صباح
ما إستعملوش
قبلك
بشر تانيين
طباح طازة
بريحة الفل
و الياسمين
صباح معمول
عشانك بس
يوم ما إتمَس
زايد كل يوم
لم خَسْ
شوق و حنين
-----
صباحكم غير،
و شايل شوق
ع جنح الطير
و متغمس بنور
الشمس
لما بهمس بتصبَّح
و قال للخلق
لو ساعيين
صباح الخير
-----
صباح الطهر
فيه أصله
و أحلى مافيه
دوام وصله
و يعشق سهم
من عينك
شهيدة الروح
على نصله
-----
و ساعات بيكون
للصمت بلاغة
و صوت عالى
و ساعات بيهون
العمر عشان
أحلى آمالى
و ساعات اللون
بتشوفه العين
ألوان تانية
و ساعات الكون
بيجيلك كله
كده ف ثانية
كل ده من نظرة
عين حَوْراء
بتكون الدوا
و تكون الداء
و إن مرة شكيت
منها لروحك
تطلع غلطان
و النظرة براء
-----
صباح ...
يغزل بضى الشمس
شال الأمس من
ذكراه
و بيداعب
ستاير طالة
م الشباك
بتتنهد بلهفة
و آه
و بيقول الكلام
موزون
و بيركز ف حرف
النون
لأنه بجد يتمناه
-----
صباح راسم على
كفوفك
خطوط الطول
و عامل عرض
لاجل الأرض
...........
ما تنور بضي
عيونك الحلوين
-----
بيطَمِنى كتير
و بجَدْ
إن مافيش ف
غلاوتك حَدْ
و إنك غاية،
و إنك آية
و إنك شامة
و لون ع الخَد
و إن عيونك
بحر براح
و أنا ولا كنت
ف يوم ملاح
بس لقيتنى باصاحب
موجُه
و باعشق شمسه
ف كل صباح
بيطمنى إن إنتى
رقيقة
و إنك حلم لقيته
حقيقة
و إن البعد
كمان بيزيدنى
لهفة و عشق
ف كل دقيقة
و شوقى كمان
ما بقاش يتعَدْ
بيطَمِنى كتير
و بجَدْ
إن مافيش ف
غلاوتك حَدْ
-----
صباح دايما
بيتوضى
لفجره من عيونك
ضي
صباح يحلف بإنه
ما شاف
ف عمره زى حسنك
زي
صباح سامح سنين
فاتت
و طمعان تبقى
عمره الجي
صباح مليان
سماح منك
و يضحك لو لمح
سنك
و ﻻ يحتاج
....
من الدنيا بوصالك
شي
-----
صباح الفل يا
أحلى البلاد
يا حضن
يا وطن اللى
أضناه البعاد
و اللي كانت
فرحته
فى يوم رجوعه
لصحبتك
أكبر أكيد
من أى فرحة
بإنه عاد
-----
يا نهار ضياه
كان جاى بيتهَجَّى
باعت شعاع الشمس
يِتْرَجَّى
بيقول صباح
الفل يا بلدى
الغيبة طالت
و أنا
مش لاقى و لا
حِجَّة
-----
صباح الفل يا
أحلى البلاد
يا حضن
يا وطن اللى
أضناه البعاد
و اللي كانت
فرحته
فى يوم رجوعه
لصحبتك
أكبر أكيد
من أى فرحة
بإنه عاد
-----
صباح الحب ليه
عنوان
و ورد و نور
فى كل مكان
و ضحكة ف وش
كل الناس
تقول للحزن
كون إنسان
.
صباح بقلوب
بشر عاشقة
تضاحك خلق متضايقة
و تمسح ع الألم
بكفوف
و لو بحروف
تكون فارقة
.
و على كلمة
سماح تصحى
تلاقى نفوسها
متوافقة
صباح يعزف غرام
صولو
يغنى العشق
و يقوله
.
و إسم حبيبى
بقى معلوم
و أنا اللي
قاسيت ف مجهوله
صباح عاشق عيون
سارحة
مشاعر عشقها
طارحة
غزل برموش و
نظرة لوم
على أيام بلا
فرحة
.
