أمـــــــانى
يا اللي إسمك كان أمانى
إتحققت و بقِت أغانى
بس ليه دايماً بقسوة
بتسيبينى كتيرباعانى
مِن شُعور بالغيرة دايماً
لو تبصى لحد تانى
شوفت من حبك كتير .. ولا يوم كفانى
رغم إن الساعة جنبك
مِ الهوى بتفوت ثوانى
محيرانى مسهرانى ... مخليانى يطير جنانى
يا اللي كنتِ ف يوم أمانى
حبة حبة يا حبيبتى
وساكنة فيا فين ما كُنتى
بس ليل هجرك كوانى
فكرى تلقى الحقيقة
ياللي مخلوقة عشانى
هُـــــــــــــــــــدَى
الههْ على كل الحروف ... متبغددة
و الدال ف نص الإسم جات مترددة
مدت بدال الياء ألف
بقى مختلف
بس إن نطقت .... تقول هُدَىَ
إسمك دا ولا الناي بيعزف للربيع
ربك بديع
خلَّاكى آية ف الجمال، سحر و دلال
و أنا لو هاسافر ف العيون حتماً هاضيع
و هافوق إذا طل الندى
يا عشق سكن الأوردة
يا ساكنة كل القلب قاعدة ممددة
لو مرة واحدة تسمعى قلبي الضعيف
تلاقيه يضيف
للدقة فيه ... كلمة هُدى
هُـــــــــــــــــــدَى
هُـــــــــــــــــــدَى
يا هُدى
أنا عمرى موش هايضيع سُدى
أنا واهبه لاجل عيونك الحلوين
و معاه كمان الروح فِدا
كل اللي طالبه إنك يادوب
لو كنتى موش متأكدة
تصدقينى لما أقول
إن الغرام بيكى إبتدى
و إنك حقيقة موش خيال
و إنك ف ليل عمرى ...
هُدى
نــــــــــــــــون
النون فنون
سحر و جنون، ذكر و مجون
و حياة تكون على كل لون
نعشق نخون، نصدق نصون
بس المهم ما يوم يهون
حد ف نهاية إسمه نون
بيغيب حنين يحضر حنون
بيضوى وسط صحابه
نوره كما الفوتون
مصنوع من الحسن البديع
و من الخبايث جاى بدون
و نهايته نون
إيمـــــــان
كل القلوب ... ساعة ما تُعبُد ربها
بتقول إيمان
يا إسم بيخطى الوِدان
ساكن فى قلبى و الكيان
حتى حروفه مطبطبة
على وِدنى ساعة ما أنطقه
بتعزف كمان
يا رنة الوتر الشجى
يا نفس لما بتعشقى
هاتغرَّبى .. هاتشرقى
و هاترجعى لأحضان إيمان
تستغفرى من أى ذنب
و تنسى أحزان اللي كان
علشان عرفتى قبل ما يفوت الأوان
قيمة إيمان
حنــــــــــــــــــــــــان
حنــــــــــــــــــــــــان
هو إنت لو إسمك حنان
يبقى اللي سَمَّى كان ميزان
فاهم و باصص للأمام
شايفك و ضلك ع الصحاب
و الضحكة بِترُج المكان
أنا قُلتها ... و الرب هو المُستعان
يا إسم تعبير عن صفة
عندك بتصبح مُجحِفة
بالله عليك إظهر و بان .. يا صاحب الإسم اللي زان
كل الحروف الطيبة ... و طرح حنان
من يوم ما شافك قلبى حس براحة ليه؟
بينُط لو صوتِك فى يوم ينده عليه
يا صاحبة غير كل الصحاب
و جارة غير كل الجيران
ربك بيوهِب من نعيم الحسن آه
بس اللي أحلى ... إنه خلَّاكى ... حنان
دعـــــــــــــــــــــــــــــــــــــــاء
دعـــــــــــــــــــــــــــــــــــــــاء
العشق لو ماله إنتهاء
بيكون إردة ربنا
بيكون دعاء
هاتقول دى دعوة أو دِعة
هاقول دى دايماً مبدِعة
منحة و نازلة من السماء
و إتصورت و إتدَّورِت
و بقت دعاء
شوف لما حد
بيبقى ذِكر و مُحتواه
فـ كلام تقوله للإله
بيكون رجاء
و تقول يارب إقبل دعاء
و إرحم ملايين البشر
و الله يفعل ما يشاء
