برغم كل اللي جرا
(1)
و برغم كل اللي جرا ....
بافرح بجد بضحكة ف عيونك
و أدوب ...
و أحلف لا اصونك
أصل أيه الدنيا من غير الحبيب؟
و ﻻ نور الشمس لو فضلت تغيب؟
يا اللي لون الفرح عندى
هو لونك
كل شيئ منك لنفسي ..
أكيد يطيب
بس لو هارسمنى ضحكة
بين عيونك
مناجاه فى وجهك
(1)
بينطق كل شيئ فيكى
بآية من آيات الله
و أشوف وشك
أقول سبحانه من سوَّاه
و بيشم النسيم منك
عبير و زهور
و تلمس إيدك الأغصان
و تطرح نور
فيا بدع اللي جاد بيكى
و ما أبهاه
نَعَمْ ع الخلق بملايكه
و هو إله
من يوم ما قابلتك
(1)
ماهيش ميزة
ولا حاجة بها أتباهى
و لا باحكيها لاجل بطولة
و وجاهة
عرفت كتير كتير قبلك
و كنت لناس أنا مناها
و للسفن اللي شايلة الشوق
قلبى رصيف بمرساها
و قابلتك و شوفتك غير بنات حوا
و فى لحظات سكنتى القلب من جوة
و من نظرات كتبت مرافعتى ليكى
و من همسات بصدق
صعبت أنا عليكى
و نظرة عين لها معنى
بتمنح قلبى مية قوة
لقيتنى باقول كلام ف الحب
عن عاشق يدوب بالعشق
و إتمنيتنى أكون هوَّه
(2)
و بتدور الحياة تطحنَّا برحاها
و تغلبنا على أشياء
ما كنَّا ف يوم بنرضاها
لكن من يوم ما قابلتك
عرفت حاجات ما هانساها
و قلبى حس نوع تانى
من العشق اللي ف الأساطير
و صارله جناح، و صار بيطير
و صار بهواكى يتباهى
كأنه لما داق حبك
جرى ورا سحر ندَّاهة
أرسم ملامحك
(1)
باكتب على وجه النهار
حبك خضار
و باشوف ف عتمة غربتى
نورك .. نهار
و بامد إيدى لاجل ما أستنجد بكفك
و سط موج العمر و اﻷيام حصار
و بتكتبيني بالندى
على كل أوراق الشجر
و أنزل مطر ...
أغسل ذنوب البعد عنك و أرتوى
و البين قدر،
و الشوق ف حلقى كما المرار
و أكتب على وجه الزمن ..
حبك خضار
(2)
ما بقيتش أفكر بس غير فيكى
و أرسم ملامحك
فوق وشوش الناس
و أنده على كل البشر باسمك
يسقينى حبك
مُرْ صبرى ف كاس
محور حياتى و همى طول اليوم
إنى أراقب بسمة ف عنيكى
و أضحك لها من قلبى ضحكاية
لمحة أسى تجرى الدموع منى
ما أنا ليكى قلب و حس و مراية
ما بقيتش أفكر بس غير فيكى
و بقيتى عايشة العمر ويايا
بدون ميك أب
(1)
بدون ميك أب و لا تجميل
ما باقدرشى إن أدارى الميل
و لهفة عشق ف عنيا
و رعشة شوق على إيديا
و نار ف الصدر تستجدى اللُقا
تساهيل
بدون نظرات بدون تسبيل
أنا اللهفة اللي ف عيونى بتتكلم
و نار خوفك بتتألِّم
و أنا من يومى متعلِّم
بأن الحب من غير حضن يبقى عليل
دواه فى الشفة ع الشفة
و حضن يترجم اللهفة
و شهد الضم على نهر المحبة يسيل
و عين غابت عن الدنيا ف بحر عنين
و صدر بيتملى بأنفاس حبيب و الويل
و ويل الويل لعمر بيِّدى ... بس
قليل
(2)
و لما الكف
يحضن كف يتشابك
و يتحدى العيون و الناس
و جسم يفور بحور من نور
إذا كان العطش إحساس
مافيش عن وصله أى بديل
بدون ميك أب ...
