الذكرايات

موش باقى من عمرى

اللي فات ... غير ذكرايات

لما الشريط بيمُرْ روحى بتِبْتِدِى ..

حَبِّة آهَـــات

و تطل م العين دمعتين بتنهدات

مع لفتة للخلف بأسى على عمر فات

موش باقى غير حبة صوَّر

مليان ضحك كأنى عارف وقتها

إن الفرح كان فرصة فجأة كسبتها

و الحُزن آتْ

لَمِّة صحابك و الكتاف لامسة الكتاف

دولوقتى لو كان باقى منهم حد جايز تكتفى

بينك و بينهم بإتصال أو حتى شات

كُل اللي باقى من زًمَن حَبِّــة شَجَن

و الروح تحاول بس تجمع نفسها

بَعْد الشتات

و بلوم بتسأل نفسها وسط السُكات

فين اللي كان، فين الأمان، فين الحنان

فين اللي كل ما شيئ يروح

حتى الجروح، يبقى اللي متهوم الزمان

مع إنه على طول الزمن ... إحنا الآفات

موش باقى من عمرى اللي فات

إلا الأسى و حاجات لا يُمكِن تِتْنَسى

نحكيها بس كذِكرايات