شط الأمل

((شط الأمل))
على شط الأمل واقف بقالى سنين
و رمل الشط كله حنين
و قلب ف نار ، عملته فنار
عشان يهدى سفينة قلبك الحيران
بقاله سنين
و موج البحر ياخدك للبعاد و يروح
و واخد منى حتى الروح
و أحلامى زَبَد فى سكة العاشقين
بقالى سنين

بنادى و صوتى مش واصل
و أملى بشكل متواصل
يزيد رغم البعاد و البين
و يبقى سؤال فى قلبى حزين
طريقك فين؟

صحيح ما أملكش غير حبى
و نور بيشع من قلبى
مكانك فيه
و مطرح ساكنة فيه وحدك
على عهد الهوى معاهدك
و فيه سعدك و فيه وعدك
و فيه كل اللى تتمنيه

أنا مش باوعدك بقصور
ولا كنوز من دهب مبدور
و لا ستاير حرير مسدول
لكن بادعى و منايا أنول
هَنَا الأحوال و رزق حلال
و يكفينى إنى أعيش مستور
و ده حلمى فى زمن التيه
ياريت قلبك يآمن بيه