صباح الحب
,,, حب و بس
يكون بكلام
يكون بالهمس
يكون بس المهم
يدوم
و يظهر زى نور
الشمس
-----
صباح الصبح
غار منه
و فتح زهر بستانه
و فرفش لما
شاف إنه
جماله مش ف
ألوانه
جمال الصبح
ف الضحكة
و ف الفرحة
الملالية
و عطر يفوح
يكون أزكى
إذا قدمته انا
هدية
-----
صباح مابقاش
بيعرف قبل صبحك
صبح
و ان ماحظاش
بنورك
يبقى عمره الليل
صباح زهره
بيضحك بس لعيونك
و أنا اللي
صبحت مفتونك
إذا إتأخرتى
بدأ الويل
-----
صباح مالوش
إلاكى سيرة
و خالى أى ملام
و غيرة
و عاشق الخطوة
الرقيقة
و روحه سجادة
و حصيرة
-----
صباح ف عنيكى
يتمرغ
يدوب ف مشاعرى
و يدغدغ
حصى الأشواق
على الشفة
يا رمز الرقة
و الخفة
صباح لهواكى
متفرغ
----
صباح معمول
على مقاسك
يبوس كفك يبوس
راسك
و ييجى بورد
م الصابح
خدوده حرير
و لو حتى البنات
هاتغير
فى طرف التوب
يكون ماسك
-----
صباح يرسم
بضى الشمس ف
عنيكى
نهار الكون
و تفضل ضحكة
تصنع فرحة اﻷطفال
و من صوتك نغم
يملا الرياض
أنغام
تحاول تحفظه
العصافير
و لما تطير
بتحضن بالجناح
أنفاس
نسيم من روعته
بيقول
بإنه الصبح
كان فايت
على عيونك و
ضحكت ليه
-----
صباح قبلة عنيه
وجهك
صباح مفطور
على اﻹيمان
عيونك زمزمه
الطاهرة
و قلبك بيته
ذى اﻷركان
-----
بيسعدنى إن
أول بيت
من الشعر ف
شمال الدنيا
كان ليكى
و أول حلم،
أول لهفة
ع النظرة اللي
ف عنيكى
و يسعدنى
إن لما الخلق
كانوا نايمين
عيونى و قلبى
كانوا صاحين
عشان يتونسوا
بيكى
صباح الفل
يا ضحكة سنين
العمر
لما تمر
ما بتخضر غير
ليكى
-----
و لا فيش صباح
يصبح صباح إلا
بصباح منك
صابح صباحك
نَدِى
و صبحه بيصبح
و الطير و عطر
الزهور
بيسألوا عنك
-----
و أقوم أختار
صباحاتى
عشان تقدر تليق
بيكى
ألاقى الورد
ع الصفين
بيتمنى المقص
يبوس
غصون منه و
يضحكلك
و كل حروف كلامنا
بتيجى تتحايل،
و تتمايل
عشان تغزل صباح
ما يكونش
حد إستعمله
قبلى
صباح معكوسه
نور عينك
و ضحكة صبوحة
ع الخدين
صباحك إنتى
يا أجمل صباح
ف الكون
-----
صباحك بنت بضفيرة
بتضحك حتى ع
السيرة
و كل الحى بيراقب
و مش قادر على
الغيرة
صباح قلب إنفرد
أتواب
قماش أبيض مغطى
الباب
و وجهك ضحكة
بتشاغل
ألوف واقفين
هناك خُطاب
؛؛؛؛؛؛
صباحك
......
بسمة الثغر
اللي بيسبح
إله خلقك
دليل ع القدرة
و الإحسان
صباحك
.......
راحة للروح
اللي ريحة خطوتك
ليها
نعيم الدنيا
و بهاها
و سجدة شكر
للمولى
عشان سوَّاكِ
جنة
و نوره ضَوَّاها
؛؛؛؛؛؛
و صباحك فعلا
موج البحر
بلطيف تلاطمه
يترقق قلب الصخر
و كأنك حقا
حورية
و حياتى إن
يقبل قلب
أرخص مهر
طُلِّ بعيونك
تسحرنى
فأنا قد جئت
أصب النهر
و عند مصبَّات
الأنهار
دنياً من سِحْر
تتناثر فوق
شواطئك
أبيات الشعر
؛؛؛؛؛؛
صباحك
غير صباح الناس
صباح يختال،
صباح ينباس
بيسقينى الأمل
ضاحِك
يسافر بِيَّا
فى براحك
و طول ليله
قمر ونَّاس
صباحك
غير صباح الناس
؛؛؛؛؛؛
صباحك
حنة ف كفوف
الصبايا
و كحل ف عيون
البنات
صباحك
وردتين وسط
الضفاير
و الشرايط لما
تبقى ملونة
بلون الحنين
صباحك ... دقة
الستات
