أمر إنتهى
و تغيبى عنى و تحزن الأيام
و تغيب معاكى ف دنيتى الفرحة
و تعودى تانى أرجع و أقول يا سلام
و تعود معاكى ورود سنين طارحة
و حياة عيونك دول و فيهم كل ويلى
و برضه فيهم نهر حبى و سلسبيلى
أنا بيكى باصبر ع السنين السود
و باقدر بيكى برضه على المعاندة
و ع الوجود
و كفاية نظرة من العيون دى تكون أمل
و ساعتها كل الظلم كله هايُحتَمل
و كفاية وردك لما يرقص ع الخدود
ما تفكريش أنا حبى كلمة و قولتها
و العشق بادئ بس عمره ما إنتهى
أجمل حياتى الباقية بيه كملتها
و قليل قليل
لما الزمن بالعشق ع الإنسان يجود
أنا بيكى باصبر ع السنين
و أبعت حروف الشوق وفود
....
دا أنا حتى مش محتاج ردود
أمر إنتهى
33
دقة عشق
(1)
بينى و بينك عشق يملا الدهر
وبرضه بيَّنا محيط وصحرا و بحر
و أتاريكى ساكنة من كيانى الروح
مطرح ما اروح إنتى ف صلاتى جهر
(2)
و حياة عنيكى الطيبة
اللي ماليها الحيرة طالبة اﻷجوبة
و اﻷسئلة متسرسبة
إشي عن نهال و اشي عن منال
و اشي عن دﻻل و اشي عن هبة
إنتي اللي فيهم يا قمر و ما تقعديش متعذبة
كل الوشايات كاذبة
و انا غير عيونك موش باشوف
و بدون كسوف عينى عن الغير تائبة
و حياة عنيكى الطيبة
(3)
حبك نغم مجنون ... معزوف على وترى
أما الهيام بالروح بقى سلوتي و قدرى
(4)
ضحكة عيونك شباكين ع الروح
بيقولوا أحلى كلام صريح
و مهما داروا سرهم مفضوح
ضحكة عيونك سلوتى و زادى
و عشان جمالهم ياما بانسى جروح
بس إضربيلى معاد و فين مايكون
أنا روحى قبلى للمكان هاتروح
(5)
خبينى ف عيونك سنين
و أمانة بالراحة .. لو تقفلى رمش الحنين
علقت روحى ف الهوى و قسمتها نصين
و حبست نص ف كل عين
كل البراح اللي ف عيونك
بحر من غير ضفتين
و أنا ماشى من غير دفتى و ﻻ بوصلتى
و الدنيا غايمة ف العنين
خبينى ف عيونك لعلى ف يوم أنام
أصلا حرام
أفضل بعشقى و قلب دايب
لسة بين كل المواني معلقين
خبينى ف عيونك سنين
(6)
غاب البريق اللي ملا العين بالأمل
و خلى صعب الدنيا ممكن يُحتَمَلْ
و إتلخبطت كل الخطط و الأمنيات
و أنا جرحى لما بينفتح .. ما بيندَملْ
(7)
من يوم ما شافك قلبى قال هيا
يحرم عليه ف الهوى نسمة معدية
روحه عشانك أرخص الوهبات
اول ما حبك لقيته أخلص النية
(8)
ماليش غيرك مابين كل البشر محبوب
يا نور العين و روح الروح و نبض قلوب
رميت كل اللي فات م العمر من غيرك
انا بيكى يادوب هابدأ خطى المكتوب
(9)
منين أبدأ معاكى القصة و أحكيها
يقول قلبى و عينى موش بتخفيها
رويت كل الليالى بدمع من شوقى
اجيب من فين كلام يقدر يكفيها
(10)
منايا أعيش بقية العمر ف رحابك
يكون قلبى يادوب حارس على بابك
رضيت حظي من الدنيا يادوب قربك
أموت لو طيف حزين ع العين
ف يوم شابك
(11)
يا عيون جريئة و بريئة
و مدوبين قلبى فيهم ..
