أقولهالك
و أقولهالك .....
كلامى لو ف يوم قولته
و طلع سالك
و مرسال الهوى لو طار
ف يوم جالك
و قال ف الحب
دواوين الغرام أبيات
و جاوبتيه فى فون أو شات
هاقول ف بعادى يوم عنك
كما فى الخمر قال مالك ...
و أعيدهالك
أنا ف القرب ليك عايش
بعيد عنك أكيد هالِك
مفتونك
و ﻻ يحلالى م الدنيا
سوى صورتك
و ﻻ بيطربنى غير صوتك
و لو فارقونى كل الناس
هافوت الدنيا .. وﻻ أفوتك
و أيه تِسوى الحياة بدونَك
و أيه أجمل من اﻹحساس
بلما تكونِّنى و أكونَك
و أيه عمرى بلا رؤياك
و ساعة معاك
بعمر بحاله ف بعادك
...
و مفتونَك
لمَّا تغيبي
عارفة لما تغيبى ......
بتغيب الملامح من عيونى
و بابقى مستغربنى جداً
صدقينى أنا بابقى ناسى لون عيونى
لما بتغيب عنى صورتك
و أبقى عايش بين ظنونى و أنتبه
لو مرة جات قدامى سيرتك
عارفة لو كان الغياب مفهوم شوية
كنت عادى و هاعتبرها حسن نية
و كنت هاصبر و أنتظر ساعة رجوعك
و أبقى طوعك ...
مانتى برضو موش عادية
بس أنا غيابك بيمنعنى إنى أنام
و إن نمت مرة بتطلعيلى ف المنام
و تحسسينى بقيمة الغيبة اللي طالت
و المقابلة اللي إستحالت
بس حِنِّى ف يوم عليا
أصله لو كان الغياب مفهوم شوية!
لـــو
هو أنا لو مرة صدقت المشاعر
و اللي شاعر بيه فؤادى من زمان
و سرحت ف خيالى اللي مالى
القلب بالشوق و الحنان
و حاولت يوم أكتب على عيونك كلام
من فرط رقة حرفه رافض ينكتِب
و أنساه و أحاول مرة تانية
و لما باغرق بين عيونك بانسِحِب
هاتقدرى حالتى
و مرة تمدى إيدك بالسلام
و لا هايبقى العطف ع الولهان حرام
هاتشجعينى بنظرة ترفع سقف أحلام الهوى
أو ترحمى ف العشق قلبى اللي إنكوى
ولا تسيبينى للجنان
و لا تقوليلى أفوق من الوهم الغبى
و أدارى مكنونى اللي بان
باين علَيَّا
باين عليا مرة موش فاكر رقمها
إديت لقلبى الحق ف الطيران بعيد
و سمحتله يا خد كيانى
فوق جناح حلمه السعيد
و يخالف المنطق و ينسى
العقل و الواقع معاه
و يعيش طموحه
و يستمر ف طيش جموحه
و ييجى يشكى إنه تانى
ف قلب بحر الحب تاه
و إنه نادم
و إنه آسف
و إنه متبهدل أكيد
بس ذنبى إنى بصراحة
إديت لقلبى الحق
ف الطيران بعيد
بيهون عليكى القلب
لو عاشق صحيح
و بيسعدك رؤية فؤادى
لو جريح
و بتستمرى ف هجر قاسى
و لما تيجى بقلب ناسى
بس موش واضح صريح
ما بتحسميش الأمر ويايا بصراحة
و تفرحى لو قلبى ما يعرفش راحة
و يفضل الحال هو هو
الشك ساكن قلبى جوه
يا ترى بتحبنى و بالقلب حاسَّة
و لا فاضل حبة لسَّة
و لا ما بتعرفش تعشق
بس تعرف بس تِقسى
و عشقها له 100 ذبيح
بيهون عليكى القلب فعلاً
لو يكون عاشق صحيح
عـــــــادى
كنت عادى
الحياة عايشانى أكتر ما عايشها
و اللي عاوزاه منى تاخده، برضو عادى
ف الحقيقة ما كانش أبداً شيئ حايشها
و السنين بتعدى عادى،
و عمر سرعة سيره هادى
و دنيا رافضة اللي يناقشها
تنول مرادها
بعد ما تدوس فوق مرادى
و برضو عادى
و راضى بفتاتها و خيشها
و أما شوفتك
و إبتدا جواية ثورة
ع الحياة و الدنيا و الناس و العادات
و إبتديت أندم على سكوتى و صمتى
و ألعن الضعف اللي شاب
عمرى اللي فات
قلت عايز حقى يا دنيا و هانوله
مِ النهاردة هاتعملى
بس اللي أقوله
و بأصوله
هازرع الحب اللي هان بدل الآهات
لما شوفتك
و العيون سبحت ما بين شطين عيونك
و إغتسلت من السبات و من الشتات
و عرفت إنى مستحيل أفضل بدونك
قلت هاتحدى البشر
و العمر و الدنيا و حياتى
و مستحيل هابعد
و لا لغيرى هاسيبك
جوه عينى بروحى أصونك
إنتى مرسال الحياة لسنين موات
إنتى تعويض عما فاتنى ف اللي آت
إنت يا ست الصبايا
و البنات
إختصار الجنة و العشق ف جنونك
عشتهم و هاموت عليهم
لما شوفتك
و العيون سبحت ما بين شطين عيونك
ها صارحــــك
طبعاً هاصارحك
باللي ف القلب إتولد
و اللي نما و اللي طغى
و اللي إنفرَد
و اللي بييجى كل يوم
يسكن فؤادى
و يبقى أقرب منى ليا لو بَعَدْ
و مشاعر الحب
اللي عمرى ما عشتها
و اللي ف عينى ف المراية لمحتها
و اللي بدون ما أخجل
أقول كلِّمتها
و حكيت لها
عن إنشغالى و إنبهارى
و مهما أعيش العمر أدارى
أنا قلبى حبك و إنتهى
(2)
أكيد هاصارحك
رغم إن عنيا فيها كل شيئ
و ملامحى لو ركزتى فيها
هاتلاقيها تعكس الحب البريئ
بس العيون لو تسأليها
موش هاتكدب
و إسمعيها ..
