موش راح تليق بالأميرة

و أنا نفسى أقولها بعيونى

تقراها هيا براحتها

و أنا بس لو مكنونى

ماضمنش روحى ساعتها

هاقدر أواصل و أعبَّر

و لا الحروف هايخونونى

و أفضل أسبَّح و أكبَّر

لأجل الملايكة يغيتونى

أنا بس هاسكت و حالى

موش خافى على حد شاعر

تنطق بعِشقِى الليالى

و تقول كلامها المشاعر