محتاج حروف
محتاج حروف
و أعمل كلام فعلاً ماهوش معروف
و إنسى ف يوم لخبطة
ساكنانى ويا كسوف
و ابدأ كلام غير الكلام
و اصرخ بعزم القول و أقول ...
إسكت يا خوف
يمكن يكون حقك تِشُكى ف الكلام
تستغربى قلبى اللي صار ملهوف
أنا نفسى باسأل نفسى حبة أسئلة
إزاى بقيت فجأة كده
و إزاى مشاعر حبها تبقى ف يوم
متغلغلة
و إزاى بقيت حوالين سماها تطوف
و كمان بتطلب مستحيل
ضد الظروف
يا ناس يا خَلقْ
(1)
قليبى لو كان سكن
هايساعى كل الكون
شايل هموم الوطن
غير الهوى المكنون
و الذكريات و الشجن
و حلم ليل مسجون
بين الضلوع إندفن
يمكن يكون مجنون
(2)
يا فاتحين الأمل شباك
على بكرة اللى جيَّ هناك
و بكره فوق جناح شوقه
يقول للفجر فين مرساك
وخيط الشمس بيه نغزِل
ستاير دفء ع المنزِل .. بلا أشواك
و منزلنا حيطانه طموح
و آه لما الطموح يرحل
لا يبقى بيت و لا ستاير
و لا شاطئ لموج حاير
و نبقى فى الطريق مساكين
نلف العمر فى دواير .. كما
التايْهِين
(3)
يا ناس يا خلق يا إنسان
شربنا م الألم ألوان
تعالوا نداوى أحزانَّا
نقابل بعض بالأحضان
نحب الخير لكل الناس
و يبقى الليل قمر ونَّاس
و نبقى فى القلوب جِيرة
و عِشْرَة و المَوَدَّة أساس
(4)
بالأمثال و بالأديان و بالخبرة
و لا يقدر على الأيام و ع القدرة
إلا خالق الإنسان و رب الكون
و لا نضمن نفس يطلع
و لا نضمن نعيش بكرة
ليه يا عُمر
بِتْعَدِّى
(1)
ليه يا عمر بتعدى قوام تجرى؟
ما حسيت بيك
و ليه لياليك؟
بتسرق حلمى من فجرى؟
و تسرق م النهار أنوار
و تسبقنى الدموع أنهار
تدوِّب بالحنين صبرى
(2)
و ليه يا عُمر مهما تْمُر
لا بْتِهْنَى و لا بِتْسُّر؟
ولا فيك ناس و لا حبايب
مدام لِسَّه الحبيب غايب
و فين أراضيه؟ وأيه يرضيه؟
و ليه قاسى
...
مدام شاف إن أنا دايب؟
و ليه يا سنين يفوتنى حزين؟
و ساكن طيفه نِنْ العين
و يحلالُه عذابى ليه؟
و ليه يحلاله بينَّا البين؟
(3)
و أعيش وحدى
على أمل اللُّقا الخادع
يغيب الوعد و يلاوع
يمنينى ... و ياخدنى يِوَدِّينى
لآخر سكةْ العاشقين
و يرمينى
وحيد وسط الفَضَا الواسع
و دمعى يسيل و أنا راجع
و أسأل ليه؟
(4)
و ليه .. كلمة ما ليها جواب
و ليه ... دايما ماليها عتاب
تفيض بعذاب و تِسْأَلنى
و أنا دايماً عليه مَجْنى
مافيش كلمة تِرَيَّحْنى
و من كتر الهموم مَحْنى
و لمَّا بَحاول أفتح باب
ألاقى من وراه مية باب
و يتكرر سؤالى ... ليه؟
(5)
و ليه الغُربة ساكنانى
و ليه غامقة يا ألوانى
و فيه حاجز كبير واقف
مخلِّينى مانيش شايف
و لا عارف ...
أدوب فى حضن خِلَّانى
و مين حط الحواجز دى؟
و مين زارع و مين بانى؟
و تفضل برضه كلمة ليه؟
(6)
و ليه صوتى ماهوش واصل؟
و ليه السور أو الفاصل؟
و لا يمكن يكون موصول
بدون ما يكون هناك واصل
و مش عاوز كلامى يكون
يادوب تحصيل من الحاصل
و أرجع تانى أسأل ليه؟
سؤال مالقيتش رد عليه؟
قلولى ليه ... ؟؟؟
و روح قلبى الجواب فى عنيه
و عذره أيه؟ ... نسينى ليه؟
(7)
يا أيام شكل بعضيها
و معظمنا بدون تفكير مقضيها
و لا بيسأل ساعة ما يفوق
و لا أمَّا يروق
مين الركاب و مين بيسوق؟
و فين الراحة فى الدنيا؟
و مين يعرف أراضيها؟
(8)
وليه بنعيش و ليه بنموت
و ليه تتر الزمن بيفوت
و ليه الخوف صراخه سكوت
و ليه الرعب من غير صوت
و ليه بندارى بلاوينا
و لو بانت ما يكفينا
ولا يسترها ورق التوت
و يونس قال فى بطن الحوت
أنا الظالم و أنا المظلوم
و أنا نفسى عليها اللوم
رمتنى لبحر أوهامها
بلا قارب و لا تجارب
و لا خبرة بفن العوم
و قال يا رب فى العتمة
و قال يا خالق الكلمة
أنا تايب بعلو الصوت
الناس بِتِحلَمْ
(1)
الناس بتحلم بيك يا حلم فى كل راس
يا أمل من غير أساس
يا وهم من تأثير حجر