ما لقيت معاهم طريقة
على جفنى ليلى بيسهر
و ف قلبى قايدة الحريقة
عاشقك أنا غصب عنى
و ﻻبد أقول الحقيقة
(12)
موش مكتفى بكفك
و بوسة ع الجبين
مخطوفة أو ملهوفة تهرب مِ العنين
موش مكتفي بيها و لو كانت ندى
من آمته حبات الندى
تروي الحنين؟!!
(13)
أنا لما شُوفتك ... إتوَلَد أصعَب سؤال
أنا كنت تايه فين و ليه؟
النهاردة سؤالى طال البعاد ده لزومه أيه؟
و الحقيقة مافيش طريقة
تخللي قلبى يستعيد سابق ماضيه
نفسي حد يقوللي فعلا
فى الظروف دى .. أعمل أيه؟
(14)
ساعة ما فكَّرت إنى أبطل حب
قررت إنى أصارحك و أعترفلك ... بالقليل
إن أنا دايب ف حبك
و إن فرص الهجر عندى مستحيل
و إن حبك ف الحياة مالهوش دوا و مالهوش بديل
و إنى صابر بيكى ع الأيام و ع الليل الطويل
حتى باصبر بيكى على حبك ساعات
و بامنى نفسى بالأمل بكره
عشان أنسى اللي فات
و الأمل مالهوش مثيل
(15)
مجنون إذا عبرت عن حبى
و جبان إذا خبيت مشاعري
و أنا موش جبان و ﻻ يوم هاكون
و أقبل أعيش مجنون
عاشق و فاض ف محبتك صبري
(16)
حبيني سر
و خبى أشواقك
أنا نفسي أقر لكل عشاقك
إنك حبيبتى و عشقى و منايا
و هواكى فرحي ودائى و دوايا
طرحت زهور العشق أوراقك
مين اللي خلَّى محبتك غاية
حظي اللي ساقنى
و للهوى ساقك
(17)
مدى الإيدين حِنى بلسم على جروحى
عقلى إنخَطَف مِنِّى و لا مرة بتبوحى
أيه العمل فيكى و أنا الأسير للشوق
مجنون بقيت بيكى سكران ما بده يفوق
بتخالفى ليه ظَنِّى فايتانى ليه مدبوح
باسأل أنا فينك عودى السعادة تعود
خبينى من عينك تحت الرموش السود
(18)
خبيني من عينك تحت الرموش السود
بيني أنا و بينك عهد و رجا و وعود
و انا جاي بلا حيلة أو صارى أو دفة
تعبان من الشيلة و منايا أتدفى
و إنت الكرم دينك و الجودة بالموجود
خبينى من عينك تحت الرموش السود
(19)
سلام ربي علي العاشقين
و ع التايهين شهور و سنين
و ع اللي البعد سواهم
و عذبهم
و ع اللي الحب مناهم
زرع غربة و طرحت بيْن
سلام ربي علي العاشقين
(20)
أمان ربى علي الخالي
و ﻻ بيتعب و ﻻ يبالي
و لو كان فى اﻷمور ما يكون
فى لحظة يهون
يقول بسهولة و انا مالي
أمان ربي علي الخالي
(21)
مكتفين روحى السنين،،،
و أمل حزين
و ليل طويل مع نوم قليل
و سؤال يرج الروح و يسأل،،،
إنتِ فين؟
و ف وسط غابة و ناس ديابة
سؤالى موش لاقى الإجابة
و جرح ملغوم بالأنين،،،
هوه إنتِ فين؟
(22)
أنا ليه باحبك؟
و إنتِ ليه؟
و ﻻ يوم سألت أنا حتي
و ﻻ فكَّرت فيه
و ﻻ كان هوايا مناقصة
و شروط إتفاق
دانا قلبي فاق
لقى عُمره قبلك شيئ ناسيه
حتى اللي جاي وياكى
موش خايف عليه
بكره اللي جَيْ دا موش مهم
أصل اﻷهم أنا باعمل أيه
و سؤال سخيف .....