عشان دعاء
غـــــــــــــــــــــــــادة
يفيض السحر بزيادة
و يبقى الحسن سجادة
و لو كان الدلع مخلوق
يكون مخلوق عشان غادة
إذا تحضر ... تلاقى النسمة بتهفهف
و طير الحب بيرفرف
و إذا شوفت الشجر بيميل
ما تستغربش دى العادة
ما أصل الكون بأمر الله
بيفتح فاه عشان غادة
و مهما هاقول كلام يسحر
بيبقى ف نفسى أقول أكتر
و موش تجميل ولا إشادة
دا وصف لخلق فيه إبداع
يخلى القلب فيه يلتاع
بلا إرادة ... عشان غادة
ياسمــــــــــــــــــــــــــــــــــــين
عجبنى من الزهور ملايين
ما شفت أجمل من الياسمين
بياض القلب مبدأها إذا قالت تصدقها
و إذا خصِّت لقلبك قول
بدون تفكير تقوله آمين
فــ يا ياسمين
سحرتينى بشرطة عين
و همسة و كلمة ولا أعذب
و أنا اللي ما شوفت يوم أغرب
من السحر أما صار ياسمين
طريقك فين؟
و فين أقدر أشوف شالك
و أعزف لحن موالك
و ليه فايتانى مِ المساكين
و روحى إتعلقت بإتنين
خالقها و صحبة الياسمين
ســـــــــــــــــــــــــــــــــلمي
طول عمرى باحلم بيكى ... يا سلمى
لو حتى صوتك هاسمعه
ع البعد فى مكالمة
ساعة ما تييجى ... النور يهِل فـ دنيتى
كل الحياة قبلك كانت ضلمة
يا روحى على سحر الدلال
نهر الجمال
ضحكة عيونك جرَّحت قلبى
و ما شوفتكيش رغم الألم ظالمة
عمرى اللي جاي يا مهجتى ليكى
حتى السنين لو كُحل لعنيكى
أدفع كمان راضى و تفضلى سالمة
فراشة طايرة محلَّقة
أحلامها كات متحققة
أدفع سنينى و ما بقى
و أرسم فرح ...علشان عيون سلمى
دلال
العشق لما يكون حلال
يصبح دلال
النسمة فى حر السنين
تحت الظلال
شيئ مِ الخيال
الحسن لما يزيد جمال
حتى الدلع لو دلعوه
يصبح دلال
يا حسن أكتر م اللي المقال
يا حضن بعد الغربة فاتح بالأمان
يا لهفة بعد سنين طوال
يا قلبى لما يكون بيحلم بالهنا
يا روحى لما تكونى للعمر المُنى
يا أحلى أنغام الغُنى ..
باسأل سؤال
هو إنت ليه فى الأصل سمُّوكى دلال؟
منــــــــــــــــــــــــــــــــــال
كان المحال تعرَف منال
نجماية ساكنة فى السما ... و الملحمة
إزاى تنولها و قلبها صعب المنال
جربت كل اللي إتوصف ... ولا شيئ صدَف
زرعت قلبى بحبها و عشقتها ... و لقيتنى داير حالى
حال
حواليا ناس ماسكين شموع
حالفين على عدم الرجوع
فسألتهم جابونى من وسط الدموع ... عاشقين منال
وصفوها للحسن المثال ... و كلام كأنه من الخيال
دقيت على باب الهوى ... طلت منال
لملمت بعضى و قلت يالله ما بِدهاش
قام بان عليها الإندهاش
إنى قدرت أقولها ... أنا بس باتمنى الوصال
و الشوق جبال
كل الكلام يا طيبة .. منذ الصبا
أنا لسة شايلة عشان منال
لُـــــــــــــــــــــــــــــــــــــــــبني
صحيح دوبنا ... و ضاع كل اللي فى جيوبنا
و لفينا البلاد مجاريح ... لكن و الله ولا توبنا
يزيد ما يقِل فى قلوبنا ... غرام لُبنى
يا ست الحسن يا نسمة فرح ناعمة
يا أحلى موسيقى معزوفة و متناغمة
أنا قلبى عليه يُغمى
إذا زارنى الهوى شايل ... عبير لبنى
قدر ربك و بيه سلِّمت ... و ف حبك أنا إتعلِّمت