بالفحم دخَّن أو بكاس
الناس بتحلم بالكسل مش بالحماس
متوكلين متواكلين
ساندين دماغهم ع السراب
و اللوم لسان حالهم و بس
و مش شاغلهم فى الحياة
غير مين سرق و مين نهب؟
وده أصله كان فلاح بفاس
و كان ... زمان،
و الزمان مالهوش أمان
و الناس معادن،
ناس دهب و ناس نحاس
(2)
الناس جثث مافيهاش دماغ
نفسها بس ف رغيف عيش
مِ القديم أبو خمسة صاغ
و قرص طعمية،
مِحَمَّرْ خده من زيت القلية
يقرمشوه مع زر قتة،
و يقفلوا بفحل البصل
و همَّ ينسوا اللى حصل
و يرجعوا يناموا بهَنَا
ساندين دماغهم ع الكسل
(3)
و هوه أيه اللى حصل؟
ناس راكبة فوق قلب البلد؟
من قبل حتى ما نتولد؟
فين الجديد؟
طول عمرنا ضيوف فى البلد
عُمَّال بنزرع فيها و بنقلع
و برضه بنِتْجَلَد
من قبل ما نحفر قناتها و نيلها
لما للأبد
و يابخته بس اللى إتوعد
اللى باع أهله و ناسه
و باع ضميره و باع ضناه
و إبتدى يصاحب هواه
و خدله كورس فنون نداله،
وضم نفسه للجناه
(4)
و لسه برضه الناس بتحلم
رغم جوع و مرض ما يرحم
لسه برضه الناس بتحلم
بس حلم بدون عمل
راح يبقى برضه مافيش أمل
(5)
اللى يحلم حلم
يبقى يمد إيده لحلمه مَدْ
يشتغل يتعب بجد
تبتسم ليه الليالى و الجبل
يِتْهَّدْ هَدْ
و اللى ما عندوش أمل
و إيدين تعافر لاجل ما تحقق أملها
يبقى ماله أى حاضر أى غد
(6)
الناس بتحلم بيك يا بكرة
يا أمل من حضن فكرة
يا ربيع وسط الصحارى الصُفر أخضر،
يا نسيم حرية شايل
فى الهوى أحلى الجدايل
قلب عمره ف يوم ما يِكْرَه
الناس بتحلم معذورين
ما الحِلم .... فِكرة
شَطْ الأمَلْ
(1)
على شط الأمل واقف بقالى سنين
و رمل الشط كله حنين
و قلب ف نار ، عملته فنار
عشان يهدى سفينة قلبك المِحْتار
بقاله سنين
و موج البحر ياخدك للبعاد و يروح
و واخد منى بَرْضُه الروح
و أحلامى زَبَد فى سكة العاشقين
بقالى سنين
(2)
بنادى و صوتى مش واصل
و أملى بشكل متواصل
يزيد رغم البعاد و البين
و يبقى سؤال فى قلبى حزين
طريقك فين؟
صحيح ما أملكش غير حبى
و نور بيشع من قلبى
مكانك فيه
و مطرح ساكنة فيه وحدك
على عهد الهوى معاهدك
و فيه سعدك و فيه وعدك
و فيه كل اللى تتمنيه
(3)
أنا مش باوعدك بقصور
ولا كنوز من دهب مبدور
و لا ستاير حرير مسدول
لكن بادعى و منايا أنول
هَنَا الأحوال و رزق حلال
و يكفينى إنى أعيش مستور
و ده حلمى فى زمن التيه
ياريت قلبك يآمن بيه
عهد الجوار
عهد الجوار
لما دمك هوه دمى
و إنت جارى و إبن عمى
ليه ترجعلى ضنايا
جوه دمه مستحمى؟
هوه ده عهد الجوار؟
و اللى ها يفك الحصار؟
و للا ده هوه اللى صار؟
لما جَرُّوك مِستِغمى؟
!!!!
و حياةْ عيونك
وحياة عيونك اللى محتاجين ديوان
و قليل عليهم إنهم فرحة حياة
و طوق نجاة
و رموشهم اللى يجرحوا
شط الأمان لسفينة عاشت عمرها
و الموج يشيلها يحطها
فى بحور حياة
مالهاش نهاية
أنا رميت على شطهم مرساتى
و إخترتهم وطنى
و قلت أرتاح و أكتب قصتى
و لقيتنى موش فاكر بداية للحكاية
قلبى الصغير تاه
الكلام وَيَّاك
(1)
بيوحشنى الكلام وياك،
و شوقى يزيد
و أتمنى نعيم رؤياك
و لو يهنالى يوم حالى
و يسعدنى فرح لُقياك
أقول الدنيا ضحكتلى
و سامحتنى و صالحتنى
لو أبقى معاك
و لو ع الوصل مش بتغيب،
و لو إنّه قدر و نصيب
و لو حتى الزمن هايشيب
أنا ف معادى هاستناك
ما أنا راضى بهواك ع البعد،
و بيمنينى منك وَعْد
و لا قبلك غرام و لا بَعْد،
و لا باطمع سوى فى لُقاك
(2)
و أديك سمعتنى صوتك
و انا ف بحر الهوى غرقان
قفلت السكة و فايتنى
ما بين شطين من التوهان
ساعات أستكتر الفرحة
و أقول كداب أكيد يا زمان
و ألاقى الرنة ف ودانى
و رقمك لسة ع الشاشة
و لو عقلى صحيح موهوم
هاتبقى الآلة غشاشة؟!!!
كأن حورية م الجنة
أميرة تقولشى أو باشا!!