أنا موش هاجاوب يوم عليه
أنا لو باحبك؟
إنتِ ايه؟!!
(23)
متغلفة عيونك بشوق مكتوم
و مضببة عيونى بأحلى غيوم
فاكرانى موش هاقرا الحروف فيهم
أو مرة هاقدر إنى أجافيهم
واصلالى أصل مشاعرك الحلوة
و لا ممكن أبعد عن طريقك يوم
إتعززى و إتبغددى و تيهى
أنا موش هاممنى الناس بقيت
و لا حتى نظرة لوم
(24)
ما تهدديش عاشق فى يوم برحيل
دا العشق خلَّى الصب صبره قليل
و أنا أصلى عاشق
و إنتِ وحدك دنيتى
لو ترحلى أنا هبقى مِ الخ ابيل
يمكن أحاول أخطفك و أهرب
ماهو من هوايا أكيد مافيش مهرب
ما تقدريش عشقى شعور بيفور
أنا روح قريبة و منك إنتِ أقرب
(25)
عارفانى عاشق مِ الحروف إسمك
و عيوني نايمة و صاحية
على رسمك
و بتهربى مني و بتبعِدى عنى
متأكدة إنى
ما أقدرش أقول مرة ...
أنا مخاصمك
(26)
باضعف قصاد نظرة عنيكى
و بابتدى
أتمنى قربك بس أقول ... لو تبعِدى
ماهو مستحيل
هاقدر أقولك كلمتين
و إنتى بسهام عينك
فى قلبى تسددى
أجرأ عيون
قابلتها عينى و شوفتها
و لا مرة شوفتك فى الهجوم تترددى
يا لوعتى يا فرحتى يا سلوتى
لو مرة بالعشق
اللي ساكن جوة قلبى تِنعِدِى؟
لو مرة أبلغ مقصدى؟
أنا كنت أقول للدنيا
على حبى إشهدى
(27)
موش خايف
أعلن حبى ع الدنيا
و لا حابب
أخنق فرحتى بيكى
دا أنا أى حد يبُص فى عنيا
لو بس دقق
يلتقى عنيكى
مرسومة فيا و عايشة حواليا
و العمر كله أنا باوهبه ليكى
أنا موش هاممنى
الناس ولا لومهم
و لا نظرة شايلة
الأسئلة فيها
أنا موش هاعوم
ولا يوم على عومهم
عشقك فِـ روحى
حنين مدفيها
(28)
باكتب على الأيام
كلام العشق باللهفة
و أفرش سنين العمر للخطوات ..
إذا كَفَّى
يا حب صار
ليلى و نهار أحلامى فى الدنيا
ما باطيقش أغيب
عنك و لو ثانية
ويَّا الحنين
دمى بدموع العين بيتصَفَّى
واهِب عنيكى العمر ولا وَفَّى
ندرٍ عليا يا ست الحسن
لو جيتى
لا أعلق الزينات
و أعملِّك الزفَّة
(29)
موش بإختيارى
وِ اللي بان و أنا كلى حرص بإنى أدارى
موش قرارى
بوح الهوى موش بإعتراف
و حروف كلام
أصل الهوى حدث إضطرارى
و لما يحصل تعترف بيه العيون
و تصرفات العاشقين
أكبر إجابة على الظنون
حاجة مِش محتاجة عِلم أو إستشارى
صدقينى حبى ليكى شيئ أكيد
موش بإختيارى
(30)
العمر كله سنين لحظات و بتعدى
ما تقضيهاش فى كسوف .. ندهتلك ردى
مركب مشاعر قام من شطه و إحنا معاه
خلينا نمشى وراه على فين ما هايودى
دا العمر كله سنين لحظات و بتعدى
(31)
ما بقاش يِهِمْ، ...