بدون تجميل
ها يبان الهوى ف عينى
(1)
لو لسانى بناء على طلبك
ما صرحش بمشاعرى
برضه هايبان الهوى ف عينى
و يصرخ جوه شِعْرى
موش ها ادارى النور ف فجرى
موش هافوت مكتوب ف قدرى
عمرى ما اهرب من نصيبى ف يوم
ولا أجرى
حتى لو يخرس لسانى
و تحرمى العين م الأمانى
قلبى دقاته هاتبقى
حروف بتنطق بالمعانى
تعترف برضو بمشاعرى
(2)
تحكى عن حالى و توصف كل أمرى
حتى تنهيدة و شهقة صدر حانى
لمست القلب لثوانى
حركت فيه الهوى رجِّت كيانى
برضو هاتصرح بسرى
كل أنفاسى إعتراف فى حد ذاتها
ل اللي بيترجم لغتها
و كتاباتها
قصة المنقوش ف صدرى
لو لسانى بناء على طلبك ما قالشى
كل شيئ فيَّا لسرى أكيد هايِفْشِي
إقتراحى إنك تبادرى
تعلنى للدنيا إنى ليكى عاشق
سهم حبك فيَّا راشق
و إن قلبك من حنانه
مرة راح ينظر ف أمرى
بأيه يفيد يعنى النـــــدم؟!
(1)
إعترافى خلاص و قولته
أيه يفيد يعنى الندم؟
اللي بينى و بين عيونك
ما إتخلَقش من العدم
كان ف قلبى و كان بينمو
إتولد منذ القدم
لسة باروى جدوره فيا
برغم إنه طرح ألم
إعترافى خلاص و قولته
و اللي كان متخبى بان
و اللي كان جاهل هايعرف
من صحابنا و م الجيران
عشق عمره ما نام خياله
أو تأثر باللي كان
عشق عايش عمرى كله
عشق ع الوجدان ما هان
(2)
إعترافى خلاص و قولته
كلمة كلمة و حرف حرف
باعشقك و العشق ضعفى
و إنتى عمر ماليكى ضعف
باعشقك و أعجز أقولك
عن مشاعرى أى وصف
بس لو مرة تقوليلى
إنتى قلبك آنى صنف
قلبى قاصد بإعترافه
كلمة كلمة و حرف حرف
بس عمر الحظ مرة
ما شافنى تايه و إبتسم
إعترافى خلاص و قولته
بأيه يفيد يعنى الندم؟!!
رقصة غــــــرام
مدى إيديكى و سلِّمى
و دورى
وياكى فى رقصة غرام
أظن جه دورى
و سيبيلى روحك تطير
على جناح من حرير
أحمر بلون جورى
و إتمايلى بين الإيدين
و حسى بشعورى
يا ليلى آن الأوان
تضَوِّى من نورى
و أنا نورى نظرة عنين
و الحضن دا قصورى
مدي إيديكى بأمان
أنا قلبى باسبورى
رحــــــابك
نور النهار إنفطر
واقف على بابك
و الشمس مُستأنَسة
بتلِف ف ركابك
و الطير بدأ بنشيد،
مظبوط مع المواعيد
غنى و فرد جناحين
بيحج ف رحابك
إتمخطرى
و إتعايقى بحر دلال
أنا قلبى مال م الهوى
لما الغرام صابنى
و إنتى ولا إنتى هنا
و كأنه لم صابك
إنتِ و أنــــا
إنتِ و أنا
و الحب قصة مُزْمِنة
ضد الرياح و الموج
و ضد كل اﻷزمنة
ضد إعتراف الناس
و لومها و غلَّـها
ضد القوانين كلها
ضد الجمود
و المفردات الساكنة
و اﻷمر أصلاً و بهدووء
إنت و أنا
