و نظرة عنيكى اللي بتشُق قلبى
و تقرا اللي فيه مهما حاول يخبى
و تسرح ف كل الكيان اللي سلم
و واقف مبلم
ماعندوش رد فعل إلا سبحانه ربى
عشان نور عنيكى بيملا السما
ينور حياتى اللى كات معتمة
و إنا مش بابالغ ف وصفى إنما
دا وحى إنكتبلى و أنا ليه بالبى
ف نظرة عنيكى اللي بتشُق قلبى
---
و حركة شفايفك لنطق الحروف
بتطرح فواكه و حان القطوف
فراولة و عنب
و وديان رطب
و آه م الكريز أما يسحر عيون
اللي واقف يشوف
و أتارى الكلام
كان بيعشق شفايفك
و بيعيش حياته ما بينهم أسير
و كنت أما أحاول و أسرق معانى
بيصرخ عشان قد أيه راح يعانى
و يبكى بحروفه دموع ف النقط
عشانك فقط
أسيبه يزهزه و أفضل مكانى
---
و لمسة إيديكى ف ساعة السلام
ماهيش سحر عابر
ولا لمسة عدت كده و السلام
دى كانت وصال يروى عطش الجوارح
و غِيَّة حمام للى كان منها سارح
و ود و مطارح
لروحى اللي عاشت بلا أى دار
و كسر البعاد اللي عاش فيا جارح
و فجر إبتدى يملا عمرى بنهار
دى لمسة إيديكى ف ساعة السلام