إنتى الأهَمْ
نظرة عيون الناس بلوم،
حتى الكلام فى كل يوم
طول عُمر طبْع الناس تِذِم،
خلاص صحيح ما بقاش يِهِمْ
التلميحات و التصريحات،
ربط اللي جَيّْ مع اللي فات
ما بقاش يِهِمْ
(32)
باستنى منك لحظة
تبُصى فـ عيونى
باستنى يوم نظرات العين يزفونى
و ألمح فـ عينك من بعيد لمعة
أوهب حياتى لضيها شمعة
و تهون عيونى
و برضه ما تهونى
(33)
واحشنى و مهما قلت عليك
باموت أنا فيك
و مش قادر
برغم القسوة من سوطك
و من قلمك و من صوتك
فى يوم أجافيك
و رغم العهد و المحاذير
هاسلم روحى للمقادير
و هاخطف م الزمن لحظات
بقلبى أطير
و أجيلك فى الخيال أوقات
ألملم من شفايفك خمرتى و اسكر
و اضمك قد مانا هاقدر
و أقولك هات
كفوف اللهفة و إرقينى
دا حضنك غير
و أموت أنا فيك
و مش ممكن فى يوم أجافيك
جالَك قلب؟
(1)
و جالك قلب
تحرم قلب من حبك
و تقسى ف يوم على المظلوم
و تطرد روحى من قربك
عارفنى بالهوى مَبلى
و باتحدَّاك
إذا صادفك هوى قبلى
أنا الواحة و شطوط راحة
و لا يمكن هاصير كَرْبَك
و باستغرب يا أغلى حبيب
تروح و تغيب
و تحرم قلب من قربك
(2)
يمين بالله
دى طلَّة بعينى فى عيونك
بتفرِح قلبى لو محزون
و بتخلينى زى النسمة فى الدنيا
و باضحك للبشر و الكون
و باشعر باللي سوَّانى و خلَّانى
أهيم بيكى
بيؤمر قلبى كن فيكون
معلَّق نبضُه بعيونك
و يعلن إنه مجنونك
ولاجل عنيكى كله يهون
دى طلَّة بعينى فى عيونك
بتسحرنى و أعيش مفتون
مُحَصِّلة
حايرة على لساني جميع اﻷسئلة
مالى إنشغلت عن الزمن بيكى؟
أو ليه بقيتى لعمرى كله محصلة؟
و إزاى أنا اللي ما هزنيش قبلك
رمش العيون
تبقيلى أكبر مشكلة؟
و أفضل أعد الخطوة بعد الخطوة
و أرقب إتجاهك ... من إلي؟
و عيون كتير تنكر عليا اﻹنشغال
و يصنفونى بالحرام أو بالحلال
و إن شوقى طال تصعب عليا المسألة
كل البنات ف عيونى عادى
و ليه بقى شايفك حقيقة ..
مذهلة؟
و باشوف كلامك
أحلى من كل الكلام
قبل الختام باتمنى يرجع أوله
شعلة مشاعر للكيان
متسللة
صاحية ما تعرف يوم هدوء
و مكملة
إزاى بقيت رهن ﻹشارتك بعد ما
كنت اللي بره السرب
بره القافلة؟
كُنت العنيد كنت الوحيد
اللي حياة العشق عنده خاملة
إزاى بقيتى لعمري كله ..
محصلة؟
على المقاس
بالمح خيالك ف المكان
يتهز قلمى بكلمتين .. قد المقاس
ترقص على سن القلم حبة حروف
متشربة اﻹحساس
تنسج قصايد حب م اﻷصلى
ما انا أصلى ساعة مالمحك
بتفور مشاعرى حماس
كيميا و طبيعة و شيئ من اللاوعى
يسعوا سعى ،، و يملوا شهد الكاس
أشرب و أقول
و أغزل ف نول العشق شعر ..
