لما
الكلام بياخدنى
بانسى
الأرض و الناس و الزمن
بانسى
المسافة و الحواجز كلها
و باحس
إنى كما الغريب
اللي
كلامك ليه وطن
و باحبنى
جداً و أنا
مجنون
بحرفك و المعانى الحلوة فيه
سابح
ف وسط ساعات سكوت
و الصوت
صدى جاى من بعيد
عند
المعانى الحلوة ف الملكوت
ألحان
بتملانى بشجن
عارفة
إن طلبتى الروح .. هاجود
و أدفع
كمان من غير حدود
أصل
الوصال مالهوش تمن
و أنا
باقى روحى الحلوة لما باكلمك
و استلهمك
تطلع
حروف الشعر أصفى من الندى
مرسومة
على ورق الشجر
حاضناها
جناحات النسيم
و البُعد
غيم
بيزول
بشمسك لما دايما تطلعى
بنهار
أنا بيه مُفتَتَن
و بتبتدى
معايا الكلام
و أنا
تانى بانسى
الأرض
و الناس و الزمن
