عاشق أنا
و العشق صار
له عيد
و القلب مال
سوسنة
و الدقة بالمواعيد
غيَّرت ذوقي
فـ الغُني
حتي المُني
طاله كمان تحديد
و بقيت أطبطب
ع الهوي
مانا عشقي لسة
وليد
-----
و هاقولك عاشق
و إنتى العشق
اللي إتمناه
القلب سنين
و يبان العشق
ف نظرة عينى
و يصرخ جوة
حروف ساكتين
و باقولك عاشق
و إنتى لوحدك
سامعة الصوت
و منايا يكون
الناس مشغولة
و مش سامعين
-----
طبعاً عاشق
....
باعلن عشقى
ف كل مكان
و أعشق حتى
العشق لذاته
و أعشق طول
ماهو ف الإمكان
و أرسم قلبى
ف كفى علامة
و ألف سلامة
على الخِلَّان
طقوا و غيروا
و سيروا ورايا
و إتحسروا
على عمر هوان
لو تعشقوا
هاتحسوا بقلبى
اللي إتملا
شعر و ألحان
أسهل تعشق
يا اللي بتحسد
حسدك ها يوديك
لجنان
و الدنيادى
يا تفرح فيها
يا تعيش و المخ
بدنجان
طبعاً عاشق
...
و أكدب ليه
ما أنا لسة
ساكنى
جوة كيانى أكيد
.... إنسان
-----
أعرف أقول
...
إنك طيوف
سافرت لما بعد
المدى
و إنك صدى
طَرْق القلوب
على البِبَان
المؤصدة
و إنك كما الروح
اللي
سابحة فى البراح
و إنك تسابيح
السديم
مالى المجرة
بالسماح ....
وِرد إبتدى
،،
و أعرف أقول
إنك تكاوين
إنشطار العشق
لما بينبلج
مرَّات
و إنك تسامى
الذات
و إنك خيال
النور
إذا وهجه إنفرد
جناحات
،،
و أعرف أقول
كل الكلام
و أعرف أقول
حتى السُكات
لكنى عاشق قولى
فيكى
بلهجتى
و أحب أقول
كل الكلام
بسجيتى
عاشقك أنا
و إنتى اللي
قلبى يحبها
و خطفتى روحى
و خليتينى أسهر
ما أنام
لمسة إيديكى
بتغنى عن كل
الكلام
و النظرة فى
عيونك
قصايد شعر أحلى
من تسابيح السديم
أو من تسامى
الذات
على شعور الأنام
باشعر براحة
ف قربى منك
و الكلام يحلَوْ
عنك
باعشقك بالرغم
إنك .....
أبخل الناس
فى الكلام
-----
هو أنا لو روحى
هامت بيك
و سافرت للخلا
و العشق عشش
ع البدن
خلَّى اللسان
مرة إنجلى
و كتب كلام
عاشق
بينطق فيه هواه
و الشوق كمان
دارت مع الأيام
رحاه
و النوم نساه
يبقى الفؤاد
بيك مُبْتَلى؟
-----
قررت أتوب
و أنسى الفشل
فى وصولى ليك
و أنسى الحماقات
كلها ويا العيوب
و أكتب على
صفحة حياة متجددة
بادئ يادوب
تايب عن الكفر
بنعيم العشق
مؤمن بالحياة
جوة القلوب
متوضى بالطهر
اللي ساكن ف الندى
فاتح إيديه
للرزق فى مجرى الدانوب
اﻷرض أرض الله
و هو اللى وهب
ناس من دهب
و ناس جميلة
ف حسنها وسط الشعوب
قررت أتوب
و أكتب فى صدر
هويتى
عاشق يادوب