مالوش ف خانة اﻹلتباس
واضح وضوح الشمس
أصدق م الندى
لما إبتدى وقفوا النجوم حراس
و المح خيالك ف المكان
يطلع كلامى على المقاس
عايش باعشق
من قبل الوعى
أنا عايش باعشق زى السيل
من قبل ما حتى
أعرف ف عيون الناس تفاصيل
من أول عينى ما لمحت ضحكة بنت
و دق القلب برِتم مفاجئ
حتى ساعِتها كمان سَهِّمت
و فجأة لقيتنى مخاصم نومى
و عاشق صمت ساعات الليل
من بدرى أنا باعشق
سحر بنات الدنيا بحالها
و عُمرى ما سِبت الدنيا ف حالها
و كنت لأهل العِشق دليل
ما أنا أصل العشق ف حالتى حياة
و باشوفه ف بحر حياتى نجاة
و إحترت معاه
دا أنا مهما باعيشه
تمللى باشوفه ف عينى قليل
و أتعذب فيه و أشتكى منه
و إن قالوا إنساه ف كلم عنه
أنا باحلف إن دا ويل الويل
من يومى أنا عاشق حالة العشق
و عامل فرق
ما بينها و بين الهوى و الميل
و باقدم عمرى عشان العشق
و أشوف العمر لوحده بخيل
عاشق أنا حالة العشق بجد
و قلبى محيطها بجزر و مد
و كل مراكب حسن نساء الكون
بتشيل
أطنان العشق اللي أنا بَادْرُه
و الحب و قصصه و نوادْرُه
و أغفر غَدْرُه ....
و باعيش صابر و باشِد الحيل
نادر تنول
فى الدنيا دى .... نادر تنول
و صدقونى القصة موش قصة عقول
و لا حظ ولا كُتر الحُمول
الدنيا دى ... ممكن تقول
لعبة و لمَّا بتِتْلِعِب .... مالهاش أصول
و مافيش قواعد أو حكم
و كتير و حوالينا و أَكَمْ
يخسر جسور ... و ينول خجول
الدنيا دى ... مالهاش حلول
يا تفوتها كاره للحياة
يا تعيشها غول
و مع الأسف ... نادر تنول
إسمك لوحده
إسمك لوحده بيهدى كل الحيرانين
إشمعنى أنا بيملانى بالشوق و الحنين
و عيونك المليانة سحر
و عشق للناس و الحياة
بخلانة على قلبى و عينيَّا بنظرتين
الأولى تحيينى و تملى الروح أمل
و التانية توعدتى ببكرة لو إكتمل
و تردلى ثقتى ف دنيا العاشقين
إسمك لوحده بيرسموه لوحة فنون
و يلونوه ييجى ألف لون
و يعلقوه على كل جدران البلد
و أنا الولد
اللي أكيد لما إتولد
وعدوه بقلبك أو يعانى من الجنون
و لقيتنى مجنون نطق إسمك بالغُنى
و باشوف حروفه بجد تتويج أو منى
أما الأمانى الحلوة ترقص ع الأغانى
بانسى مع اللحن الجميل كل الضنى
كسوف
و تهرب حروفك ماليها الكسوف
و تفرد ستارة من الحمرة خوف
و بعد السؤال اللي فاقد جوابه
و أيه اللي ودَّاه و مين اللي جابه
بيخرج رسول منى بيكى يطوف
و تشهد جوارحى و يشهد ألوف
بأنى ف مشاعرى باتوه ف الحروف
و يفضل حنانك مالوش ف العزوف
واحشنى وجودك يادوب ف الفضا
مراية و إطار و الحوار فضفضة
و بهجة حضورك بتغزل بنورك
جدايل خمايل مشاعر رضا
واحشنى حنانك و عظمة إيمانك
بإن اللي خالقك خلقنى عشانك
و إن اللي حاصل ظروف عارضة
واحشنى وجودك يادوب ف الفضا
جربت
جربت روحك مرة تعشق روح و بس
و تنسي كل الدنيا و الناس و الزمن
تفضل ما بين اليوم و بكره و تنسى أمس
و تدفع اللي طلعت بيه م الدنيا لغرامك تمن؟
جربت لما تشوف خيال طيف الحبيب
و إنتم سوا ... تنسي النصيب
و تعيش ملاك من غير هوى
رؤية خيال خلك تطيب
و الفانى منك و لا منه ما يشغلكش
يمين دا عشق الروح غريب
