ضد النور
أيوه بنكدب ...
و بنكفى على الحق ماجور
نخفى حقايق أو نتضايق
يمكن حتى بنشهد زور
لو حد سألنا عن الواقع ... أو بندافع
و نخلى الطابق مستور
حتى الزيف ما بقاش تقليعة
لأ دا قانون و كمان دستور
لما الضلمة بقت شوارعنا
و توهنا و ضِعنا
علشان فعلاً ضد النور
نكبت مشاعرنا و نخفيها
و لما تقاوم .. نقتل فيها
و بنقبل بالغامض منها
و نرفض نتمتع بصافيها
بانيين بيننا و بين مشاعرنا
مليون سور
كاره كل الكدب العاجز
كله يغور
عاشق أنا و الصدق دوايا
بس الصدق علاج محظور
و الدنيا بقوانينها العوجة
بتصفى العشاق بالدور
و العالم مستسلم جداً
و كأنه ف عالم مسحور
الشبابيك بستاير سودة
حتى الشبابيك .. ضد النور