ف حنة فلاحين
و الكف بيقول
الغُنى
حكمة سنين
؛؛؛؛؛؛
صباحك
أحلى زغروتة
فى فاتحة عاشقين
بيرن صوتها
رك بس ما تنتهى
قولة آمين
صباحك
إبتسام العمر
فجأة
بعد ما إعتاد
البشر
شكله الحزين
؛؛؛؛؛؛
صباحك
حاجة بتحرك
مشاعر طيبة
ف الروح و تلمع
ف العنين
صباحك
فعل باستنَّاه
يوماتى
و ضحكة بتلون
حياتى
و جايزة بيها
خصنى
ف الدنيا رب
العالمين
-----
صباح يعكس ضيا
جبينك
يا نور و الطهر
بيزينك
جميل بوحك
جميل صمتك
و سَمْح الود
من دينك
؛؛؛؛
صباح الحب ليه
عنوان
و ورد و نور
فى كل مكان
و ضحكة ف وش
كل الناس
تقول للحزن
كون إنسان
؛؛؛؛
صباح بقلوب
بشر عاشقة
تضاحك خلق متضايقة
و تمسح ع الألم
بكفوف
و لو بحروف
تكون فارقة
و على كلمة
سماح تصحى
تلاقى نفوسها
متوافقة
؛؛؛؛
صباح يعزف غرام
صولو
يغنى العشق
و يقوله
و إسم حبيبى
بقى معلوم
و أنا اللي
قاسيت ف مجهوله
؛؛؛؛
صباح عاشق عيون
سارحة
مشاعر عشقها
طارحة
غزل برموش و
نظرة لوم
على أيام بلا
فرحة
؛؛؛؛
صباح الحب
,,, حب و بس
يكون بكلام
يكون بالهمس
يكون بس المهم
يدوم
و يظهر زى نور
الشمس
؛؛؛؛
صباح فاتح لنور
الشمس احصانه
و احزان الليالي
يغيبوا ما يبانوا
صباح ضاحك
و ف عيون البشر
يلمع
و مين يقرا
و مين يسمع
لو الأشواق
عليك هانوا
؛؛؛؛
صباح صابح
بيحلم بيكي
طول ليله
بيتمني يادوب
يعرف
طريق قلبك و
هايجيله
كأنه عنترة
العبسي
وجاي بالجيش
علي خيله
صباح النور
يخللي الليل
يقوم واقف على
حيله
؛؛؛؛
صباح الحب
ع الدنيا و
ع الأحباب
دى كلمة حب
تفتح ع الندى
100 باب
نهار نادى
و فيه الرزق
بينادى
ما فيش بينه
و بين الموعودين
حُجَّاب
؛؛؛؛
صباح الخير
على عيونك
غريبة الدنيا
من دونك
و مهما تمر
بينا عيون
عيونى يوم ما
ينسونك
؛؛؛؛
صباح الخير
على الناس اللى
تفهم بَسْ
على الناس اللى
عندها قلب
عندها حِسْ
و طُظْ ف كل
قلب مريض
مالوش لازمة
و حاطط جوة
صدره أكيد
شِكارة جِبس
؛؛؛؛
صباح بارميه
و باتمنى يكون
لايق
صباح يختال
على خدِّك و
يتعايِق
يا نور ربَّانى
هَلْ ولاح فِ
دُنيايا
باشوف وِشِّك
فِ عِزْ همومى
أروح رايق
؛؛؛؛
صباح مرسوم
على قدِّك
و باعته يقول
مافيش قَدِّك
تعالى و قولى
ما بَدِّك
أنا اللى وهبت
باقى العمر
مِستَنِّى يادوب
رَدِّك
؛؛؛؛
صباح غيرانه
منه الناس
لإنِّى مغرَّقه
بإحساس
و كاتب ع الجناب
آية
يارب إكفينى
شر الناس
-----
أكدب لو قلت
إنى ما باعشقش
الغامض فيكى
و الواضح زى
المستور ...
ما هو كلك نور
وأحلفلك إنى
باودع روحى
تسافر ف الملكوت
الواسع
و تطوف بيكى
ف كل صباح ....
و العشق براح
أكدب لو أنكرت
غرامى ..
و عمرى ما كنت
باحب الزور
أيوة أنا عاشقك
روح بترفرف
فى الملكوت
أيوة باغنى
العشق غناوى
و من غير صوت
أيوة و موش
هانكر
خفقان القلب
بنبضك
عاشق
بس عشان أنا
واعدك
عايش عشقى
سكوت ف سكوت
بس العشق إن
كانش يفضفض
من سجن الأشواق
هايموت
و أنا ما أقبلش
لا أخلف وعدك
و لا أقفل على
حبى بسور
مش هانكر حبك
و هاصونك
و هارفرف بجناح
مكسور
هاكدب لو قلت
ما باعشقش
و خايف لا أدخل
ف المحظور