إن العشق مكتوبنا
و إن كان البشر سيرة
فإنتِ الحب و الجيرة
و إنت الخير ملا دروبنا
يقولوا فى البنات أسماء ... حروف إنشاء
و راح قلبى القمر أو جاء
مافيش فيه غير غرام لبنى
مــــــــــــــــــــنى
طب أقولك أيه و إنتِ المُنى؟
و تلات حروف إسمِك غُنى
الميم تدَلَّلْ قبل نون
لان الألف و صبح حنون
لما تجسَّد للعيون و صبَح مُنى
الرقة فى الإسم إنبهار
و اللحن حصرى بإختصار
حتى البنات بدأت تغار
و الغيرة نار بسبب مُنى
نطقى لإسمك فيه غزل
و نسيج بعِشق بيتغَزَل
يا حلوة على رأى المثل
الصبر بيبلَّغ مُنى
و أنا صبرى طال باستعجلِك
قبل الفؤاد ما هايتهِلِك
من قبل ما ينول المُنى
فى عيون مُنى
هنـــــد
الـ (ه) هوى و الـ (ن) ندى
و الـ (د) دليل الشوق
يا هند رُدِّى النِدا طيَّرتى قلبى لفوق
إسمك نشيد إبتدا و لغاكى ذوق الذوق
يا هند عبر المدى حسنك دا غير مسبوق
يا هند سرِّك ف بير
مع سر قلبى اللي دايب
إسمك بلاد أساطير
و حكاوى فيها العجايب
لو حد شافك باغير
و أعمل عشانك مصايب
يا هند نظرة بحنان
ل اللي عشانك بيسهر
يا إسم واحة أمان
و سِحْر أكتر و أكتر
مريــــــــــــــم
إسمك صلاة ... و سورة فى كتاب الإله
يا اللي أنزل فيكى ربك وحى يُتلى
ياللي ليكى بتنحنى كل الجباه
مريم دا إسمك يا صبية فافرحى
أفضل نساء العالمين لو تشرحى
هاتقولى مين مِ الخلق ياخد مطرحى؟
بعد أما ربى ضمنلى جاه
على إسم يتردد تلاوة أو صلاة
الإسم مريم زان صحابه من زمان
و الإسم فعلاً لمسة الخير و الأمان
نبع الحنان
أيقونة لجمال الحياة
إسمك صلاة .. على سورة فى كتاب الإله
اللي يصونك يبقى شاه
و اللي يهينك وجهه شاه
الله ف سماه
ما تطيب لنا بدونك حياة
فاطــــــــــــــمة
الـ (ف) فرج لَمَّا ... طرح الـ (أ) رحمة
و الـ (ط) طابور واقف ... طوِّل عمل زحمة
و الـ (م) ملاك مِ السما
وهب الجمال ملحمة
مربوطة (ت) بعدها
كتب القلم (فاطمة)
حُب النبى مذهبى و أنا أصلى مِ الدراويش
يا كحل عين النبى قولى ولا تخبيش
فاطمة دا إسمك بقى
و لا جمال و إنسَقَى سكر و سنترافيش؟
لو دنيا مش ظَاَلِمَة
كانت تكون فَاَطِمَة
على عرش كل بهاء
يكفينا بس إنها
واخدة جمال إسمها
من فاطمة الزهراء
رجــــــاء
لو حرف (ر) فى مرة جاء
وقف لوحده فى إنتشاء
قرر يكون من ربنا ... أجمل رجاء
رسم ف لحظة صدق رغبة ممكنة
و ترك عبير فايح بكل الأمكنة
و لما ندعى ربنا ... بنقول رجاء
يا إسم فيه لله خضوع
يا حسن جامع كل نوع
أنا بيك قنوع
و الله يعطى من يشاء
و إذا أحب العبد
حققله الرجاء
يا حبذا لو كان رجاه
يمامة من صنف النساء
حطت على شجرة هواه
فهمت لغاه
و بقت معاه أجمل رجاء
لميـــــاء
إذا "اللام" إتسند ع "الميم"
و "ياء" صعدت "ألِف" تكريم
و همزة بتترِسِم غَمزة ... و إسم إتصاغ بشكل سليم
حروف باين عليها ثراء ... نطقها لسانى صار
"لمياء"
بتتهجد لرب كريم
و لو تانى شرحنا حروف
و كان قلب الحبيب ملهوف
هايختصر الهوى فـ حرفين
و يستعجل يقول (لام ياء)
(لى) بس مطلب و إسمعيه
(لى) عمر فات من غير ما اعيه
