على بحرك و أنا الملَّاح...
فَرَشْت العمر و سنينه
و عاش سرى زمن مدفون
و رَحْ يِفْضل بينى و بينه
يا أحلى من نسيم الصيف
يا كيف الكيف
انا موش ضيف و عازمينه
أنا الصابر على بعدك
و ليه بالرُخص بايعينه
يا مارية يا عربية و قبطية
و رمشك دابح الرومان
و أنطونيو طِلِع عينه
و مرقص كان صديق حسنين
و يَنِّى يغَنِّى مع نينو
مانولى و قِمِّة الحارة
فى خَمَّارة خِسر دينه
عشان حودة اللى كان سكران
بواحدة من تفانينه
خرج مادفعش ولا ملِّيم
ولا حتى رغيف فينو
و كان بِيْمِز بالفسدق
تقولش كتير ملايينه
أنا مدانك كما قلبى
و حواريكى شرايينه
وحشتينى ...........
و بيعانى الفؤاد بُعدك
و عشاقك معاندينه
و عمرى يا عروسة البحر
من بحرى لبوالينو
و من بوكلا حبيبك جاى
لكامب شيزار و عارفينه
يشوف الشاطبى بيوصى
أبو العباس على دينه
يفوت الدنيا و يجيلك
و لو مشاغلها حايشينه