ينطق القلب الجريئ
أنا باعشقك و بدون سبب
ماعرفش آمته
و حتى بطَّلت العجَب
هايفيد ب أيه تفسير هوايا
و أصل أصل مشاعرى أيه
و خلاصة الأمر إنى عاشقك
و الغرام فيَّا غَلَب
(3)
شوفت قبلك ناس بحبات المطر
و الرمل ماليين الوجود
و سمعت من غيرك وعود
و سرحت بيهم
لما سرحوا برضو بيَّا
و كنت مفتون بالعيون
أو بالقدود
و لا كانش فيه بينى و بينهم
أى حاجز
كنت حر بدون قيود
مطلق سراحى ف الشفايف
بس خايف يوم أتوه بين النهود
بس الحقيقة إن الهوى
ما صادفش روحى عندهم
أنا كنت ساكن غربتى بين الأيادى
كنت كاره من طباعهم عندهم
و أما راح اللي شاددنى
راح كمان اللي ف كيانى شدهم
و حلفت ما أعرف حد تانى بعدهم
(4)
بس أما شوفتك و إتعاملنا
عمرى ما حسيت لحبة مقدمة
و لا كان يبان
اللي مابينى و بين عيونك ملحمة
و بدون سبب
بصيت لقيتنى باعشقك
و أعز ما أملك
جه لعندك و إترَمَى
طبعاً هاصارحك
باللي كان بعد اللي بان
أما اللي هان
قلبى اللي طاير بيكى فوق
بعد السما
طبعاً هاقولك ع اللي صار
و اللي فى روحى كمان نما
حاجة فيـــــكي
(1)
حاجة فيكي لسة غامضة
ف نفس الوقت شادَّانى
لا قُربَك منى فسَّرها
و لا بُعدَك مخَسَّرها
و لا الأفكار مفارقانى
موش مصدق إنها
جات محض صدفة
و الغموض بيزيدنى لهفة
و الشقاوة اللي ف عنيكي
عاجنة كينونتك بخفة
يا اللي تاجك ف العيون
تقدير و عفة
الحياة ف عنيا واقفة
بس بإشارتك
هاتمشى الدنيا تانى
يا اللي فيكي شيئ مُحيِّر
حاجة لسَّة مجننانى
بس لـو يُصْدُق ف وعده
(1)
وعدنى يتكلم معايا
يقول كلامه و أسمعه
ماهو مستحيل هاكتم هوايا
جوة قلبى أو أمنعه
الغريبة أنا كل ما يقرب معاده
ليه بخاف
هوه أيه أصعب ف سيرة الحب
بعد الإعتراف
و أنا كل جوارحى بتصرح بحبى
مهما أحاول أخفى شوقى أو أخبى
يكفى نظرة ف عيني
تفضح كل حاجة
شوف سبب للخوف يا قلبى
بلاش سذاجة
(2)
إنت خايف لو يفاجئك إنه خالى
أو ما حسش باللي سهَّرك الليالي
إنت مرعوب م المواجهة
إنت متشعلق بكلمة ف مرة قالها
بس خايف لو تكون الكلمة عادى
موش قاصدها
و كل واحد راح لوادى
خدها منى نصيحة عيشها بالصراحة
بالوضوح الدنيا تمشى بشكل هادى
بس لو يصدق ف وعده هاعترفله
إنى معنى الحب لو يوم إتوصفله
و إنى عشق العمر
لو نفسه إنه يعشق
و إنه فى بحر الهوى ويايا يغرق
بس لو يصدق ف وعده
أوعده إنه هايلقى سعده
إغـــــــتراب
(1)
كل البشر
باشعر ما بينهم بإغتراب
و إنت الوطن
و الراحة من كل العذاب
و الكلمة منك مهما كانت
بالقى أوجاعى إستكانت ..
بالقى روحى معاكى
موش فاكرة الغياب
و أما بتعاتبينى بافرح
أصلي عندى ترجمة لمعنى العتاب
ترجمة بتهيم بروحى
ترجمة تطبب جروحى
ترجمة بتطير بأحلامى لما فوق السحاب
كل البشر نظرات عيونهم مقلقة
بيا و بيكى ع الدوام متعلقة
فاتحالنا دفتر للحساب
(2)
كل البشر ما يهمونيش ..
منهم كمان أنا ما اشتكيش
مع إنهم زى الشاويش
ما يخصنيش
بينى و بينهم مية حجاب
إنت اللي بس يهمنى
منها الكﻻم
و ما اطيقش يبقى ما بيننا يوم
ريحة الخصام
إنت الحبيبة و القريبة
و الغريبة إنك كمان كل الصحاب
كل البشر
باشعر مابينهم بإغتراب
إلاك يا نور العيون
إلاك يا قلبي اللي داب