أول ماشوفتك ... صدقينى بدون رياء
قلبى إشتهاكى من البشر لمياء
فـ ما تحرميش قلبى يا حلوة من الأمل
و ما تقطعيش بيننا الرجاء
و سيبينى أحلم فى النهاية تبقى لى
(لام ياء)
عالية "علياء"
سألت النجمة ليه "عالية"
و ليه الشمس ساكنة سماء
قالولى بس بإستنكار كأنى حمار
عشان دايماً تكون "علياء"
و لو كان الهوى ع الـهَـْه ... و تيجى إنتى كمان
ع الياء
و حرف بحب يحضن حرف ... يمنع سحرها مـ الصرف
يعمل بإختصار "حواء"
"هى" البسمة "هى" النسمة"
"هى" القسمة و كان ما شاء
و يجرى العمر يا قلبى ... و لسة إنت فـ هوى
"علياء"
صعيب عشق النجوم يا قلب
مِش هاتنول وصال فى الحب
ولا مرة هاتِهنى بقُرب ... و إنت ملازم البيداء
عشان تعشقها جيب جناحات
و حلَّق فى سما النجمات ... و حاول تقطع المسافات
لوجه البدر فى العلياء
عشان عالية و ح مع باء
صفاء
إذا مرة تقعد ... فى ساعة صفا
و يبدأ كلامك ... بدون إنتهاء
تلاقى المعانى ... بلا أن تُعانى
بتكتب بأجمل ... خطوطها صفاء
ده إسم و صفة
و حالة بتخلق لروحك دفا
ما تعرف قطيعة ما تعرف جفا
كلامها يلون حيطانك نقاء
إذا مرة خاطبت لسانك صفاء
معاكى يا نبع السكون فى الخلا
معاكى يا سجدة غزال فى الفلا
تهيم روحى و أعشق و إلا فلا
و بعدك هاتحرم عليا النساء
يا نبْع الأنوثة و أجمل صفاء
هدير
بقلبى الكبير
حاولت إنى أسأل لفين المصير
و عشقى اللي بادى و مالهوش نظير
بينطق هدير
و سرى الخطير ... سنين عاش فى قلبى و حلمى الأثير
بأنك أميرة و إنى الأمير
لقيت الخلايق بتحكى فـ سيرة
و باسأل فـ روحى أنا كلى حيرة
منين عرفوا قصة غرامى بهدير؟
أتارينى كاتب حروفها فـ عيونى
و أطيافها أبداً ما ليلة فاتونى
و لو حلفونى بأكبر كبير
ما هانطق بغير نفسى أقابل هدير
دى ست الصبايا و ست البنات
و أحلى ما فى العمر هوه اللي آت
عشان فيه هامللي عيونى بهدير
ندى
حكمة إله ،،، و ماهيش سُدى
ما أعرفش يوم من غير جمالك إبتدى
لمسة على ورق الشجر .. طرحِت ندى
باسأل سؤال
و إن جانى يوم منك خبر
بيغيب ساعتها المبتدى
يوحشنى صوتك يا ندى
يا فتنة فوق سحر الدلال
يا عطور على خد الورود ... متوسِّدة
عشقى إبتدا ... يا شوق و مالى الأورِدة
العمر و عشانِك فِدا
ما أطلبش منك غير يا دوب
تكوني و حياة النبى ... من كل شيئ متأكدة
ما تفرَّحيش فيا العِدا
أنا أصلى راضى ... بحظى مِ الدنيا
ندى
أمـــــــــــــــــــــــــــــــــل
إسمك أمل
و جمال على القلب الرهيف ... لا يُحتمل
الحسن لما بيُكتَمَل
و الدنيا لما تضيق تضيق
ييجى الفرج تفرح كتير
و بيتولد جوَّاك ..... أمل
بكرة السعيد شايل أمل
النصر لو جاى من بعيد ... شايل أمل
أنا مش هاقول أيه العمل؟
و لا هاحكى عن إعجاز حصل
انا بس هاشكر ربنا
علشان عرفت ف يوم أمل
يا دنيا لما بتضحكى
يا قصة قبل ما تنحَكى
يا قلب بيكى بينشغل
باسأل على حروف الهجاء
و بتختصرها حروف أمل
لـــــــــــــــــــــــيلى
عشان ليلى
بييجى القول بدون ترتيب
ولا تهذيب و لا محايلة
