باحلم بيكى
بدون ما بـ أنام
و إنتى يا فرحة
قلبى عليكى،
حاجة بتفرِح
ف الأحلام
و الشوق بيصحى
القلب الدايب
يعمل فيه م
اللهفة عجايب
بس الغايب
سايب جوة القلب
علام
فجأة ألاقى
إيديَّا إتمدوا
دراعى بيحضن
عوده و قده
و لَمَّا عيونى
يلاغوا عيونه
حتى بصمت باشوفهم
ردوا
رد ماهوش محتاج
لكلام
و كتفى اللي
واهبهوله ملاذ
وطنه الآمن
أو لو جاز
إنه يكونله
جزيرة ف جنة
و كل مافيها
عشان يتهنَّى
و اللي باقوله
ماهوش ألغاز
و الحلم حلال
و مافيهش حرام
باحلم بيكى
ضفاف للنهر
و عطشان منك
مليون شهر
و آه لو تصدُق
بس يا زهر
أنا كنت أرويها
بنبع ما يخلَص
حتى العُمر
قليل لو مَهْر
و قلبى و عينى
أمان و سلام
كفى بيلمس كفك
و أسرح
و أما شفايفى
لخدك تشرح
صهد الدنيا
يلف مكانى
و صدرى الحانى
يصبح نهر و
قلبى بيسبح
و أفضل برضو
ناقصنى علام
و أحلم بيكى
بدون ما بــ أنام
