لما سِيد الخلق قال إحنا ف رباط
الشر شاط
والخفافيش فكروا
قال يبعدونا عن السراط
ده إعتباط
عندنا ذو الحجة بيعانق شباط
و الوطن بيضمنا
و إحنا مسلم أو مسيحى
كلنا أقباط
يا خفافيش الظلام ده شعبنا
المحنة تيجى .. تلِمِنا
و آدى صفنا
بال ع المؤامرة و غاط
مستحيل هاتفرقونا
مهما طال الإنتظار
و الزمن أشواط
فى إسكندرية الجرح كان و مازال
نزف البدن بين الكنيسة و جامع
و ياما دق على الرؤوس طبَّال
تفتيتنا ظَل المستحيل السابع
إحنا صحيح دينين
بس الإله واحد
آدان جرس .. كله ندا
بس إنت كون عابد
و قبل ما نداوى الجراح بكلمتين
نفوق بقى .. و العقل يتواجد
نفس المصير بيضمنا
و ياخدنا تحت الباط
لو محتاجين جفون عنينا يفتحوا
ما يفتحوا
و يصحصحوا للإحتياط
لاحسن فلول الغل ناوية تقشنا
و تسيبنا حافيين ع البلاط