عشان قلب إتخلق يِدِّى
و مهما العمر هايعَدِّى
معاه كل السنين زايلة
و سايبة ف ذكرايات الكون ... عيون ليلى
و لو ماقدرتش أصبح قيس
و لا صِرتى ف يوم بلقيس
و لو عَدِّت سنين مايلة
يمين بالله ما قلبى كواه ... سوى رمش ف عيون ليلى
و لو قُلنا يا ليل طوِّل
و سيبها ف مرة و إتحَوِّل
يقول أفواهى مِش قايلة
و لا كلمة غرام ولا شوق
ولا همسة سوى لـ ليلى
نهــــــــــــــــــــــــــــــــــال
طال المطال و الشعر غنى الإبتهال
و الحسن شاور ع البنات
و إختار نهال
و النجمة مالت ع القمر ... تسأل سؤال
الرمش ليه لما إنكوى
مالقاش له فـ الطب الدوا ... و البخت مال؟
قال القمر من بعد إدراك الخبر
بعد الهيام و الإنشغال
دواك نهال
زى اللي عاش قبلينا قال
يا عم يا راغب حلال
يا عم يا عاشق جمال
المُهرة بتنادى الجدع
و الفولة يلزمها الكَيَّال
و إن يوم رماك عِشق الهوى
فـ دواك لابد يكون نهال
تيـــــــــــــــــــــــــــــــــــــــــــــــــــتى
هاقول تيتى
و ملكة فـ توب نفرتيتى
سمار اللون يقول مصرى
و بيت الأصل كان بيتى
و لما انده على الحلوين
الاقيكى اوام جيتى
يا عشرة عمر ما بينساش
يا ليل سهران ولا بيقساش
يا ملحى و حنطتى و زيتى
انا إبن النيل على الأرغول
بــ أغنى و للحليوة باقول
إذا مرة إنتشر صِيتى
أنا العاشق فى فن القول
باقول أشعار عشان تيتى
إكـــــــــــــــــــــــــــــــــــــــــــــــــــــــــــــــرام
يا ليل يا غرام ... يا عشق بطابع الإحرام
سألتك عن عيون القلب .. و إنت جاوبتنى .... إكرام
يا شط البحر حاضن موج
قوافل عشق فوج ورا فوج
مراسى بتحضن الإلهام
و تسأل عن عيون إكرام
و مين كان حظه من إسمه
و مين عاش وصفه من رسمه
و مين فيه البشر بالحب
من غير غيرة يتقاسموا
ولا واحد فى مرة لام ... سوى إكرام
كرم فى الأصل و المعنى
و إذا كان شيئ بيمنعنا
لكن هوه ... طلب منى الوصال أو ... رام
هاسيب الدنيا و أجريله
و أقيد ليله بهوى إكرام
إيـــزيـــــــــــــــــــــــــــــــــــــس
إله العشق و الأحاسيس
و لو قُلنا الوفاء ف إيزيس
يا بانية المجد فى الوادى
يا باقية بعطر أجدادى
انا الشادى و أنا الحادى
و أنا المشتاق فى كل خميس
يطول بس السفر بِيَّا
و مهما تغيم ليالِيَّا
وضوئى فـ بحركم غية
هواكى جعلنى مـ المهاويس
يا ست إيزيس ... على مهلك و راعينى
يا ساكنة النِن من عينى
أنا جايلك حزين باسأل ... أنا فينى؟
و تايه نفسه فى التشخيص
اكيد قربك يداوينى
مـ انا اوزوريس
هــــــــــــــــــــــــــــــــــــــــــالة
تروح الشمس و تسافر
و لو رجعت تيجى بهالة
و غير كل البنات و الناس
و لاد العمة و الخالة
و غير كل البشر يمكن
و بعض الجن إن امكن
إذا ما العشق صار حالة
أقول هالة
دى طيف دى ... ولا واحدة بجد؟
أصل الحسن فاق الحد
مش باقصُد لا عود ولا قد
دى الروح اللي ساكنانى
و آلة عشق شغَّالة
و لو تسألنى ما أترددش
هانطق .... إسمها ... هالة
وســــــــــــــــــــــــــــــــــــــــــــــــــــــام
فى طوقى ... معلقك يا وسام
شرف شايله
مئات على روحى يتحايلوا
و يرموا فــ قلب قلبى سهام
مناهم إن أنا و إنتى
تكونى فـ عزمى بتفِتى
و أنسى عشقنا أعوام
و اكون كافر بحب وسام
ما يعرفش العزول إنك
هوايا سنِّه من سنِّك
و أنا طيرك و أنا بِنِّك
و أنا العشق اللي عاش أعوام
و أنا على راسى شايلِك تاج
و على صدرى ... تظلى وسام
نجــــــــــــــــــــــــــــــــــــــــــــــــلاء
إلى نجلاء ... يا إسم بينكتب إغراء
و بادى بنون نعيم قربك
و ناهى بهمزة فوق دربك
تجلى الله على وسط الكلام بجلال
و حققلى ف دعايا رجاء
أشوف ضَيُّه ف حروف إسمك
و أكتبها تصير نجلاء
غزال البيد بيتعاجب
بحسن الخَلْق و الواجب
و لو راح الزمن أو جاء
و كات ريح الهوى هوجاء
ماليش فى الدنيا غير نجلاء
إذا أسأل تجاوبنى ... إذا أضحك تلاعبنى
و أروح البحر و تجيبنى ... و تتعبنى
و تشفينى و هي الداء
عيون نجلاء
حنـــــــــــــــــــــــــــــــــــــــــــــــــــين
عشان قلبى اللي صار مسكين
عشان روحى إمتلكها حنين
عشان العشق لما بنوصفه بكلمة
يزيد بكلامنا فى مكالمة و يبقى حنين
يا سحر الإسم و المعنى
و شوق لمكان بيجمعنا
و لو نتلاقى ... كل الدنيا ما تساعنا
و باسال فين؟ يا أحلى حنين
يكون حظ اللُقا و الشوق
و أشوف العشق و المعشوق
و أنهى البين
و أضم فـ صدرى مرة حنين
و آخد مرة تأشيرة ... بدون غيرة
و أدخل دنية العاشقين
معايا حنين
فــــــــــــــــــــــــــــــــــــــــــرح
هلت فرح ... قلبى إنشرح
بستان بأحلى ورود طرح
قام جمع الخلان فى يوم
و عمل فرح
يا إسم معجون بالمرح
يا طب قلبى اللي إنجرح
يا حظى من كل البنات
يا عقل فى الملكوت سرح
راضى أنا بحدودك إنتى
يا وطن شايلاه سفينتى
مهما كان أو مهما كنتى
مهما كان المقترح هاختار فرح
يا إسم نور و سرور و زينة
و أحلى ليلة فى المدينة
و ضحكة بعد سنين حزينة
و عمر كان مهزوم صَبَح ... عامل فرح
عاشق فرح
آيـــــــــــــــــــــــــــــــــــــــــــــــــــة
أمرنى الله و ده تكليف
أبُص ف خلقه على آية
و من يومها و أنا عاكف
و من يومها ماليش غاية
سوى إنى يا أحلى عيون
أهيم ليلى الطويل مفتون ... و أقول آية
إذا كان الصلا بآية ... و معجزة النبى آية
و شق البحر حتى السحر ... و الجبل إنحنى بآية
و بين الكفر و الإيمان يا دوب آية
و مهما تكونى نسَّاية
و فايتانى الهوى فـ قلبى ... بدون شفقة ولا رعاية
أنا اللي الدنيا مهما تدور ... أجيبهالك طبق بنور
يا أجمل من بنات الحور
يا أصدق قصة و حكاية
أضَحي بعمرى و الأيام
يهون قدَّام وصال آية
نســـــــــــــــــرين
إذا الدنيا إكتفت بالنسر
أنا طامعان بقى فـ نسرين
و عاشمان فـ اللي خلق الخلق
بدل البخت يبقوا إتنين
عشان قلبى الحزين يفرح
عشان أسعد أنا بـ نسرين
يا نون ميِّلت على سر
قام الـ ين قال أنا فين
جمعهم ربنا كلمة
فى نور بيبدد الضلمة
و إسم بينكتب دايماً
يداوى العين
يا اجمل نون و أعذب سين
يا نسر و كان حزين وحده
فى يوم سعده
ندَه قلبى و بقوا نسرين
